Yohani 18

ɄYesu ikolua

(Mataayi 26:47-56; Malɨka 14:43-50; Lʉʉka 22:47-53)

1ɄYesu ye amalile pikufuunya, akavʉʉka palɨkɨmo na vavʉlanɨsɨvua vaake, vakakila ʉlʉvonde ʉlwa Keduloni, vakingila mʉ mʉghʉnda ʉghwa miseituni. 2ɄYuuda ʉnya kʉmwohela ʉYesu, alyaghʉmanyile ʉmʉghʉnda ʉghuo, ʉlwakʉva kekinga ʉYesu na vavʉlanɨsɨvua vaake vakakongʼhanagha apuo. 3Pe akakɨlongosia ɨkɨpʉgha ɨkya vasikali ava Kɨlooma na vasikali avaloleleli kuhʉma kʉ vavaha va vatekesi na kʉ Vafalisayi, akalʉta navo mʉ mʉghʉnda kʉmo vakolile itaala, imuli ni filwɨlo.

4ɄYesu alyakagwile sooni sino kyasikʉmwagha, akalʉta kʉ veene, akavaposia akati, “Mʉkʉmʉlonda veeni?” 5Pe aveene vakamwamʉla vakati, “Tʉkʉmʉlonda ʉYesu ʉmhʉma kʉ Nasaleti.” ɄYesu akavavʉʉla akati, “Neene.” ɄYuuda ʉmwohesi alyɨmile palɨkɨmo na vaanhu avuo. 6ɄYesu ye avavʉlile kuuti, “Neene,” vakagomoka kɨnsanansana, vakaghua. 7ɄYesu akavaposia kange akati, “Mʉkʉmʉlonda veeni?” Vakamwamʉla vakati, “Tʉkʉmʉlonda ʉYesu ʉMʉnasaleti.” 8ɄYesu akavavʉʉla akati, “Nɨvavʉlile kuuti neene. Lɨno, nave mʉkʉndonda ʉne, mʉvaleke ava valʉtaghe.” 9ɄYesu alyajovile enendɨɨkɨ kukwɨlanɨsia sino alyajovile kuuti, “Vano ʉlyamheliile, nanɨnsofisie nambe jʉmo.”#Yohani 17:12

10ɄSimoni ʉPeteli alyale nɨ bamba, akasomola ɨbamba jɨla, akantova ʉnkami ʉghwa ntekesi ʉmʼbaha, akanʼdumula ɨmbulughutu ɨja kʉndio. Ʉnkami ʉjuo akatambʉlwagha Maluko. 11Neke ʉYesu akamʼbʉʉla ʉPeteli akati, “Gomosia ɨbamba jaako mʉ nyambe jaake. Ʉne nɨnoghiile kukwʉpɨla ʉlʉpumuko lʉno ʉNhaata andɨngʼhanɨkisie.”#18:11 Ʉne nɨnoghiile kukwʉpɨla ʉlʉpumuko lʉno ʉNhaata andɨngʼhanɨkisie: Mʉ Kɨyunaani lɨlembilue, Asi, ɨkɨkombe kɨno amheliile ʉNhaata, nanɨnganywele?

ɄYesu itwalua kwa ntekesi ʉmʼbaha ʉHanasi

(Mataayi 26:57-58; Malɨka 14:53-54; Lʉʉka 22:54)

12Avasikali vala nʉ mʼbaha ghwave na vavombi avaloleleli va valongosi va Vayahudi vakankola ʉYesu, vakankʉnga. 13Vakantwala taasi kwa Hanasi, ʉnkwive ghwa Kayafa. ɄKayafa ʉjuo alyale ghwe ntekesi ʉmʼbaha ʉnsiki ʉghuo. 14Kange, ghwe jʉno alyavavʉlile aVayahudi kuuti, lʉnoghiile ʉmuunhu jʉmo afue vwɨmɨla avaanhu viitu.#Yohani 11:50

ɄPeteli ɨkʉnkaana ʉYesu

(Mataayi 26:58, 69-70; Malɨka 14:54, 66-68; Lʉʉka 22:55-57)

15ɄSimoni ʉPeteli nʉ mʼbʉlanɨsɨvua ʉjʉnge vakava vikʉmʼbɨngɨlɨla ʉYesu mʉmbele. Ʉmʼbʉlanɨsɨvua ʉjʉnge ʉjuo, alyakagʉliike nʉ ntekesi ʉmʼbaha, fye nambe akingila palɨkɨmo nʉ Yesu mʉ lʉvɨɨka ʉlwa ntekesi ʉmʼbaha. 16Neke ʉPeteli akɨɨma panji pa mʉlyango. Ʉmʼbʉlanɨsɨvua ʉjʉnge jʉla jʉno alyakagʉliike nʉ ntekesi ʉmʼbaha, akahʉma panji, akajova nʉ mhɨnja jʉno alyale ɨkʉvadindulila avaanhu ʉmʉlyango, pe akamwɨtɨkɨsia ʉPeteli kukwingila mʉ lʉvɨɨka. 17Ʉmhɨnja jʉla akamposia ʉPeteli akati, “Asi, ʉve nʉlɨ ʉmo mʉ vavʉlanɨsɨvua va muunhu ʉjʉ?” ɄPeteli akamwamʉla akati, “Ndali, naneene.” 18Lɨno, avakami na vasikali avaloleleli valyapembile ʉmwoto, ʉlwakʉva jɨlyale mhepo, valyɨmile vikwota ʉmwoto. Ghwope ʉPeteli alyɨmile palɨkɨmo na veene ikwota ʉmwoto.

Ʉntekesi ʉmʼbaha ɨkʉmposia ʉYesu

(Mataayi 26:59-66; Malɨka 14:55-64; Lʉʉka 22:66-71)

19Ʉntekesi ʉmʼbaha akamposia ʉYesu vwɨmɨla avavʉlanɨsɨvua vaake ni mbʉlanɨsio saake. 20ɄYesu akamwamʉla akati, “Ʉne najovagha na vaanhu pa vʉvalafu, ifighono fyoni navʉlanɨsyagha mʉ masinagogi na mʉ nyumba ɨnyɨmɨke ɨja kufunyila, muno vikongʼhaana aVayahudi vooni. Nanajovagha nambe lɨsio lɨmonga kʉ vʉsyefu. 21Lɨno, kɨki ghʉkʉmhosia ʉne? Ʉvaposie vano vapʉlɨkagha, aveene vakagwile sino najovagha.”

22ɄYesu ye ajovile isio, ʉmo mʉ vasikali avaloleleli#18:22 Vasikali avaloleleli: Ava vaale valoleleli va nyumba ɨnyɨmɨke ɨja kufunyila jɨno jaale kʉ Yelusalemu. Ɨmba kʉ Vʉghanʉle vwa Masio aMahesia. jʉno alyale piipi nʉ mwene, akantova nɨ lɨpɨ akati, “Kɨki ʉkʉmwamʉla enendɨɨkɨ ʉntekesi ʉmʼbaha?” 23ɄYesu akamwamʉla akati, “Nave nɨjovile fivi, jova ʉvʉviivi vwango. Neke nave nɨjovile vʉnofu kɨki ghʉkʉnhova?” 24ɄYesu ye ajiighe akʉngilue, ʉHanasi akalaghɨla kuuti atwalue kwa ntekesi ʉmʼbaha, ʉKayafa.

ɄPeteli ɨkʉnkaana kange ʉYesu

(Mataayi 26:71-75; Malɨka 14:69-72; Lʉʉka 22:58-62)

25Lɨno, ʉSimoni ʉPeteli alyɨmile ikwota ʉmwoto. Vamo mʉ vano valyale vikwota ʉmwoto vakamposia vakati, “Asi, ʉve nʉlɨ ʉmo mʉ vavʉlanɨsɨvua va muunhu ʉjʉ?” Ʉmwene akakaana akati, “Ndali, naneene.” 26Neke ʉmo mʉ vakami va ntekesi ʉmʼbaha, jʉno alyale nyalʉkolo ghwa muunhu jʉla jʉno ʉPeteli akanʼdumwile ɨmbulughutu, akamposia akati, “Asi, naveeve nɨveele nɨkwaghile ʉlɨ palɨkɨmo nʉ Yesu mʉ mʉghʉnda?” 27ɄPeteli akakaana kange, nakalɨngi ɨngʼhongove jɨkavɨka.

Avalongosi va Vayahudi vikʉntwala ʉYesu kwa Pilato

(Mataayi 27:1-2, 11-14; Malɨka 15:1-5; Lʉʉka 23:1-5)

28Palwakɨlo, vakantoola ʉYesu kuhʉma kwa Kayafa, vakantwala mʉ nyumba ɨja kɨtwa ɨja ntwa ʉMʉlooma ʉghwa kɨghavo ɨkya Yudea. Neke aveene navakingila mʉ nyumba ɨjio, ʉlwakʉva vale vingile, vale viiva valamafu.#18:28 Navakingila mʉ nyumba ɨjio, ʉlwakʉva vale vingile, vale viiva valamafu: Indaghɨlo ɨsa Kɨyahudi sikakanagha ʉMʉyahudi kukwingila mʉ nyumba ɨja muunhu jʉno naMʉyahudi, vangingile viiva valamafu. Mʉ ʉluo navaale vilia ɨkyakʉlia ɨkyɨmɨke ɨkya Pasaka. 29Pe ʉmʼbaha ʉghwa kɨghavo ʉPilato akahʉma kʉnji, akavaposia akati, “Asi, ʉmuunhu ʉjʉ avombile vʉhosi vʉki vʉno vʉkʉmpelela mʉmʉleete ahɨghue?” 30Aveene vakamwamʉla vakati, “Ʉmuunhu ʉjʉ ale aave namhosi, natwale tʉkʉmʉleeta kʉlyʉve.” 31ɄPilato akavavʉʉla akati, “Lɨno, mʉntoole jʉmue, mʉkamhɨghe ndavʉle silʉngɨka indaghɨlo siinu.” AVayahudi vakamwamʉla vakati, “Ʉsue natʉlɨ nʉ vʉtavʉlɨlua ʉvwa kʉmhɨgha ʉmuunhu kuuti abudue.” 32Isio silyavombiike enendɨɨkɨ kukwɨlanɨsia sino alyajovile ʉYesu vʉle ilifua.#Yohani 12:32-33

Ʉntwa ʉPilato ɨkʉmposia ʉYesu

33ɄPilato akagomoka mʉnkate, mʉ nyumba ɨja kɨtwa, akankemeela ʉYesu akamposia akati, “Asi, ʉve veeve Ntwa ghwa Vayahudi?” 34ɄYesu akamwamʉla akati, “Sino ghʉkʉmhosia, sihʉma mʉ masaaghe ghaako jʉʉve? Pamo avaanhu avange vakʉvʉlile imhola sango?” 35ɄPilato akamwamʉla akati, “Nɨlɨ Mʉyahudi ʉne? Avaanhu kuhʉma mʉ kɨsina kyako, na vavaha va vatekesi ve vano vakʉletile kʉlyʉne. Ʉvombile kɨki?” 36ɄYesu akamwamʉla akati, “ɄVʉtwa vwango navwa mʉ ɨɨsi muno, vwale vʉʉve vwa mʉ ɨɨsi muno avavombi vango vale vikʉnhanga kuuti nɨleke kukolua na Vayahudi. Neke lɨno ʉVʉtwa vwango navwa mʉ ɨɨsi muno.” 37Pe ʉPilato akamposia akati, “Kwekʉti ʉve ʉlɨ ntwa?” ɄYesu akamwamʉla akati, “Ʉve ʉjovile, kuuti ʉne nɨlɨ ntwa. Ʉne nɨlyaholilue mʉ ɨɨsi vwɨmɨla kukwoleka ʉvwakyangʼhaani. Ʉmuunhu jʉno ivɨngɨlɨla ʉvwakyangʼhaani, ɨkʉmhʉlɨkɨsia.”

38ɄPilato akamposia akati, “Ʉvwakyangʼhaani kye kɨki?” ɄPilato ye ajovile isio, akahʉma kange kʉnji, akavavʉʉla aVayahudi akati, “Ʉne nanɨvʉvwene nambe ʉvʉhosi vʉmo kwa muunhu ʉjʉ. 39Neke kwelʉle ʉlwiho ʉmue kʉkʉsʉʉma ʉne kʉkʉnʼdindulila ʉnkʉngua jʉmo ɨkɨghono ɨkya kyɨmɨke kya Pasaka. Asi, mulonda nɨvadindulile ʉNtwa ghwa Vayahudi?” 40Neke avaanhu vooni vakoova vakati, “Ndali! Nʉngatʉdindulilaghe ʉmuunhu ʉjʉ, ʉtʉdindulile ʉBalaba.” ɄBalaba ʉjuo, alyale mhɨjimʼbudi.

Currently Selected:

Yohani 18: wbi

Highlight

Copy