Yohani 15

ɄYesu ghwe nsabibu ghwa kyangʼhaani

1ɄYesu akati, “Ʉne neene nsabibu ghwa kyangʼhaani, ʉNhaata ghwe jʉno ilɨma ʉmʉghʉnda. 2Ɨlɨtaafi mʉlyʉne lɨno nalikoma ifipeke, ʉNhaata ɨkʉlɨvʉsia. Looli lɨno likoma, ɨkʉlɨnosia vʉnofu kuuti lɨkome fiijo. 3Ʉmue mʉnosivue vwɨmɨla amasio ghano nɨkavavʉlile. 4Mukalaghe nkate mʉlyʉne, na jʉʉne nikukalagha nkate mʉlyʉmue. Ɨlɨtaafi nalɨngakome ifipeke nave nalikukala mʉ nsabibu, fye lʉlɨvuo, na jʉmue namʉngakome ifipeke nave namukukala nkate mʉlyʉne.

5“Ʉne nɨlɨ nsabibu, ʉmue mʉlɨ mataafi. Jʉno ikukala nkate mʉlyʉne, na jʉʉne mwa mwene, ʉjuo ikomagha fiijo ifipeke, ʉlwakʉva kɨsila kuuva nkate mʉlyʉne, namʉngavombe kɨmonga. 6Ʉmuunhu jʉno naikukala nkate mʉlyʉne itaghua, ndavʉle ɨlɨtaafi lɨno nalikoma vʉle litaghua na kukwʉma, avaanhu vihola na kunyaanya. 7Nave mujigha mukukala nkate mʉlyʉne na masio ghango ghikale mʉlyʉmue, mʉsʉmaghe kwa Nhaata kɨno mulonda, ghwope ɨkʉvapeela. 8Pano mukoma fiijo ifipeke, ʉNhaata ghwango ighinisivua fiijo. Kange, muuva muhʉfia kuuti ʉmue mʉlɨ vavʉlanɨsɨvua vango kyangʼhaani.

9“Ndavʉle ʉNhaata vʉle anganile ʉne, enendɨɨkɨ na jʉʉne nɨvaghanile ʉmue. Lɨno, mukalaghe mʉ lʉghano lwango. 10Nave muvɨngɨlɨla sino nɨkʉvalaghɨla, apuo mukukala mʉ lʉghano lwango, ndavʉle ʉne vʉle nɨkʉsivɨngɨlɨla sino ʉNhaata andaghiile na kukukala mʉ lʉghano lwake.

11“Nɨvavʉlile isio kuuti mʉʉve nʉ lʉkeelo ndavʉle ʉne, kange mʉʉve nʉ lʉkeelo ʉlʉvaha fiijo. 12Lɨno nɨkʉvalaghɨla kuuti, mʉghananaghe ndavʉle ʉne vʉle nɨvaghanile ʉmue. 13Nakwelʉle ʉlʉghano ʉlʉkome fiijo, ndavʉle ʉlʉghano ʉlwa muunhu kukutavʉla kufua vwɨmɨla ʉmmanyaani ghwake. 14Nave muvomba sino nɨvalaghiile, ʉmue mʉlɨ vamanyaani vango. 15Lɨno, nanɨkʉvatambʉla vakami vango, ʉlwakʉva ʉnkami naikagʉla sino ivomba ʉntwa ghwake. Looli nɨkʉvatambʉla ʉmue kuuti mʉlɨ vamanyaani vango, ʉlwakʉva nɨvavʉlile sooni sino nɨpʉliike kuhʉma kwa Nhaata. 16Ʉmue namʉlyasalwile ʉne, looli ʉne nɨlyavasalwile ʉmue. Nɨlyavasalwile kuuti mʉlʉte kukoma ifipeke, ifipeke fino nafisila lʉsiku. Ghwope ʉNhaata kɨno mʉkʉnsʉʉma mʉ lɨtavua lyango, ɨkʉvapeela. 17Lɨno nɨkʉvalaghɨla ʉmue kuuti, mʉghananaghe.

Avaanhu ava mʉ ɨɨsi ɨjɨ vikʉvakalalɨla avɨtɨki va Yesu

18“Nave avaanhu ava mʉ ɨɨsi muno, vikʉvakalalɨla ʉmue, mʉkagʉlaghe kuuti valyatalile kʉkʉngʼhalalɨla ʉne. 19Mwale mʉʉve vaanhu va mʉ ɨɨsi muno, avaanhu avuo vale vikʉvaghana, ʉlwakʉva mʉlɨ vaanhu vaave. Neke ʉmue nɨvasalwile kuhʉma mʉ ɨɨsi muno, lɨno ʉmue namʉlɨ va mʉ ɨɨsi. Mʉ ʉluo avaanhu ava mʉ ɨɨsi vikʉvakalalɨla. 20Mʉkʉmbʉkaghe ɨlɨsio lɨno nɨlyavavʉlile kuuti, ‘Ʉnkami namʼbaha kukila ʉntwa ghwake.’ Lɨno, nave vakamhumwisie ʉne, na jʉmue vikʉvapumusia. Nave vakɨtiike imbʉlanɨsio sango, nasi siinu vikwɨtɨka. 21Vikʉvavombelagha isio sooni, ʉlwakʉva mʉkʉmbɨngɨlɨla ʉne, kange ʉlwakʉva navammanyile jʉno asungʼhile ʉne. 22Nale nɨleke kukwisa na kujova navo, navaale viiva vahosi vwɨmɨla kʉkʉngʼhaana ʉne. Neke lɨno navangakaane vwɨmɨla ʉvʉhosi vwave kuuti navalyakagwile lʉmonga.

23“Ʉmuunhu jʉno ɨkʉngʼhalalɨla ʉne, ɨkʉnkalalɨla najʉ Nhaata ghwango. 24Nɨvombile ifidegho ifivaha, fino nambe muunhu naaghelile kuvomba. Vale valeke kʉkʉfyagha, ngale vasila vʉhosi ʉvwa kʉngʼhaana ʉne. Nambe vafyaghile fyoni fino nɨvombile, vajiighe vikʉngʼhalalɨla ʉne najʉ Nhaata. 25Vavombile isio, kukwɨlanɨsia aMalembe aMɨmɨke ghano ghiiti, ‘Vakangʼhalaliile vʉvʉle.’#Sabuli 35:19; 69:4

26“Nɨkʉnsuungʼha kʉlyʉmue ʉNtangɨli kuhʉma kwa Nhaata. ɄNtangɨli ʉjuo ghwe Mhepo jʉno ihʉfia ʉvwakyangʼhaani, ʉmwene ikwolekagha ʉvwakyangʼhaani vwango. 27Na jʉmue mukwolekagha imhola sango, ʉlwakʉva mʉlɨ palɨkɨmo nuune kuhʉma ye nitengʉla ɨmbombo.

Currently Selected:

Yohani 15: wbi

Highlight

Copy