ZAKARÍAS 12
12
Qhepaman Jerusalenpa qespikunan
1Señor Diosmi hanaq pachata mast'arin, kay pachatapas teqsichan, runamanpas kawsayta qon. Paymi Israelmanta nin: 2Ñoqan Jerusalenta churani muyuriq llapa suyukunata machachiq vino qeru kananpaq. Chaykuna Jerusalenta muyuykuqtinkun, Judá suyupi huk llaqtakunapas muyuykusqallataq kanqa. 3Chay p'unchaypin Jerusalenta churasaq mana kuyurichiy atiy llasa qaqa kananpaq, mayqen suyupas chay qaqata kuyurichiyta munaqqa k'irisqan kanqa. Tukuy hatun suyukunan Jerusalén contra huñukamunqaku. 4Ichaqa chay p'unchaypin llapa caballota q'aqchasaq, caballoyoq soldadokunatapas waq'ayachisaq. Judá runakunatan waqaychasaq, awqan suyukunaq caballontataqmi ichaqa llapallanta ñawsayachisaq. 5Judapi umallikunataqmi sonqonkupi ninqaku:
Jerusalenpi tiyaqkunaq Diosninqa Tukuy-atiyniyoq Señor Diosmi, paymi paykunataqa kallpachan, nispanku.
6Chay p'unchaypin Judá ayllukunata llant'a ukhupi nina sansata hina churasaq, trigo marq'ay ukhupi rawrashaq ninata hina. Chaymi qorpa tupayninpi kaq hatun suyukunata llapallanta ruphaykunqa, Jerusalenpi tiyaqkunataq llaqta ukhupi mana manchachisqa tiyakapunqaku.
7Ñawpaqtaqa ñoqa Señor Diosmi Judá ayllukunawan awqakunata atipachisaq, Davidpa mirayninpas Jerusalenpi tiyaqkunapas Judá ayllukuna contra ama anchaykachanankupaq. 8Chay p'unchaypin ñoqa Señor Diosqa Jerusalenpi tiyaqkunata amachasaq, chaymi paykuna ukhupi sinchi pisi kallpayoqqa David hina kallpasapa kanqa. Davidpa miraynintaq Dios hina kanqa, wawqenkuq ñawpaqentan Señor Diospa angelnin hina rinqaku. 9Chay p'unchaypin ñoqaqa Jerusalén contra hamuq mayqen hatun suyutapas wañuchisaq.
10Davidpa miraynintapas Jerusalenpi tiyaqkunatapas khuyapayakuq sonqomanmi tukuchisaq, mañakuq sonqomanmi tukuchisaq. Hinan qhawarimuwaspanku, t'urpuspa wañuchisqanku qharimanta waqaykunqaku. Sapan churimanta waqaq hina, phiwi wawamanta llakikuq hina paymanta llakikunqaku. 11Chay p'unchaypin Jerusalenpi khuyay waqay kanqa, Meguido pampapi Hadad-rimonpaq waqasqa hina. 12Kay suyupin sapanka ayllu sapaqpi waqaykunqaku:
Davidpa miraynin qharikunapas sapaqpi, warminkupas sapaqpi,
Natanpa miraynin qharikunapas sapaqpi, warminkupas sapaqpi,
13Levipa miraynin qharikunapas sapaqpi, warminkupas sapaqpi,
Simeipa miraynin qharikunapas sapaqpi, warminkupas sapaqpi,
14wakin ayllu tukuy qharikunapas sapaqpikama, warminkupas sapaqllapitaq.
Currently Selected:
ZAKARÍAS 12: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
