ZAKARÍAS 9
9
Hatun suyu-masikunaq muchuchisqa kasqan
1Señor Diosmi Hadrak suyu contra riman,
Damasco llaqta contrapas rimallantaq.
Paymi llapa runata qhawashan,
manan Israel llapa ayllukunallatachu.
2Señor Diosqa qhawashallantaqmi
Israel tupaypi kaq Hamat llaqtatapas,
Tiro llaqtatapas Sidón llaqtatapas.
Tiroqa yachaysapataq chayqa
3pukaratan perqakurqan,
ñut'u hallp'ata hinan qolqetapas huñuykurqan,
calle t'uruta hinan qoritapas huñuykurqan.
4Chaypas Señor Diosmi llapallanta qechunqa,
hinaspan atiyninta mama qochaman chinkaykachinqa,
llaqtataq ninaq ruphaykusqan kapunqa.
5Askalón llaqtan chayta rikuspa sinchita mancharikunqa,
Gaza llaqtapas llakipakuspan khatatatanqa,
Ekrón llaqtaq yuyarayayninpas qollupunqan,
hinan mancharikunqa,
Gaza llaqtanqa mana reyniyoqmi kapunqa,
Askalonpas mana runayoqmi kapunqa.
6Asdod llaqtapiqa karu llaqtayoqkunan tiyanqa,
uma hoqariq Filistea runakunatan k'umuykachisaq.
7Siminkumantan yawarniyoq aycha mikhusqankuta horqosaq,
mana mikhunapaq kaqtapas siminku ukhumantan aysasaq,
chaypas kay Filistea runakunamanta puchuqqa ñoqaqmi kanqa,
Judapin huknin aylluy hina kapunqaku,
Ekrón runakunapas Jebus runakuna hinan llaqtay kapunqaku.
8Ñoqataq suyuyta hark'aykunaypaq maki qhawasaq,
ama pi awqapas chayninta purinanpaq.
Manañan sarunchaqpas paykunata alqochanqachu,
kunanqa ñoqan paykunata maki qhawashani, nispa.
Qhepaman Israel suyuq reynin kananmanta
9¡Sión llaqta, anchata kusikuy!
¡Jerusalén llaqta, kusisqa takiy!
Kayqa reyniykin hamushasunki,
payqa chaninmi, atipaqmi,
payqa huch'uyyaykukuqmi,
asnopi sillaykusqan hamushan,
china asnoq orqo maltanpi hamushan.
10Señor Diosmi nin:
Efrainmantan awqa-tinkuy carretakunata karunchasaq,
Jerusalenmantan awqa-tinkuy caballokunatapas wikch'usaq,
awqa-tinkuy wach'ina p'eqtatapas p'akirqarisaq.
Reyniykin hatun suyukuna purata thak kawsaypi kawsachinqa,
Kachi Qochamanta Mama Qochakaman kamachikunqapas,
Eufrates mayumanta karu k'uchukama.
11Sacrificio yawarwan cheqaqchaspan qanwan rimanakurqani,
chaymi ñoqaqa presoykikunata mana unuyoq t'oqomanta horqosaq.
12Suyakushaq presokuna,
pukarasqa llaqtaykichisman kutipuychis.
Kunanmi willashaykichis
imaymana ñak'arisqaykichisman hina
astawan qankunata saminchanayta.
13Judatan wach'ina p'eqtayta hina chutasaq,
Efraintan wach'inata hina paypaq churasaq.
Sión llaqtalláy, qantan maqanakuqpa espadanman tukuchisqayki,
wawaykikunatan Grecia runakuna contrata sayarichisaq, nispa.
14Señor Diosmi hawankupi rikhurinqa,
wach'isqanpas lliphipishaq ninan lliph-lliph ninqa.
Señor Diosmi putututa waqachinqa,
uraymanta tutukamuq wayrapin purinqa.
15Tukuy-atiyniyoq Señor Diosmi paykunata waqaychanqa,
warak'asqa rumikunatapas t'ustunqakun,
mikhunqakun ukyanqakun,
hinaspan vino ukyaqkuna hina warararanqaku,
imaynan altar waqrakunaman ch'aqchuykunapaq mankaqa yawar hunt'a,
chay hinan paykunaqa vino hunt'a kanqaku.
16Chay p'unchaypin Apu Señor Diosninkuqa
uywa t'aqa hina llaqtanta qespichinqa,
coronapi umiña rumikuna hinataqmi
runankunaqa hallp'anpi lliphipinqaku.
17¡Ancha allinmi, may munaymi suyuqa kanqa!
Trigon waynakunata sumaqta wiñachinqa,
upi vinotaqmi sipaskunatapas sumaqta wiñachinqa.
Currently Selected:
ZAKARÍAS 9: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
