ZAKARÍAS 8
8
Señor Diospa Jerusalenta saminchayta prometesqan
1Tukuy-atiyniyoq Señor Diosmi rimaykuwarqan:
Paymi nin:
2Ñoqa Tukuy-atiyniyoq Señor Diosmi nini:
Sionmantan sinchitapuni sienteni,
rawraq sonqoywanmi chay llaqtamanta sienteni.
3Sionmanmi kutipusaq,
hinaspan Jerusalén ukhupi tiyasaq.
Hinan Jerusalenqa Hunt'aq Llaqta nisqa kanqa,
ñoqa Tukuy-atiyniyoq Señor Diospa orqoypas
Ch'uya Orqo nisqan kanqa.
4Jerusalén plazakunapiqa tiyaykunqakuraqmi
tawna hap'intin askhallaña watayoq
machu qharikunapas paya warmikunapas.
5Wawakunan llaqta callekunaman hunt'aykunqa,
hinaspan chaykunapi pukllanqaku.
6Chay p'unchaykunapin llaqtaymanta puchuq runakunapaq
kaykunaqa musphanapaq kanqa,
ñoqapaqmi ichaqa mana utirayanapaqchu kanqa.
7Kayqa, ñoqan llaqtayta qespichimusaq
inti lloqsimuy lado suyumanta, inti haykuy lado suyumantawan.
8Hinaspan paykunata pusamusaq,
chaymi Jerusalén ukhupi tiyanqaku.
Paykunan llaqtay kanqaku,
ñoqataq Diosninku kasaq,
hunt'aspan chaninchaspan paykunata kamachisaq, nispa.
9Tukuy-atiyniyoq Señor Diosmi nin:
Yupaychana wasiyta teqsichayta qallarisqa p'unchaykunapin profetakuna llaqtaman rimaykurqan, kunanpas qankunaqa kaq simillatataqmi uyarishankichis, chayrayku kallpachakuychis. 10Manaraq teqsichayta qallarishaqtinkun runamanpas uywamanpas mana imatapas qorqankuchu. Awqata manchakuspan mana pipas llank'aq lloqsirqanchu, ñoqataqmi llapan runakunata awqanachirqani. 11Kunanqa kay llaqtamanta puchuq runakunataqa manan ñawpa p'unchaykuna hinachu rikusaq.
12Muhuta tarpunapaqmi allin p'unchaykuna kanqa, uvas chakrakunapas rurunqan, hallp'apas ruruchinqan, hanaqmantapas paramunqan. Kay llaqtamanta puchuq runakunamantaqmi tukuy kaykunata hap'inankupaq qosaq. 13Yaw Judá runakuna Israel runakuna, imaynan hatun suyukuna ukhupi ñakasqa karqankichis, ahinatan kunan qespichisqaykichis, chaymi hukkunapaq samincha kankichis. Chayrayku ama manchapakuychischu, aswanpas kallpachakuychis.
14Machulaykichis k'arakta phiñachiwaqtinmi, mana khuyapayaspa qankunata mana allin ruwayta yuyaykurqani. 15Kunanmi ichaqa Jerusalenpaqpas Judá suyupaqpas allinkaqta ruwayta yuyaykuni. Chayrayku ama manchapakuychischu. 16Kaykunatan ruwanaykichispuniqa:
Sapanka runa-masiykichiswan cheqaqkaqta rimaychis, juzganaykichiskunapi chaninninpi juzgaychis, juzganaykichiskunapi chaninchaychis sumaqta kawsachinapaq. 17Ama mana allinkaqta ruwanakunaykichispaq sonqoykichispi yuyaykuychischu, amallataq llulla juramentotapas ruwaychischu, tukuy chaykunataqa cheqninin, nispa.
18Tukuy-atiyniyoq Señor Diosmi huktawan niwarqan:
19Judá runakunapaqqa tawakaq killa ayunopas, phisqakaq killa ayunopas, qanchiskaq killa ayunopas, chunkakaq killa ayunopas q'ochukuymanmi, kusikuymanmi, kusikuy fiestakunamanmi tukupunqa. ¡Munakuychis cheqaq-kaytapas thak-kaytapas! nispa.
20Tukuy-atiyniyoq Señor Diosmi nillawarqantaq:
Jerusalenmanqa hamunqaraqmi askha llaqta runakuna, hatuchaq llaqtakunapi tiyaqkunapas. 21Hinan huk llaqtapi tiyaqkunapas hukkaqman rispa ninqaku:
Haku Señor Diosmanta mañakamuq, Tukuy-atiyniyoq Señor Diosta yupaychamuq. ¡Ñoqaykupas rishaykun! nispa. 22Chaymi askha llaqtakuna atiyniyoq hatun suyukunapas Jerusalenman hamunqaku ñoqa Tukuy-atiyniyoq Señor Diosta yupaychawanankupaq mañakamuwanankupaqwan.
23Chay p'unchaykunapin hatun suyukunapi kaq imaymana rimay rimaqkunamanta chunka runa huk Judío runata llaqollanmanta qaqata hap'iykuspa ninqa:
Ñoqaykun uyariyku qankunawan Dios Kashasqanta, chayrayku pusakapuwayku, nispanku, nispa.
Currently Selected:
ZAKARÍAS 8: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
