ZAKARÍAS 10
10
Llaqtanta Señor Diospa qespichinanmanta
1Señor Diosmanta qhepa mita parata mañakuychis,
illapata lliphllikichimuq Señor Diosmi allinta parachimunqa,
llapapaqtaqmi campopi q'achuta wiñachinqa.
2Wasi idolokunaq willakusqanqa llullan,
watuqkunaq rikusqanpas llullan,
llulla mosqokusqankutan watunku,
sonqochaykuq siminkupas yanqan,
chaymi llaqtaqa oveja t'aqa hina pantapun,
mana michiqniyoq kaspataq muchushan.
3Chaymi Señor Diosqa nin:
Michiqkunapaqmi k'arakta phiñakuni,
llaqtay kamachiqkunatan muchuchisaq.
Judá runakunaqa ñoqaqmi,
ñoqa Tukuy-atiyniyoq Señor Diosmi paykunata oveja t'aqata hina qhawasaq,
paykunatan awqa-tinkuypaq kallpasapa caballoman hina tukuchisaq.
4Paykunamantan esquina hap'iq rumi sayarimunqa,
paykunamantan karpa takarpupas kanqa,
paykunamantan awqa-tinkuy wach'ina p'eqtapas kanqa,
paykunallamantataqmi tukuy kamachikuqkunapas sayarimunqa.
5Awqa-tinkuypi calle t'urukunata saruq soldadokuna hinan kanqaku,
ñoqa Señor Diosmi paykunawan kashasaq,
chaymi paykunaqa caballoyoq soldadokunatapas maqanakuspa atipanqaku.
6Ñoqan Judá runakunata kallpachasaq,
Josepa miraynintapas qespichisaq.
Paykunataqa llakipayaspaymi
maychus tiyanankuman kutichimusaq,
manapas wikch'uymanchu karqan hinan kapunqaku,
ñoqaqa Apu Señor Diosninkun kani,
mañakamuwasqankutan uyarisaq.
7Kallpasapa hinan Efraín runakunaqa kanqa,
sonqonkupas vinowan hinan kusikunqa,
churinkupas chayta rikuspankun kusikunqa.
¡Sonqonkun Señor Diospa ruwasqanwan kusikunqa!
8Ñoqan paykunata huñuykamunaypaq señaschasaq,
ñoqan paykunataqa horqokampusaqpuni,
chaymi ñawpa p'unchaykunapi hina anchatapuni askhayanqaku.
9Llaqtakuna ukhumanña paykunata ch'eqechirqani chaypas,
karu suyukunamanta yuyarimuwanqaku,
paykunapas churinkupas kawsashallanqakupunin,
kaymantaqmi kutimpunqakupas.
10Ñoqan Egipto suyumanta paykunata kutichimusaq,
Asiria suyumantapas pusakampusaqmi,
Galaadmanpas Libanomanpas paykunataqa apakampusaqmi,
manataqmi paykunapaq tiyana aypanqachu.
11Llaki-phutiy qochatan chimpanqaku,
chay qochaq phoqchiqesqankunatan ch'inyachisaq,
Nilo mayutan ukhukama ch'akichisaq.
Asiria suyuq uma hoqarisqantapas k'umuykachisaqmi,
Egipto suyuq kamachikusqantapas chinkachisaqmi.
12Ñoqan llaqtay runakunata kallpachasaq,
chaymi sutiypi purinqaku.
Chaytan ñoqa Señor Diosqa nini, nispa.
Currently Selected:
ZAKARÍAS 10: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
