Yohani 17

ɄYesu ikufuunya

1ɄYesu ye amalile kujova isio, akalola kʉkyanya akati, “Nhaata, akavalɨlo kafikile! Ʉnginie ne mwanaako, neke na jʉʉne nɨkʉghinie ʉve, 2ʉlwakʉva ʉmheliile ʉvʉtavʉlɨlua ʉvwa kʉvalongosia avaanhu vooni, neke avaanhu vooni vano ʉmheliile nɨvapeele ʉvwʉmi ʉvwa kʉvʉsila kʉsila. 3Ʉvwʉmi ʉvwa kʉvʉsila kʉsila vwe ʉvʉ: Vakʉkagʉle ʉve ghwe Ngʉlʉve ghwe jʉno ʉlɨ jʉmo mwene ghwa kyangʼhaani, kange vangʼhagʉle ʉne ne Yesu Kɨlɨsite ne jʉno ʉsungʼhile kʉ veene. 4Ʉne nɨkʉghinisie pa ɨɨsi apa mʉlwa kʉmala ɨmbombo jɨla jɨno ʉlyamheliile. 5Lɨno ghwe Nhaata, ʉmheele ʉvʉvaha pamaaso ghaako, ndavʉle nɨlyale navwo ye nɨlɨ palɨkɨmo nuuve ɨɨsi ye jɨkyale kupelua.

ɄYesu ɨkʉvasʉmɨla avavʉlanɨsɨvua vaake

6“Ghwe Nhaata, avaanhu vano ʉlyamheliile mʉ ɨɨsi, nɨvahʉfisie ʉvʉvaha vwako. Avaanhu avuo valyale vaako, ʉkamheela ʉne, voope valɨgadɨliile ɨlɨsio lyako. 7Lɨno vakagwile kuuti, fyoni fino ʉmheliile fihʉmile kʉlyʉve, 8ʉlwakʉva ɨmhola jɨno ʉkamheliile nɨvapeliile, voope vʉpiile. Vakagwile kuuti kyangʼhaani nɨhʉmile kʉlyʉve, kange vɨtiike kuuti ʉve veeve ʉlyasungʼhile ʉne.

9“Ʉne nanɨkʉvasʉmɨla avaanhu vooni mʉ ɨɨsi, looli nɨkʉvasʉmɨla vano ʉlyamheliile, ʉlwakʉva avuo ve vaako. 10Avaanhu vango vooni, vaako; avaanhu vaako, vango. Ʉvʉvaha vwango vʉvoniike kukilila aveene. 11Ʉne lɨno nivʉʉka mʉ ɨɨsi, nikwisa kʉlyʉve, neke aveene vajiighe mʉ ɨɨsi. Ghwe Nhaata ghwe Mwɨmɨke, ʉvalolelelaghe mʉ ngʉfu isa lɨtavua lyako lɨno ʉlyamheliile. Ʉvalolelelaghe kuuti vaave vʉmo ndavʉle ʉne nuuve vʉle tʉlɨ vʉmo. 12Ye nɨlɨ palɨkɨmo na veene, navalolelelagha mʉ ngʉfu isa lɨtavua lyako lɨno ʉlyamheliile. Nɨvadɨmile, nakwale nambe jʉmo jʉno asovile, looli jʉno akanoghiile kusova kukwɨlanɨsia sino silyalembilue mʉ Malembe aMɨmɨke.#Sabuli 41:9

13“Lɨno nikwisa kʉlyʉve, nijova amasio agha pano nɨjiighe mʉ ɨɨsi, kuuti avavʉlanɨsɨvua vango vavisaghe nʉ lʉkeelo mʉ moojo ghaave ndavʉle nɨlɨ nalwo ʉne. 14Nɨvavʉlile ɨlɨsio lyako, neke avaanhu mʉ ɨɨsi vavakalaliile, ʉlwakʉva avavʉlanɨsɨvua vango nava mʉ ɨɨsi ndavʉle ʉne vʉle nanɨlɨ ghwa mʉ ɨɨsi.

15“Ʉne nanɨkʉkʉsʉʉma kuuti ʉvavʉsie mʉ ɨɨsi muno, looli nisʉʉma ʉvalolelelaghe nʉ Mhosi ʉSetano. 16Aveene nava mʉ ɨɨsi, ndavʉle ʉne vʉle nanɨlɨ ghwa mʉ ɨɨsi. 17Ghwe Nhaata, ɨlɨsio lyako vwe vwakyangʼhaani, lɨno nɨkʉkʉsʉʉma ʉvavalasie avaanhu vaako nʉ vwakyangʼhaani. 18Ndavʉle ʉlyasungʼhile ʉne mʉ ɨɨsi, na jʉʉne fye nɨvasungʼhile mʉ ɨɨsi. 19Nikutavʉla lwoni kʉlyʉve vwɨmɨla aveene, neke aveene vavalasɨvue nʉ vwakyangʼhaani.

ɄYesu ɨkʉvasʉmɨla vano vikʉmwɨtɨka

20“Nanɨkʉvasʉmɨla va vavʉlanɨsɨvua veene, looli nɨkʉvasʉmɨla na vano vilikʉnyɨtɨka vwɨmɨla kupʉlɨsɨvua na veene. 21Nisʉʉma vooni avuo vavisaghe vʉmo, vavisaghe nkate mʉlyʉsue, ndavʉle ʉve vʉle ʉlɨ nkate mʉlyʉne na jʉʉne nɨlɨ nkate mʉlyʉve. Nisʉʉma ʉluo, neke avaanhu vɨtɨke kuuti ʉve veeve ʉsungʼhile ʉne. 22Ʉvʉvaha vʉno ʉlyamheliile, na jʉʉne nɨvapeliile aveene, neke vavisaghe vʉmo, ndavʉle ʉne vʉle nɨlɨ vʉmo nuuve. 23Ʉne nɨɨve nkate mʉ veene, na jʉʉve nkate mʉlyʉne neke vaave nʉ vʉmo ʉvʉkwɨlanɨfu. Lʉʉve enendɨɨkɨ neke avaanhu avange vakagʉle kuuti, ʉve veeve ʉlyasungʼhile ʉne, na kuuti avaanhu vano ʉlyamheliile, ʉvaghanile ndavʉle ʉnganile ʉne.

24“Ghwe Nhaata, nilonda kuuti, avaanhu vano ʉmheliile vavisaghe palɨkɨmo nuune pooni pano niiva, neke vavwaghe ʉvʉvaha vwango vʉno ʉlyamheliile, ʉlwakʉva ʉlyanganile kuhʉma ɨɨsi ye jɨkyale kupelua. 25Ghwe Nhaata ghwe ghwa kyangʼhaani, avaanhu ava mʉ ɨɨsi navakʉkagwile, neke ʉne nɨkʉkagwile. Kange, avavʉlanɨsɨvua vango vakagwile kuuti ʉve veeve ʉlyasungʼhile. 26Nɨvahʉfisie ʉvʉvaha vwako, kange nifivombagha ʉluo kuuti vavaghanaghe avange ndavʉle ʉnganile ʉne, na jʉʉne nɨɨve nkate mʉ veene.”

Currently Selected:

Yohani 17: wbi

Highlight

Copy