ZAKARÍAS 11
11
1Yaw Líbano, punkuykikunata kichariy,
cedro sach'aykikunata nina ruphaykunanpaq.
2Yaw ciprés sach'a, waqaykuy,
cedro sach'a kumpakapusqanrayku,
ancha hatun sach'akuna kumpakapusqanrayku.
Yaw Basanpi encina sach'akuna waqaykuychis,
k'iski sach'a-sach'a chaqosqa kapusqanrayku.
3Michiqkunan qaparispa waqaykunku,
munay q'achukuna chaqosqa kasqanrayku.
¡Leonkunaq qaparisqanta uyariychis,
Jordán mayupi mat'i sach'a-sach'an chaqosqa kapushan!
Iskay michiqkuna
4Apu Señor Diosniymi niwarqan:
Nak'anapaq kaq ovejakunata michiy. 5Chaykunatan rantiqninkunaqa nak'an, manataqmi huchallikuqpaq qhawasqachu kanku. Vendeqninkupas ninkun: Yupaychasqa Señor Diosqa kachun, qhapaqyaykapunin, nispa. Michiqninkupas manan chaykunataqa llakipayanchu. 6Ñoqapas manañan chay suyupi tiyaqkunata llakipayasaqchu, aswanpas ñoqan runakunata sapankata runa-masinman reyninmanpas hap'iykachisaq. Chaykunan suyuta sarunchanqaku, manataqmi mayqenninkutapas makinkumanta kacharichisaqchu, nispa.
7Hinan nak'anapaq t'aqasqa ovejakunata michirqani oveja rantiqkunapaq. Iskay tawnatataq hap'irqani, huknintan “Sumaq Sonqo Kayta” suticharqani, huknintataq “Hukllachayta” suticharqani. Hinaspan ovejakunata michirqani. 8Huk killallapin kinsa michiqkunata qarqorqani.
Ovejakunan sinchita umayta nanachiwarqanku, ñoqatapas cheqnikuwarqanku. 9Chaymi nirqani:
Manañan michisqaykichisñachu. Mayqenpas wañunanpaq kaqqa wañuchun, mayqentapas nak'anqaku chayqa nak'achunku, qhepaqkunapas mikhunakuchunku, nispa.
10Hinaspan “Sumaq Sonqo Kay” nisqa tawnata hap'ispa p'akirqani, tukuy llaqtakunawan Señor Diospa rimanakusqan p'akisqa kasqan rikhurinanpaq. 11Chay p'unchaypin rimanakusqaqa yanqayachipusqa karqan, chhaynapin qhawarimuwaqniy oveja rantiqkunaqa yacharqanku Señor Diospa simin kasqanta.
12Hinamantataq paykunata nirqani:
Allinpaqchus hap'inkichis chayqa, pagoyta qopuwaychis, mana chaytaq, saqepuychis, nispay. Hinaqtinmi kinsa chunka qolqeta pagawarqanku. 13Chayqa ancha askha qolqetapas qowankuman hinan paykunapaqqa. Chaymi Señor Diosqa niwarqan:
Manka ruwaqman wikch'uykuy, nispa. Chaymi chay kinsa chunka qolqeta hap'ispay, Señor Diospa wasinpi kaq manka ruwaqman wikch'uykurqani. 14Hinamantataq hukkaq “Hukllachay” nisqa tawnata p'akirqani, Judá suyuwan Israel suyuwan wawqe pura kasqankuta t'aqarparinapaq.
15Huktawanmi Señor Diosqa niwarqan:
Huk mana yuyayniyoq michiq hina michiy. 16Kayqa, ñoqan huk michiqta kay suyupi churasaq. Payqa manan chinkasqata watukunqachu, manan pantapuqtapas maskhanqachu, manan k'irisqatapas hampinqachu, manan qhali ovejatapas mikhuchinqachu, aswanmi wira ovejakunaq aychanta mikhunqa, manan phapatullantapas puchuchinqachu.
17¡Ay uywa t'aqta saqerpariq michiq!
¡Ay mana valeq michiq!
¡Espada k'irichun makintapas paña ñawintapas!
¡Llapallan makinqa ch'akichun,
paña ñawinpas ñawsayaykapuchun! nispa.
Currently Selected:
ZAKARÍAS 11: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
