Yohani 16

1“Nɨvavʉlile isio kuuti namʉngalʉlekaghe ʉlwɨtɨko lwinu. 2Avaanhu vikʉvadagagha mʉ masinagogi ghaave. Kange, ghukwisa ʉnsiki pano ʉmuunhu angavabude ʉmue, itisagha ɨkʉmʼbombela ʉNgʉlʉve. 3Vilikʉvavombelagha isio, ʉlwakʉva navankagwile ʉNhaata, kange navangʼhagwile ʉne. 4Nɨvavʉlile isi kuuti ʉnsiki ʉghuo ghuliiva ghʉfikile, mʉkʉmbʉkaghe kuuti nɨlyavavʉlile. Nanɨlyavavʉlile isi ʉlʉtasi, ʉlwakʉva nɨlyale palɨkɨmo numue.

Ɨmbombo ɨja Mhepo ʉMwɨmɨke

5“Lɨno, nilʉta kwa jʉno alyasungʼhile ʉne kʉlyʉmue. Asi, napwale nambe jʉmo pakate palyʉmue jʉno ɨkʉmhosia kuuti, ‘Ghulʉta kʉʉghi?’ 6Neke ʉlwakʉva nɨvavʉlile isio, mʉsukuniile fiijo.

7“Nɨkʉvavʉʉla isa kyangʼhaani kuuti, luuva lʉnofu kʉlyʉmue ʉne nɨvʉʉke, ʉlwakʉva nɨngaleke pivʉʉka ʉNtangɨli nailikwisa. Looli nɨngalʉte, nilikʉnsuungʼha kʉlyʉmue. 8ɄNtangɨli ʉjuo iliiva isile, ɨkʉvahʉfyagha avaanhu ava mʉ ɨɨsi ʉvʉhosi vwave, ʉvʉgholofu vwango nʉ vʉhɨghi vwa Ngʉlʉve. 9Ɨkʉvahʉfyagha ʉvʉhosi vwave, ʉlwakʉva navikʉnyɨtɨka ʉne. 10Ɨkʉvahʉfia ʉvʉgholofu vwango, ʉlwakʉva nilʉta kwa Nhaata, namulikʉnyaagha kange. 11Ɨkʉvahʉfyagha ʉvʉhɨghi vwa Ngʉlʉve, ʉlwakʉva ʉNgʉlʉve amalile kʉkʉmhɨgha ʉSetano ʉmʼbaha ghwa ɨɨsi ɨjɨ.

12“Napano nɨjiighe naso nyinga isa kʉvavʉʉla, neke nanɨkʉvavʉʉla, ʉlwakʉva ʉnsiki ʉghʉ namʉngasitangʼhanie. 13Looli ʉMhepo ʉjuo jʉno ihʉfia ʉvwakyangʼhaani iliiva isile, ilikʉvalongosia kuvɨngɨlɨla ʉvwakyangʼhaani. Ʉmwene naijovagha mʉ vʉtavʉlɨlua vwake jʉjuo, looli ijovagha sino apʉliike na kʉkʉvavʉʉla sino sikwisa. 14Ʉmwene ihʉfyagha ʉvʉvaha vwango, ʉlwakʉva ɨkʉvavʉlagha sino ʉpiile kʉlyʉne. 15Fyoni fino alɨ nafyo ʉNhaata, fyango. Fye nambe nɨvavʉlile kuuti, ʉMhepo ʉjuo ɨkʉvavʉlagha sino ʉpiile kuhʉma kʉlyʉne.”

Ʉlʉsukunalo lulihambʉka lʉkeelo

16ɄYesu akavavʉʉla kange akati, “Ghʉsighiile ʉnsiki nʼdebe namʉkʉnyaagha, neke pambele ʉnsiki nʼdebe mʉkʉnyaagha.”

17Vamo mʉ vavʉlanɨsɨvua vaake vakava viposania viiti, “Asi, kwekʉti kɨki pano iiti, ‘Ghʉsighiile ʉnsiki nʼdebe namʉkʉnyaagha, neke pambele ʉnsiki nʼdebe mʉkʉnyaagha’? Na pano iiti, ‘Ʉlwakʉva nilʉta kwa Nhaata’?” 18Vakava vifiposania viiti, “Kwekʉti kɨki pano iiti, ‘Ghʉsighiile ʉnsiki nʼdebe’? Natʉsitangʼhinie isi sino ijova.”

19ɄYesu akakagʉla kuuti vilonda kʉkʉmposia sino ajovile, pe akati, “Muposania sino nɨjovile kuuti, ‘Ghʉsighiile ʉnsiki nʼdebe namʉkʉnyaagha, neke pambele ʉnsiki nʼdebe mʉkʉnyaagha’? 20Kyangʼhaani nɨkʉvavʉʉla, ʉmue mulilɨla na kusukunala, neke avaanhu ava mʉ ɨɨsi vilihovoka. Mulisukunala, neke pambele ʉlʉsukunalo lwinu lulihambʉka lʉkeelo. 21Ʉmʉkɨjʉʉva pano ipaapa, iiva nʉ lʉsukunalo ʉlwakʉva alɨ nʉ vʉvafi. Neke kyande apapile, naikʉmbʉka kange ʉvʉvafi ʉvuo, ʉlwakʉva iiva nʉ lʉkeelo ʉlwa kuuva nʉ mwana. 22Na jʉmue mʉlɨ nʉ lʉsukunalo lɨno, neke nilikwisa kange kʉlyʉmue, apuo muliiva nʉ lʉkeelo. Nakwale jʉno ilivʉsia ʉlʉkeelo ʉluo kʉlyʉmue.

23“Kange, ʉnsiki ʉghuo ghuliiva ghʉfikile, namulikʉmhosia kɨmonga. Kyangʼhaani nɨkʉvavʉʉla, mʉngansʉʉme kɨmonga ʉNhaata mʉ lɨtavua lyango, ɨkʉvapeela. 24Kuhanga ʉnsiki ʉghʉ namʉnsʉmile kɨmonga mʉ lɨtavua lyango. Mʉsʉmaghe mupelua, neke ʉlʉkeelo lwinu lʉkwɨlane.

ɄYesu ɨkʉjɨlefia ɨɨsi

25“Nɨjovile isio numue mʉ fihwanɨkɨsio, neke ghukwisa ʉnsiki ghʉno nanijovagha numue kange mʉ fihwanɨkɨsio. Looli nijovagha numue pa vʉvalafu imhola sa Nhaata. 26Ʉnsiki ʉghuo musʉmagha mʉ lɨtavua lyango. Naniiti ʉne nɨkʉvasʉmɨlagha kwa Nhaata, jeeje! 27ɄNhaata jʉjuo avaghanile ʉmue, ʉlwakʉva mʉnganile ʉne, kange mukwɨtɨka kuuti nɨhʉmile kwa Ngʉlʉve. 28Nɨlyahʉmile kwa Nhaata, nɨkiisa mʉ ɨɨsi muno. Lɨno, nivʉʉka mʉ ɨɨsi muno, nigomoka kwa Nhaata.”

29Avavʉlanɨsɨvua vaake vakati, “Lɨno, ghujova pa vʉvalafu, naghujova mʉ fihwanɨkɨsio. 30Lɨno tʉkagwile kuuti, ʉve ʉsikagwile sooni, nakʉlɨ vʉfumbue vwa muunhu kʉkʉkʉposia lʉmonga. Mʉ ʉluo tukwɨtɨka kuuti ʉlyahʉmile kwa Ngʉlʉve.” 31ɄYesu akavaposia akati, “Lɨno mukwɨtɨka? 32Ʉnsiki ghʉlɨ piipi, kange ghʉfikile, ʉnsiki ghʉno ʉmue mupalasana nʉjʉnge ilʉta kwa mwene na kʉkʉndeka ne mwene. Neke ʉne nanɨlɨ ne mwene, ʉlwakʉva ʉNhaata alɨ palɨkɨmo nuune. 33Nɨkʉvavʉʉla isi kuuti mʉʉve nʉ lʉtengaano, ʉlwakʉva mʉlɨ nkate mʉlyʉne. Pa ɨɨsi apa mʉlɨ ni mhumuko, neke namʉngoghopaghe ʉlwakʉva ʉne nɨjɨlefisie ɨɨsi.”

Currently Selected:

Yohani 16: wbi

Highlight

Copy