GENESIS 30

1Raquelmi Jacobpa churinta mana wachakuspan ñañanmanta envidiakuspan Jacobta nirqa:

—Qoway wawakunata mana chayqa wañurusaqmi —nispa.

2Jacobñataqmi Raquelwan piñakuruspan nirqa:

—Diosmi mana wachakuqtaqa rurasurqanki, manam ñoqaqa Dioschu kani wawata qonaypaqqa —nispa.

3Chaymi Raquel nirqa:

—Kayqaya sirvientay Bilha, paywanyá puñuy, pay wachakuptinmi paypa wawankuna wawaykuna hina kanqa —nispa.

4Chaymi Raquel qoykurqa sirvientan Bilhata Jacobpa churi-wachan kananpaq hinaptinmi Bilhawan Jacob puñurqa. 5Chaymi wiksayakuspan wachakurqa Jacobpa qari churinta. 6Chaymi nirqa Raquel:

—Diosmi allin arreglota ruraykapuwaspan qayakusqaytapas uyariykuwantaq hinaspam qoykuwan huk qari wawata —nispa.

Chayraykum suticharqa #Hebreo simipi Dan ninanqa “allin arregloman hina ruray” ninanmi.Danwan.

7Huktawanmi Raquelpa sirvientan Bilha wiksayakurqa Jacobpa churinta hinaspam wachakururqa iskay kaq qari wawanta. 8Chaymi Raquel nirqa:

—Anchatam gananakurqani ñañaywan hinaspam venceruni —nispa.

Chaymi suticharqa #Hebreo simipi Neftaliy ninanqa “peleasqay” ninanmi.Neftaliywan.

9Leañataqmi manaña masta wachakuspan sirvientan Zilpata qoykurqa Jacobpa churi-wachan kananpaq. 10Chaymi Leapa sirvientan Zilpa Jacobpa churinta wiksayakuspa wachakururqa qari wawata. 11Chaymi Leaqa nirqa:

—Allin suertem kayqa —nispan.

Chayraykum suticharqa #Hebreo simipi Gad ninanqa “suerteyoq” ninanmi.Gadwan.

12Huktawanmi Leapa sirvientan Zilpa wachakururqa Jacobpa qari churinta. 13Chaymi Lea nirqa:

—Kusikuyniymi kayqa, kusikuyniyoqmi niwanqakuchá warmikunapas —nispa.

Chayraykum #Hebreo simipi Aser ninanqa “kusisqa” ninanmi.Aserwan suticharqa.

14Rubenmi trigo rutuy tiempopi chakrapi mandragoras sutiyoq frutata tarirurqa hinaspam aparqa maman Leaman hinaptinmi Raquel nirqa Leata:

—Qoykuway wawaykipa apamusqan mandragoras frutaykita —nispan.

15Chaymi Leañataq nirqa:

—¿Qosayta hapikuruchkaspaykipas wawaypa apamusqan mandragoras frutataraqchu qechuruwayta munachkanki? —nispa.

Hinaptinmi Raquel nirqa:

—Jacobchiki kunan tuta qanwan puñunqa wawaykipa apamusqan mandragoras fruta qowasqaykimanta —nispa.

16Chaymi Jacob tarden chakramanta kutimuchkaptin Lea taripaykuspan nirqa:

—Ñoqawanmi kunan tutaqa puñunki, wawaypa apamusqan mandragoras frutawanmi contrataruyki —nispa.

Chaymi paywan chay tuta puñurqa. 17Leapa mañakuynintam Dios uyarirqa. Chaymi Jacobpa churinta wiksayakuspa wachakurqa pichqa kaq qari wawanta. 18Chaymi Lea nirqa:

—Qosayman sirvientay qoykusqayraykum Dios premiaykuwan kay wawawan —nispa.

Chayraykum suticharqa #Hebreo simipi Isacar ninanqa “premio” otaq “alquilasqa” ninanmi.Isacarwan.

19Hinaspam huktawan Jacobpa churinta wiksayakuruspa wachakururqa soqta kaq qari wawanta. 20Hinaspam nirqa:

—Diosmi allin regalota qoykuwan. Qosayqa kunanqa alabawanqachá soqta kutikamaña qari churinkunata wachakuchkaptiyqa —nispa.

Chaymi suticharqa #Hebreo simipi Zabulon ninanqa “regalay” otaq “llumpay valeq” ninanmi.Zabulonwan.

21Chaymantam Lea wachakururqa warmi wawanta, paytam suticharqa Dinawan. 22Ichaqa Diosmi Raquelmanta mana qonqarurqachu chaymi mañakuyninta uyarispan yanaparqa wachakuq kananpaq. 23Wiksayakuruspam wachakururqa qari wawanta hinaspam nirqa:

—Penqakuyniytam Dios chinkarachin —nispa.

24Hinaspam suticharqa #Hebreo simipi Josey ninanqa “qechuy” otaq “achkata qoy” ninanmi.Joseywan:

—Tayta Dios yapawachun huk qari wawatawan —nispa.

Jacobwan Laban engañanakusqankumanta

25Joseyta Raquel wachakuruptillanmi Labanta Jacob nirqa:

—Aviawayña, ripusaqñayá maymi kasqay llaqtaman. 26Ripukunaypaqyá kachariy warmiykunatawan churiykunata. Paykunaraykum servirqayki, qamqariki yachankim imaynam servisqaytaqa —nispa.

27Chaymi Labanñataq nirqa:

—Ama hina kaspaykiyá amaraq ripukuychu, adivinaspam sumaqta yachani qamrayku Tayta Dios bendeciwasqanta. 28Niykuwayá ¿haykatataq ganayta munanki? ñoqaqa pagapusqaykim —nispa.

29Chaymi Jacobñataq nirqa:

—Yachankim imaynam qam servisqaytaqa chaynataq imaynatam animalnikikuna waqaychasqaytapas. 30Manaraq kaypi kaptiyqa asllam kapusurqanki. Chayamusqaymantam ichaqa Tayta Dios bendecisurqanki chaymi achkallataña mirarun. ¿Haykapiñamá ñoqaqa llamkasaq familiaykunapaqqa? —nispa.

31Chaymi Labanñataq nirqa:

—¿Imatataq pagasqayki? —nispa.

Hinaptinmi Jacob nirqa:

—Ama imatapas pagawaychu. Kaqllam michimusaq ovejaykikunata, kunan nisqayta munaptikiqa. 32Ñoqam kunan kanchaykita qawamusaq hinaspam llapallan cheqchi ovejakunata, muru ovejakunata chaynataq llapallan malta yana carnerokunata sapaqchamusaq, sapaqchasaqtaqmi muru cabrakunatawan cheqchi cabrakunatapas, chaykunam ñoqapa pagoy kanqa. 33Qepa punchawkunata qanmanta pagoy chaskinay chayamuptinmi qawanki kanchaypi cabrakunaqa chiqchikunalla hinaspa murukunalla kasqanta chaynataq carnerokunapas yanakunalla kasqanta, mana chayna kaptinqa suwapaqmi hapiwanki. Chaynapim honrado kasqayta yachanki —nispa.

34Chaymi Laban nirqa:

—Arí, chayna nisqaykiman hinayá kachun —nispa.

35Hinaptinmi chay punchawpuni Laban rakirqa allqa chivatokunata, cheqchi cabrakunata, muru cabrakunata otaq yuraqniyoq cabrakunata. Rakirqataqmi yana malta carnerokunatapas, chaykunatam qoykurqa churinkuna michinanpaq. 36Chaymi chay animalkunata qatirqaku Jacobpa kasqanmanta kimsa punchaw puriykama.

Hinaptinmi Jacob michirqa Labanpa animalninkunata. 37Chaymi Jacob kaspikunata kuchururqa kiswar sachamanta, almendra sachamanta hinaspa castaño sachamanta hinaspam chay kaspikunapa qaranta chustururqa raya-rayata. 38Chaymi animalkunapa yaku tomanan artesakunapa hichpanpi churarurqa hinaptinmi yaku tomaq animalkuna chaypi muyanakuqku. 39Animalkunam muyanakuqku chay kaspikunapa ñawpaqninpi hinaspam wachaq allqakunata, cheqchikunata hinaspa murukunata. 40Chay uñakunata rakispanmi Labanpa allqa animalninkunapa hinaspa yana animalninkunapa chinpanman churarqa. Animalninkunataqa manamá taqruchirqachu Labanpa animalninkunawanqa. 41Chaymi poqosqa wiran animalkuna chichukuptin Jacob churaq chay kaspikunata animalkunapa yaku tomanan ladonpi chaynapi chay kaspikunapa ñawpaqninpi chichukunanpaq. 42Umpu animalkuna hamuptinñataqmi mana churaqchu, chay umpukunam karqa Labanpaq, poqosqankunañataqmi karqa Jacobpaq. 43Chayraykum Jacob apuyarurqa anchallataña, paypam kapurqa achkallaña animalninkuna, sirvientenkuna, camellonkuna hinaspa asnonkuna.

Currently Selected:

GENESIS 30: QUEAYA87

Highlight

Copy