Ukusōka 9

Imbūngo ja Ng'ōmbe

1UNTWA alinkummbūla Mose alinkuti: Ubūke kwa Falao ukammbūle ukati: UNTWA, Kyala gwa Bahịbulị ịkuti: Ubābule abāndu bāngu ukuti bambōmbelege une. 2Linga kukāna ukubasōsya, ukāli ubūmilịle ịtolo, 3ikiboko kya NTWA kikutwalaga imbūngo isịsya ku ng'ōmbe syinū ndukubo, ni fwalasị, ni mbụ̄nda, ni ngamịla, ni mịtị̄mo gya ng'ōsị ni mbene. 4Lolị UNTWA ịsakusịtapulanịaga ing'ōmbe sya bany'Ịsịlaelị nisya Begịpịtị, kokuti, isya bany'Ịsịlaelị jingagwangapo najimo. 5Po papo alinkubīka akabalilo alinkuti: Kilābo UNTWA ịkusịbōmbaga sịsịsị nkị̄su. 6Po papo kilābo ikīngi UNTWA alinkusịbōmba sịsịsị, ing'ōmbe sya Begịpịtị sịlinkufwa syōsa, lolị isya bany'Ịsịlaelị jikafwịlepo najimo. 7Falao alinkusyaganịa ukuti īng'ombe sya bany'Ịsịlaelị sịkafwapo najimo. Lolị indụmbụla ja Falao jilinkuja ngafụ, alinkusịta ukubasōsya.

Amūlu

8Kangi UNTWA alinkujoba naba Mose na Alonị alinkuti: Mwege umfwandilo gumo nkigemo kya moto, Mose agusope kumwanya bo Falao ịkukēta. 9Panyụma gwịsakwịpelaga lufụ̄mbi ulutịne pa kị̄su kya Egịpịtị kyosa, po lwịsakuja mūlu aga gapufwịke gị̄pelịle fịlōnda mmbāndu na mfịnyamāna, nkị̄su kya Egịpịtị kyosa. 10Po papo balinkwega umfwandilo ukufụma nkigemo kya mōto, balinkwakwima nkyenị mwa Falao, po papo Mose alikugusopa kumwanya umfwandilo; gulinkwịpela mūlu aga gapufwịke fyalị̄pelịle fịlōnda mmbāndu na mfịnyamāna. 11Abagānga ba butūngulu balinkutolịgwa ukwima nkyenị mwa Mose, namanga amūlu gabakolịle bōpe pamopēne na Begịpịtị bosa. 12Lolị UNTWA alinkujipelela ubukafụ indụmbụla ja Falao; alinkusịta ukubapilika, bo mụno UNTWA alimmbūlị̄le Mose.

Ifụla ja mabwe

13Lelo UNTWA alinkummbūla Mose alinkuti: Ulābile ukulēmbuka, ukīme nkyeni mwa Falao ukammbūle ukati: UNTWA, Kyala gwa Bahịbulị, ịkuti: Ubābule abāndu bāngu ukuti bambōmbelege imbōmbo. 14Akabalilo aka ngukutumilaga īmbūngo syosa ku ndụmbụla jāko, na kubabōmbị bako ba kubāndu bako, ukuti mụmanye ukuti akajako uju afwene nanịne pakị̄su kyosa. 15Linga balị̄nwịle ikiboko kyangu ukukukoma ugwe nukubakoma abāndu bako ni mbūngo, ngali ulu mụpyụtịgwe mụmalịke pakị̄su. 16Lolị isị sịpelịle ukabaleka syo sya kuti mbanāngisye amaka gāngu ko kuti ingamụ jāngu jifụmụke nkị̄su kyosa. 17Lolị ukāli kwịfụna kubāndu bāngu, kukāna ukubābula mw'Egịpịtị. 18Kilābo nnda lūlūlū ngutwala ifụla ja mabwe inyị̄ngị, iji ab'Egịpịtị bakajibonamo sịku mmbūmị bwabo. 19Lilino lelo ubatume abākusyega ing'ōmbe nutūndu utūngi nndukubo, usị̄ngisye nnyụ̄mba, papo ifụla ja mabwe jịsakubatịmilaga abāndu ni fịnyamāna ifị fịli nndukubo fịkatwalịgwa kukāja, po lelo fịsakufwaga. 20Lelo uju ālitị̄laga ilịsyu lya NTWA mbabōmbị bā Falao alinkubakagila nnyụ̄mba abatumwa bāke ni ng'ōmbe syāke; 21lolị uju alisyokị̄le ilịsyu lya NTWA, ābalekịle abatumwa bāke ni ng'ōmbe syake nndukubo.

22Po lelo UNTWA ālimmbūlịle Mose ātịle: Golosya kumwanya ikiboko kyako ukuti īfụla ja mabwe jitịmege nkị̄su kya Egịpịtị kyosa, jibatịmilege abāndu nifịnyamāna na masēke mmịgūnda nkị̄su kyosa kya Egịpịtị. 23Po Papo Mose alinkugolosya kumwanya ingịli jāke; po papo UNTWA alinkutuma injasị ni fụla ja mabwe, umōto gulinkugwa pakị̄su. UNTWA alinkōna ifụla ja mabwe pa kị̄su kya Egịpịtị. 24Jilinkutịma ifụla ja mabwe, nkati mụfụla jila jila gulinkumụlịka umōto kabili kabili, jāli fụla ja mabwe inyị̄ngī, iji jikālịkọ ija kufwana najo nkị̄su kyosa ukufụma nkabalilo aka Egịpịtị jipelaga ukuja kikolo pakị̄su. 25Mwa Egịpịtị gwesa jākomịle ifị̄ndu fyosa mmigūnda jāgikomịle imịpịkị gyosa igi gyali nndukubo, nabāndu bōsa nifinyamānafyōsa. 26Mwene nkị̄su kya Gosyenị mụno bālịmo abany'Ịsịlaelị, mo jikālịmo najimo ifụla ja mabwe.

27Po papo kangi Falao alinkubabilikila ba Mose na Alonị alinkubabūla alinkuti: Ndulịle inōngwa akabalilo aka: UNTWA atalwịsye; une na bāndu tusobịle. 28Nsūme UNTWA; injasị nifụla ja mabwe ifị fitugwilị̄le fịtufwene. Nndapịle ukuti ngubasōsyaga, āmụtịkwandisya kangi umwe ukuja mụno. 29Mose alinkummwamụla alinkuti: Nakalinga ịtolo bo mmalịle ukusọka nkāja, nịsakugolosya ikiboko kyangu ku NTWA; īnjasị jịsakumalikaga kangi jitịsakujangako najimo ifụla ja mabwe, ko kuti umanye ukuti ikị̄su iki kya NTWA. 30Lolị nsịmēnye ukuti ugwe nababōmbī bako mụkāli mụtịkuntị̄la UNTWA Kyala. 31(Ikatanị na malesị fyalyonāngị̄ke, namanga amalesị gāsōkịle ifịsāsa, ikatanị jāndaga ukubila ukuti jipege ubulēnge. 32Lolị inganụ jimo nutūngi utūngi fyo fyaponịle papo fyabyalilị̄gwe kusụlo). 33Po papo Mose alinkusōka nkāja ukufụma kwa Falao, alinkugolosya amaboko gake ku NTWA; po papo injasị ni fụla ja mabwe fịlinkuleka, ifụla jikalyandị̄sye kangi ukōneka pa kị̄su. 34Lelo bo Falao agịle ifụla, nifụla ja mabwe ni njasị fịlekịle alinkwandisya kangi ukutula inōngwa alinkujipelela ubukafụ indụ̄mbụla jāke jūjo nababōmbị bāke. 35Bo bụno buno indụ̄mbụla ja Falao jilinkuja ngafụ alinkusịta ukubạ̄bula abanya'Ịsịlaelị; bo mụno UNTWA alimmbūlị̄le.

Currently Selected:

Ukusōka 9: NYB96

Highlight

Copy