Yohani 13

ɄYesu ɨkʉvofugha amaghʉlʉ avavʉlanɨsɨvua vaake

1Ye kɨkyale ɨkɨghono kɨmo kufika ɨkyɨmɨke ɨkya Pasaka, ʉYesu akakagwile kuuti, ʉnsiki ghwake ʉghwa kʉvʉʉka mʉ ɨɨsi kulʉta kwa Viise, ghʉfikile. Ʉnsiki ghwoni ye ajiighe mʉ ɨɨsi alyavaghanile avaanhu vaake, alyavaghanile fiijo.

2ɄYesu na vavʉlanɨsɨvua vaake ye vilia ɨkyakʉlia pakɨvwilile, ʉSetano akava ampeliile ʉYuuda ʉmwana ghwa Simoni Isikalioti amasaaghe agha kʉmwohela ʉYesu. 3ɄYesu alyakagwile kuuti, ʉNhaata ampeliile ʉvʉtavʉlɨlua vwoni, na kuuti alyahʉmile kwa mwene kange igomoka kwa mwene. 4Pambele akɨɨma, akafuula ɨsopeka jaake, akatoola ɨkɨtambala, akidɨnga. 5Akavɨɨka amalenga mʉ lɨkalai, akatengʉla kʉkʉvofugha amaghʉlʉ#13:5 Kʉkʉvofugha amaghʉlʉ: ɄYesu alyale ivomba ɨmbombo ɨjio, kuvonia kuuti naalisile kuvombelua, looli kʉkʉvavombela avaanhu. avavʉlanɨsɨvua vaake na kupulusia nɨ kɨtambala kɨno idɨngile.

6Pe akafika pa Simoni ʉPeteli, ʉSimoni akati, “Ghwe Mʉtwa, ghulonda pikʉnyofugha ʉne amaghʉlʉ?” 7ɄYesu akamwamʉla akati, “Lʉno nivomba, ʉve naghʉkʉlʉtangʼhania lɨno, looli kyaghʉkʉlʉtangʼhania pambele.” 8ɄSimoni ʉPeteli akati, “Ʉve nʉnganyofughe ʉne amaghʉlʉ nambe padebe!” ɄYesu akamwamʉla akati, “Nave nanɨkʉkwofugha, naghuuva vʉhangɨlanɨsi nuune.” 9ɄSimoni ʉPeteli akati, “Ghwe Mʉtwa, nave fye lʉlɨvuo, ʉleke pikʉnyofugha gha maghʉlʉ, looli ʉnyofughe nagha mavoko naghʉ mutu.” 10ɄYesu akamwamʉla akati, “Ʉmuunhu jʉno oghile ʉmʼbɨlɨ, anoghiile kukwogha gha maghʉlʉ gheene, ʉlwakʉva ʉmʼbɨlɨ ghwoni ghʉvaliile. Na jʉmue mʉvaliile, neke jʉmonga mʉlyʉmue naavaliile.” 11ɄYesu alyankagwile jʉno kyande ɨkʉmwohela, fye nambe alyatiile, “Jʉmonga mʉlyʉmue naavaliile.”

12ɄYesu ye amalile kʉkʉvofugha amaghʉlʉ avavʉlanɨsɨvua vaake, akafwala ɨsopeka jaake, akagomoka pano akikalile, pe akavaposia akati, “Asi, mʉlʉtangʼhinie lʉno nɨvombile kʉlyʉmue? 13Ʉmue mʉkʉnhambʉla mwiti, ‘Mʼbʉlanɨsi,’ kange mwiti, ‘Ntwa.’ Mujova se seene, ʉlwakʉva nɨlɨ Mʼbʉlanɨsi, kange nɨlɨ Ntwa. 14Lɨno, ʉne ne jʉno nɨlɨ Mʼbʉlanɨsi, kange nɨlɨ Ntwa nɨvofwighe amaghʉlʉ, enendɨɨkɨ na jʉmue fye mʉvombelanɨlaghe. 15Nɨvahʉfisie ɨkɨhwanɨkɨsio ɨkɨ, kuuti na jʉmue fye mʉvombelanɨlaghe ndavʉle nɨvavombiile. 16Kyangʼhaani nɨkʉvavʉʉla, ʉnkami namʼbaha kukila ʉntwa ghwake, nambe ʉnsungʼhua namʼbaha kukila jʉno ansungʼhile. 17Lɨno, ʉlwakʉva mʉsikagwile isio, ʉNgʉlʉve ɨkʉvafuunya nave mʉkʉsivɨngɨlɨla.

18“Nanijova isi kʉlyʉmue mweni. Ʉne nɨvakagwile mwe vano nɨvasalwile kuuva vavʉlanɨsɨvua vango. Neke ndalʉve ndaani ʉmpaka ghakwɨlanɨsɨvue aMalembe aMɨmɨke ghano ghiiti, ‘Ʉmuunhu jʉno aliile ɨkyakʉlia kyango, angalʉkiile.’#Sabuli 41:9 19Nɨkʉvavʉʉla isi lɨno pano sikyale kuvoneka, neke kyasivoniike mwɨtɨke kuuti, ‘Ʉne Neene Kwale.’ 20Kyangʼhaani nɨkʉvavʉʉla, jʉno ɨkʉmwʉpɨla ʉmuunhu jʉno nɨnsungʼhile, ɨkʉnyʉpɨla ʉne; jʉno ɨkʉnyʉpɨla ʉne, ɨkʉmwʉpɨla jʉno asungʼhile ʉne.”

ɄYesu ijova vwɨmɨla ʉnya kʉmwohela

(Mataayi 26:20-25; Malɨka 14:17-21; Lʉʉka 22:21-23)

21ɄYesu ye ajovile isio, akapumuka mʉ mwojo, akavavʉʉla avavʉlanɨsɨvua vaake akati, “Kyangʼhaani nɨkʉvavʉʉla, jʉmonga mʉlyʉmue itapikʉnyohela.” 22Avavʉlanɨsɨvua vaake vakava vilolana, navakakagʉla kuuti ɨkʉnʼjova veeni. 23Ʉmo mʉ vavʉlanɨsɨvua va Yesu jʉno ʉYesu alyamʉghanile fiijo, alyeghiime pa kɨfuva kya Yesu. 24ɄSimoni ʉPeteli akampalɨsia ʉmʼbʉlanɨsɨvua ʉjuo, akamʼbʉʉla akati, “Posia, ɨkʉnʼjova veeni?” 25Pe ʉmʼbʉlanɨsɨvua jʉla kʉmo eghiime pa kɨfuva kya Yesu, akamposia akati, “Ghwe Mʉtwa, ghwe veeni jʉno kyaɨkʉkwohela?”

26ɄYesu akamwamʉla akati, “Jʉno nɨkʉmpeela ɨkɨnkate kɨno nitapisaasa, ghwe mwene.” Pe akasaasa ɨkɨnkate, akampeela ʉYuuda ʉmwana ghwa Simoni Isikalioti. 27ɄYuuda ye ʉpiile ɨkɨnkate kɨla, ʉSetano akamwingila. Apuo ʉYesu akamʼbʉʉla akati, “Sino ghulʉta pivomba, vomba ngʼhaningʼhaani!” 28Neke vooni vano valyale vilia pala, nakwealyale nambe jʉmo jʉno alyakagwile kuuti, kɨki ʉYesu amʼbʉlile ʉYuuda enendɨɨkɨ.

29Neke ʉlwakʉva ʉYuuda ghwe jʉno alyale ikola indalama, vamonga vakati, evone ʉYesu amʼbʉlile kuuti akaghʉle ifiinu fino filondua pa kɨkulukulu; avange vakatisagha, evone ansungʼhile akaghʉle fimonga ifya kʉvapeela avakotofu. 30ɄYuuda ye ʉpiile ɨkɨnkate kɨla, akahʉma kʉnji. Ʉnsiki ʉghuo jɨlyale kɨlo.

Ʉlʉlaghɨlo ʉlʉpia

31ɄYuuda ye ahʉmile kʉnji, ʉYesu akati, “Lɨno, ʉnsiki ʉghwa kʉghinisivua ne Mwana ghwa Muunhu ghʉfikile, ghwope ʉNgʉlʉve aghinisivue kukilila ʉne. 32Ʉlwakʉva ʉNgʉlʉve ighinisivua kukilila ʉne, ghwope ɨkʉnginia ʉne kukilila ʉmwene jʉjuo. Ivomba ʉluo kɨsila kʉdɨɨla.

33“Mwe vanango, nɨlɨ numue ʉnsiki nʼdebe vʉvʉle. Mulikʉndonda, neke lɨno nɨkʉvavʉʉla ndavʉle nɨkavavʉlile avavaha va Vayahudi kuuti, ‘Ʉne kʉno nilʉta ʉmue namʉngafike.’ 34Lɨno, nɨkʉvapeela ʉlʉlaghɨlo ʉlʉpia kuuti, ‘Mʉghananaghe, ndavʉle ʉne vʉle nɨvaghanile ʉmue.’ 35Nave mughanana, avaanhu vooni vikagʉla kuuti ʉmue mʉlɨ vavʉlanɨsɨvua vango.”

ɄYesu ɨkʉmʼbʉʉla ʉPeteli kuuti kyaɨkʉnkaana

(Mataayi 26:31-35; Malɨka 14:27-31; Lʉʉka 22:31-34)

36ɄSimoni ʉPeteli akamposia akati, “Ghwe Mʉtwa, ghulʉta kʉʉghi?” ɄYesu akamwamʉla akati, “Kʉno nilʉta nʉngambɨngɨlɨle lɨno, looli ghulikʉmbɨngɨlɨla pambele.” 37ɄPeteli akamposia kange akati, “Ghwe Mʉtwa, kɨki nanɨngakʉvɨngɨlɨle lɨno? Ʉne nitavwile vwɨmɨla ʉve, nambe kʉʉve kwe kʉfua.” 38ɄYesu akamwamʉla akati, “Ghutavwile vwɨmɨla ʉne, nambe kʉʉve kwe kʉfua? Kyangʼhaani nɨkʉkʉvʉʉla, ɨngʼhongove ye jɨkyale kuvɨka, ghuuva ʉngʼhanile katatu.”

Currently Selected:

Yohani 13: wbi

Highlight

Copy