Ukusōka 6
6
1Po papo UNTWA alinkujoba kwa Mosa alinkuti: Lilino po kuja pakusịbona isị ngummbōmbelaga Falao. Ngumfịmbilisyaga kumaka ukuti abasōsye abāndu bāngu. Ngumfịmbilisyaga kumaka ịkubasosyaga abāndu bangu nkị̄su kyake.
Kyala ịkummbilikila Mose
2Po papo Kyala alinkujoba kwa Mose alinkuti: Une joune ne NTWA. 3Nalinsetukị̄le Abụlahamụ na Ịsịhaka, na Jakobụ ukuja ne Kyala ugwamaka gosa, lolị ngalị̄jobịle kumyabo ingamụ jangu ja bwịkemo, ukuja ne NTWA. 4Kangi nāfị̄ngịle nabo ulufị̄ngo, ukubapa ikị̄su kya Kanānị, ikị̄su iki bājēngịlemo ukuja bahēsya. 5Kangi mbilịke ukutamịgwa kwa bany'Ịsịlaelị aba abāndu ba mw'Egịpịtị bababīkịle mbutumwa, po lelo ngumbwịke ulufị̄ngo lwangu. 6Po papo lelo ubabūle abany'Ịsịlaelị ukuti: Une ne NTWA āngubābula mbutolwe ubu bali nabo mw'Egịpịtị, ngubābulaga mbutolwe ubu mụkukubilwa, nịkwịnulaga ikiboko kya kubapoka nukubafụ̄nda nubulōngị ubukulumba ab'Egịpịtị. 7Ngubēgaga ukuja bāndu bāngu, une ngujaga ne Kyala gwinụ; po mwịsakusyaganịaga ukuti une ne NTWA, ne Kyala gwinu, uju abapokịle mbutumwa ubu aba mw'Egịpịtị bābabōmbelaga. 8Po lelo nịsakubatwalaga kukị̄su iki nāfị̄ngịle ukuti ngubapaga, ngunnịngaga Abụlahamụ, na Ịsịhaka, na Jakobụ; nịkubapaga ukuja kyinụ. Une joune ne NTWA. 9Mose alinkubabūla sịsịsị abany'Ịsịlaelị; loli balinkusịta kumpilika Mose papo imyojo gyabo gyasụlụmēnịe kangi kunōngwa ja butumwa ubu bwabatamyaga.
10Po papo UNTWA alinkummbūla Mose alinkuti: 11Būka kammbūle Falao umalafyale gwa Egịpịtị ukuti abasōsye abany'Ịsịlaelị, basōkemo nkị̄su kyake. 12Lolị Mose ālyamwịle ku NTWA ātịle: Ukēte, abany'Ịsịlaelị bakālị̄ganịle ukupilikisya isị nābabūlaga; po Falao ịkwakumbilikisyaga bule bule, bo ngwakujobaga ne ngaja mmanyị ukujoba? 13Lolị UNTWA alinkubalagila ba Mose na Alonị alinkuti: Mụkababūle abany'Ịsịlaelị mukammbūle numalafyale gwa mw'Egịpịtị ukuti mbatumịle umwe kukubasōsya abany'Ịsịlaelị mw'Egịpịtị.
Ulubātiko lwa mụno fyakōnganịle ifịkolo fya Mose ni fịkolo fya Alonị
14Aba bo bakulūmba ba mụnyụ̄mba sya bị̄sabo: Abāna abanyambala ba Lubenị, umwana gwa Ịsịlaelị ugwa kipānda, bātịle: Henokị, Palụ, Heselonị na Kalimị; aba bo ba mfịkolo fya Lubenị. 15Abāna ba Sịmyonị abanyambala, bātịle: Jemwelị, Jamịnị, Ohatị, Jakini, Sohalị, na Syaulo, umwana unndumyana gwa nkịkulu UnKanānị; ifị fyo fịkolo fya Sịmyonị. 16Isị syo ngamụ sya bāna ba Lēbị abālumyāna ukukōngana ni ngulilo syabo: Gelịsonị, Kahatị na Melali, ifyinja fya bumị bwa Lēbị fyali mịa jumo na malōngo matatu nifyinja fịhāno na fịbili pamwanya (137). 17Abāna bā Gelịsonị abanyambala bo aba: Lịbịnị na Sịmeị; mụli bababa bāfụmịlemo abāndu bị̄ngị. 18Kohati ali nabāna abanyambala bāna: Amụlamụ, Ịsịhali, Hebulonị na Usyele; ifyinja fya būmị bwa Kohati fyali mịa jumo na malōngo matatu na fịtatu (133). 19Abāna ba Melali abanyambala bo aba: Mahịlị na Mụsị. Fyo fịkolo fya banya Lēbị ukukōngana ni ngulilo syabo. 20Amụlamụ ālimmwegịle Jakebetị ulịlūmbu gwa gwịse, alinkumpāpilamo Alonị na Mose. Amụlamụ āgonịle ifyinja mịa jumo na malōngo matatu na fịhāno na fịbili (137) 21Abāna abanyambala ba Ịsịhaka bātịle: Kola, Nefegị na Sịkịlị. 22Abāna ba Usyele abanyambala bali bo aba: Mịsaelị, Elịsafanị na Sịtịlị. 23Alonị ālimmwegịle Elịseba, umwana unndindwana gwa Amịnatabu ulịlūmbu gwa Nahasonị; alinkwenda nukumpāpilamo Natabu, Abịhụ, Elịjeselị, na Ịtamalị. 24Kola ali nabāna abanyambala batatu: Asịlị, Elịkana, na Abyasafụ. Ifị fyo fịkolo fya banya Kola. 25Elyasalị unnya Alonị ālimmwegịle umwana unndīndwana jumo mbāna ba Putyelị; alinkumpāpilamo Fịnehasị. Aba bo bakulūmba nnyụ̄mba sya banya Lēbị, mfịkolo fyabo.
26Ba Alonị na Mose bo aba UNTWA ābabūlịle ātịle: Mụkabasōsye bōsa abāfịkolo fya Ịsịlaelị ukufụma mw'Egịpịtị. 27Bababa bā Alonị na Mose bo aba bajagakujoba na Falao umalafyale gwa mw'Egịpịtị isya kubasōsya abany'Ịsịlaelị ukufụma mw'Egịpịtị.
Ululagilo lwa NTWA kwa ba Mose na Alonị
28Pịsịku ili UNTWA ājobaga na Mose nkị̄su kya mw'Egịpịtị. 29Alimmbūlịle Mose ātịle: Une ne NTWA, ukammbūle Falao umalafyale gwa mw'Egịpịtị syosa isị njobịle kumyako. 30Lolị Mose ālyamwịle ku NTWA ātịle: Ukēte, une ndi nndōndo mbujobi; po Falao ịkwakumbilikisyaga bule bule isị une ngwakummbūlaga?
Currently Selected:
Ukusōka 6: NYB96
Highlight
Share
Copy
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.
