Popular Bible Verses from Yohani 15

Share

“Ʉne nɨlɨ nsabibu, ʉmue mʉlɨ mataafi. Jʉno ikukala nkate mʉlyʉne, na jʉʉne mwa mwene, ʉjuo ikomagha fiijo ifipeke, ʉlwakʉva kɨsila kuuva nkate mʉlyʉne, namʉngavombe kɨmonga.

Mukalaghe nkate mʉlyʉne, na jʉʉne nikukalagha nkate mʉlyʉmue. Ɨlɨtaafi nalɨngakome ifipeke nave nalikukala mʉ nsabibu, fye lʉlɨvuo, na jʉmue namʉngakome ifipeke nave namukukala nkate mʉlyʉne.

Nave mujigha mukukala nkate mʉlyʉne na masio ghango ghikale mʉlyʉmue, mʉsʉmaghe kwa Nhaata kɨno mulonda, ghwope ɨkʉvapeela.

Ʉmue namʉlyasalwile ʉne, looli ʉne nɨlyavasalwile ʉmue. Nɨlyavasalwile kuuti mʉlʉte kukoma ifipeke, ifipeke fino nafisila lʉsiku. Ghwope ʉNhaata kɨno mʉkʉnsʉʉma mʉ lɨtavua lyango, ɨkʉvapeela.

Nakwelʉle ʉlʉghano ʉlʉkome fiijo, ndavʉle ʉlʉghano ʉlwa muunhu kukutavʉla kufua vwɨmɨla ʉmmanyaani ghwake.

Ɨlɨtaafi mʉlyʉne lɨno nalikoma ifipeke, ʉNhaata ɨkʉlɨvʉsia. Looli lɨno likoma, ɨkʉlɨnosia vʉnofu kuuti lɨkome fiijo.

Lɨno nɨkʉvalaghɨla kuuti, mʉghananaghe ndavʉle ʉne vʉle nɨvaghanile ʉmue.

Pano mukoma fiijo ifipeke, ʉNhaata ghwango ighinisivua fiijo. Kange, muuva muhʉfia kuuti ʉmue mʉlɨ vavʉlanɨsɨvua vango kyangʼhaani.

ɄYesu akati, “Ʉne neene nsabibu ghwa kyangʼhaani, ʉNhaata ghwe jʉno ilɨma ʉmʉghʉnda.

Ʉmuunhu jʉno naikukala nkate mʉlyʉne itaghua, ndavʉle ɨlɨtaafi lɨno nalikoma vʉle litaghua na kukwʉma, avaanhu vihola na kunyaanya.

“Nɨvavʉlile isio kuuti mʉʉve nʉ lʉkeelo ndavʉle ʉne, kange mʉʉve nʉ lʉkeelo ʉlʉvaha fiijo.

Nave muvɨngɨlɨla sino nɨkʉvalaghɨla, apuo mukukala mʉ lʉghano lwango, ndavʉle ʉne vʉle nɨkʉsivɨngɨlɨla sino ʉNhaata andaghiile na kukukala mʉ lʉghano lwake.

Lɨno nɨkʉvalaghɨla ʉmue kuuti, mʉghananaghe.

Mwale mʉʉve vaanhu va mʉ ɨɨsi muno, avaanhu avuo vale vikʉvaghana, ʉlwakʉva mʉlɨ vaanhu vaave. Neke ʉmue nɨvasalwile kuhʉma mʉ ɨɨsi muno, lɨno ʉmue namʉlɨ va mʉ ɨɨsi. Mʉ ʉluo avaanhu ava mʉ ɨɨsi vikʉvakalalɨla.