GENESIS 37
37
1Jacobñataqmi taytanpa *f**yachasqan Canaan allpapi yacharqa forastero hina.
Joseymantawan wawqenkunamanta
2Kunanñataqyá Jacobpa mirayninkunamanta willasqaykichik: Joseymi chunka qanchisniyoq watanpi wawqenkunawan ovejakunata michirqaku. Chay wawqenkunaqa karqa taytanpa churi-wachan Bilhapa hinaspa Zilpapa wawankunam. Joseymi willaq taytanman paykunapa mana allin rurasqankuta.
3Israelmi kuyaq Joseyta llapan churinkunamantapas aswan masta machuyayninpiña churin kasqanrayku chaymi qoysuneq sumaq pachata rurapurqa. 4Taytanmi Joseyta kuyarqa wakin churinkunamantapas aswan masta chayraykum wawqenkuna cheqniqku hinaspam piñasqalla rimapayaqku Joseyta.
5Josey mosqoruspanmi wawqenkunaman willarqa, chayraykum paykunaqa aswanraq cheqnirurqaku. 6Joseymi nirqa paykunata:
—Uyariychik kay mosqoyniyta: 7Gavillakunatam watachkasqanchik chakrapi hinaptinmi ñoqapa gavillay sayarirurqa hinaspam derecholla karqa, qamkunapa gavillaykichikñataqmi muyuriqninpi kaspa kurkuykurqa ñoqapa gavillayman —nispa.
8Chaymi wawqenkunañataq nirqa:
—¿Qamqa reyniyku kaspachu munaychakunki ñoqaykupi? —nispa.
Hinaspam aswanraq cheqnipakururqaku chay mosqoyninmantawan.
9Huktawan mosqospam wawqenkunaman willarqa:
—Kunanmi huktawan mosqoruni, intiwan killam lucerokunapiwan ñoqaman kumuykuwarqa —nispa.
10Taytanmanpas willakurqam wawqenkunaman hina chaymi taytan qaqchaspan nirqa:
—¿Ima mosqoytaq chay mosqoynikiqa? ¿Ñoqachum hamusaq mamaykipiwan hinaspa wawqekikunapiwan ñawpaqnikipi qonqoranpa pampaman kumuykunaykupaq? —nispa.
11Chaymi wawqenkuna envidiakurqa Joseymanta, taytanñataqmi yuyaymanarqa chay willasqanmanta.
Joseyta wawqenkuna rantikurusqanmanta
12Joseypa wawqenkunam taytanpa ovejankuna michiq rirqaku Siquem lawta. 13Chaymi Israel nirqa Joseyta:
—Wawqekikunam Siquem lawpi ovejata michichkanku, paykunatayá kunan watukaramuy —nispa.
Chaymi Joseyñataq nirqa:
—Arí, rirusaqyá —nispa.
14Hinaptinmi taytan nirqa:
—Rispaykiyá qawaramuy wawqekikunapa imaynam kasqankuta, yacharamuytaqyá ovejakunamantapas willawanaykipaq —nispa.
Joseytaqa Hebron qechwamantam kacharqa chaymi rirqa Siquem lawkama. 15Chaymi purunpi pantaruspa purichkaqta huk runa tarirurqa hinaspam tapurqa:
—¿Imatataq maskachkanki? —nispa.
16Joseyñataqmi nirqa:
—Wawqeykunatam maskachkani, ruegakuykim maypim michisqankuta willaykuwanaykipaq —nispa.
17Hinaptinmi chay runañataq nirqa:
—Ñam pasakunkuña kaymantaqa, ñoqam uyarirqani: “Haku Dotan lawman” —niqta.
Chaymi Josey rirqa wawqenkunapa qepanta hinaptinmi paykunaqa Dotan lawpi kachkasqaku. 18Chaymi paykunaman manaraq chayachkaptin, rikuruspanku Joseyta wañurachinankupaq tanteanakurqaku. 19Paykunam ninakurqaku:
—Waqayá mosqoykuna mosqoq maqtaqa hamuchkan. 20Kunanyá wañurachispa wischuykusunchik huk pozoman hinaspayá nisunchik: “Ima purun animalchá mikururqa” nispa. Hinaptinchá yachasunchik mosqoyninkunamanta —nispa.
21Chayta Ruben uyariruspanmi paykunamanta librayta munaspan nirqa:
—Ama wañuchisunchikchu —nispa.
22Wawqenkunamanta librayta munaspanmi taytanman kutichiyta munaspan paykunata Ruben nirqa:
—Kay pozoman kachaykuychik, ama wañuchiychikchu inocente warmataqa —nispa.
23Josey wawqenkunaman chayaruptinmi paykuna llatanarurqaku chay qoysuneq sumaq pachanta. 24Hinaspam hapiruspa pozoman kachaykurqaku, pozoqa mana imayoq chakim kasqa. 25Chaymantam tiyaykurqaku mikunankupaq. Qawarispankum rikururqaku negociante Ismael casta runakunata Galaad lawmanta hamuchkaqta. Paykunam camellonkupi apachkarqaku miski asnaqkunata, balsamokunata hinaspa mirra cargakunata Egipto nacionman. 26Chaymi wawqenkunata Juda nirqa:
—¿Imatataq horqokusunchik wawqenchikta wañurachispanchikqa chaynataq wañusqanmanta pakaspanchikpas? 27Ismael runakunamanyá rantikurusunchik, amayá paytaqa wañuchisunchikchu, wawqenchikqa aychanchikmi. Chaymi wawqenkunapas “allinmi” nirqaku. 28Chay negociante Madian casta runakuna pasachkaptinmi Joseyta wawqenkuna horqorqaku pozomanta hinaspam Ismael casta runakunaman rantikururqaku cuarto kilo qollqepi chaymi Joseyta aparqaku Egipto nacionman.
29Rubenñataqmi chay pozoman kutispan Joseytaqa manaña tarirqachu chaypiqa hinaspam pachankunata llikiparqa llakimanta. 30Chaymi wawqenkunaman kutirispan nirqa:
—Warmaqa manam kanchu. ¿Kunanqa imapitaq rikukuykuni? —nispa.
31Chaymi paykuna Joseypa pachanta hapispanku, huk chivatochata wañurachispa chaypa yawarninwan Joseypa pachanta chapurqaku. 32Hinaspam Joseypa chay qoysuneq sumaq pachanta apachirqaku taytankuman.
—Kayllatam tariruniku, reqsiy kayta churikipa pachanchu icha manachu —nispanku.
33Chaymi Jacob reqsiykuspa nirqa:
—Churiypa pachanmi kayqa, ima purun animalchiki paytaqa mikurun. Joseypa cuerponqariki llikipasqach kachkan —nispa.
34Chaymi Jacob pachanta llakimanta llikipaspa luto pachawan churakurqa hinaspam waqallarqa churinmanta achka punchawta. 35Chaymi llapallan churinkuna asuykurqaku consuelanankupaq ichaqa paymi consuelanankuta mana munaspan nirqa:
—Ñoqaqa churiymantaqa llakikusaq wañunaykamam —nispa.
Chaynata nispanmi waqallarqa.
36Madian casta runakunañataqmi Egipto nacionpi Potifarman rantikururqa Joseyta. Potifarqa karqa Egipto nacionpi Rey Faraonta waqaychaq soldadokunapa capitanninmi.
Currently Selected:
GENESIS 37: QUEAYA87
Highlight
Share
Copy
Want to have your highlights saved across all your devices? Sign up or sign in
