Yohani 14

Ɨsɨla ɨja kʉlʉta kwa Ngʉlʉve

1ɄYesu akavavʉʉla avavʉlanɨsɨvua vaake akati, “Namʉngasaghaghe mʉ moojo ghiinu. Mʉmwɨtɨkaghe ʉNgʉlʉve, mʉnyɨtɨkaghe na jʉʉne. 2Ʉvukalo kwa Nhaata ghwango vweleefu, vwale vʉleke kuuva vweleefu, nanaale nɨkʉvavʉʉla kuuti nilʉta kʉkʉvalɨngʼhanɨkɨsia ʉvukalo.#14:2 Vwale vʉleke kuuva vweleefu, nanaale nɨkʉvavʉʉla kuuti nilʉta kʉkʉvalɨngʼhanɨkɨsia ʉvukalo: Ifitabu ifingi valembile vatiile, vwale vʉleke kuuva enendɨkio nale nɨkʉvavʉʉla kuuti nilʉta kʉkʉvalɨngʼhanɨkɨsia ʉvukalo. 3Nɨngalʉte kʉkʉvalɨngʼhanɨkɨsia ʉvukalo, nigomoka kʉkʉvatoola, neke pano pwenɨlɨ ʉne na jʉmue pwemʉvisaghe. 4Kʉno nilʉta, ɨsɨla mʉjɨkagwile.”

5ɄTomasi akati kwa Yesu, “Ghwe Mʉtwa, ʉsue natʉkagwile kʉno ghulʉta. Lɨno, ndepoonu tʉkʉjɨkagʉla ndaani ɨsɨla?” 6ɄYesu akamwamʉla akati, “Ʉne neene sɨla, neene vwakyangʼhaani, kange neene vwʉmi. Nakwale jʉno ifika kwa Nhaata kɨsila kʉkilila kʉlyʉne. 7Mwale mʉngʼhagʉle ʉne, mwale mʉkʉnkagʉla najʉ Nhaata ghwango. Kuhʉma lɨno, mʉnkagwile, kange mʉmwaghile.”

8ɄFilipo akati, “Ghwe Mʉtwa, ʉtʉsoone ʉNhaata. Ʉngatʉsoone ghuuva ʉmalile sooni.” 9ɄYesu akamwamʉla akati, “Filipo, nikalile numue ifighono fyoni ifi, nʉngʼhagwile? Ʉmuunhu jʉno anyaghile ʉne, amwaghile ʉNhaata. Lɨno kɨki ghwiti, ‘Ʉtʉsoone ʉNhaata’? 10Asi, naghukwɨtɨka kuuti ʉne nɨlɨ nkate mwa Nhaata, ghwope ʉNhaata alɨ nkate mʉlyʉne? Amasio ghano nɨkʉvavʉʉla, nanijova mʉ vʉtavʉlɨlua vwango, looli ʉNhaata jʉno alɨ nkate mʉlyʉne, ghwe jʉno ivomba imbombo saake isi.

11“Mʉnyɨtɨke ʉne, kuuti nɨlɨ nkate mwa Nhaata, ghwope ʉNhaata alɨ nkate mʉlyʉne. Neke nave namukwɨtɨka sino nijova, mwɨtɨkaghe vwɨmɨla imbombo sino nivomba. 12Kyangʼhaani nɨkʉvavʉʉla, jʉno ɨkʉnyɨtɨka ʉne, ivombagha imbombo sino nivomba ʉne. Kange, ivombagha imbaha kukila isi, ʉlwakʉva nilʉta kwa Nhaata. 13Mʉngasʉʉme kɨmonga mʉ lɨtavua lyango, nivomba. Mʉ ʉluo, nihʉfia ʉvʉvaha vwa Nhaata. 14Mʉngasʉʉme kɨmonga mʉ lɨtavua lyango, nivomba.”

ɄYesu ijova kukwisa kwa Mhepo ʉMwɨmɨke

15ɄYesu akavavʉʉla avavʉlanɨsɨvua vaake akati, “Nave mʉnganile, muvɨngɨlɨlagha indaghɨlo sango. 16Pe na jʉʉne nɨkʉnsʉʉma ʉNhaata, ghwope ɨkʉvapeela ʉNtangɨli ʉjʉnge, ikalaghe numue ifighono fyoni. 17ɄNtangɨli ʉjuo ghwe Mhepo jʉno ihʉfia ʉvwakyangʼhaani. Neke avaanhu vano navikʉmwɨtɨka ʉNgʉlʉve navangamwʉpɨle ʉMhepo ʉjuo, ʉlwakʉva navikʉmwagha, kange navankagwile. Looli ʉmue mʉnkagwile ʉlwakʉva ikukala numue, kange iiva nkate mʉlyʉmue.

18“Nanɨngavaleke mwe veene hwene mʉlɨ vapɨɨna, nikwisa kange kʉlyʉmue. 19Ghʉsighiile ʉnsiki nʼdebe avaanhu vano navikʉmwɨtɨka ʉNgʉlʉve, navanganyaaghe kange. Looli ʉmue mulikʉnyaagha kange. Ʉlwakʉva ʉne nɨlɨ mwʉmi, na jʉmue muuva vʉʉmi. 20Ɨkɨghono kɨla mulikagʉla kuuti ʉne nɨlɨ nkate mwa Nhaata, na jʉmue mʉlɨ nkate mʉlyʉne, na jʉʉne nɨlɨ nkate mʉlyʉmue. 21Ʉmuunhu jʉno ikwʉpɨla indaghɨlo sango na kʉkʉsivɨngɨlɨla, ʉjuo ghwe jʉno anganile. Jʉno anganile, ghwope ʉNhaata ɨkʉmʉghana ʉmwene. Na jʉʉne nɨkʉmʉghana na kukuhʉfia kwa mwene.”

22Pe ʉmʼbʉlanɨsɨvua jʉmonga jʉno akatambʉlwagha Yuuda, ʉjʉ naghwe Yuuda ʉIsikalioti, akamposia ʉYesu akati, “Ghwe Mʉtwa, lwandaani ghulikuhʉfia kʉlyʉsue, neke naghulikuhʉfia kʉ vano navikʉkwɨtɨka?” 23ɄYesu akamwamʉla akati, “Ʉmuunhu jʉno anganile ivomba sino nɨkʉmʼbʉʉla, ghwope ʉNhaata ɨkʉmʉghana ʉmwene. Ʉne nʉ Nhaata tukwisa kwa mwene, na kukukala palɨkɨmo nʉ mwene. 24Neke jʉno naanganile, naivomba sino nɨkʉmʼbʉʉla. Kange, sino nɨkʉmʼbʉʉla nasango, looli sa Nhaata jʉno asungʼhile.

25“Nɨvavʉlile sooni isio pano nɨjiighe palɨkɨmo numue, 26neke ʉNtangɨli ʉjuo, ʉMhepo ʉMwɨmɨke jʉno ʉNhaata ɨkʉnsuungʼha mʉ lɨtavua lyango, ghwe ɨkʉvavʉlanɨsyagha na kʉkʉvakʉmbʉsia sooni sino nɨvavʉlile. 27Nɨkʉvapeela ʉlʉtengaano lwango. Ʉlʉtengaano ʉlʉ lʉno nɨkʉvapeela, nalʉlɨ ndavʉle lʉno luhʉma kʉ vaanhu ava mʉ ɨɨsi. Namʉngapumukaghe mʉ moojo ghiinu, nambe kukwoghopa kɨmonga. 28Mʉkamhʉliike ye nijova kuuti, ‘Nilʉta, neke nigomoka kange kʉlyʉmue.’ Nave mʉnganile kyangʼhaani, mwale muhovoka kuuti nilʉta kwa Nhaata, ʉlwakʉva ʉNhaata mʼbaha kukila ʉne.

29“Nɨvavʉlile isi lɨno pano sikyale kuvoneka, neke kyande sivoniike, mwɨtɨke. 30Nanɨngajove numue kange amasio minga, ʉlwakʉva ʉSetano ʉmʼbaha ghwa ɨɨsi ɨjɨ ikwisa. Neke nsila ngʉfu kʉlyʉne. 31Nivomba ndavʉle andaghiile ʉNhaata, neke avaanhu ava mʉ ɨɨsi vakagʉle kuuti nɨmʉghanile. Lɨno, mwɨme tʉlʉtaghe.”

Currently Selected:

Yohani 14: wbi

Highlight

Copy