GENESIS 31

Jacobpa ayqekuy munasqanmanta

1Jacobmi uyarirurqa Labanpa churinkuna rimasqanta, paykunam nirqaku:

—Jacobqa taytanchikpa llapa kaqninta hapikuykuspam apuyarun —nispa.

2Jacobqa qawarqataqmi Labanpa hukmanyarusqantapas chaynataq manaña ñawpaq hina kasqantapas. 3Chaymi Tayta Dios nirqa Jacobta:

—Ñoqam yanapasqayki, kutikuy taytaykipa kasqan aylluykikunaman —nispa.

4Chaymi Jacob qayachirqa Raqueltawan Leata animalkunawan kasqan hatusman. 5Chaypim paykunata nirqa:

—Qawanim taytaykichikpa hukmanyarusqanta, manañam ñawpaq hinañachu. Taytaypa Diosninmi ichaqa ñoqawan kachkan. 6Qamkunapas yachankichikmi taytaykichiktaqa llapan kallpaywan servisqayta 7ichaqa taytaykichikmi engañawarqa sapa kuti ganancioytapas cambiaspan, aswanqa Diosmi mana munarqachu mana allin rurawananta. 8Taytaykichik Labanmi niwarqa: “Cheqchikunam qampa ganancioyki kanqa” nispa. Chaymi llapallan animalkuna wachaq cheqchikunallata. “Allqakunam kanqa ganancioyki” nispa niwaptinñataqmi allqakunallata wachaq animalkuna. 9Chaynapim taytaykichikpa animalninta Dios qechuruspan qoykuwarqa ñoqaman.

10—Ovejakunapa chichukusqan tiempopim mosqoyniypi rikurqani muyaq orqokunaqa allqakuna, cheqchikuna hinaspa murukuna kasqanta. 11Chaymi Diospa angelnin mosqoyniypi sutiymanta qayawarqa. Hinaptinmi nirqani: “¿Imata, taytáy?” nispa. 12Chaymi payñataq niwarqa: “Qawariyá muyaq llapallan orqokunata. Llapallanmi allqakuna, cheqchikuna hinaspa murukuna. Labanpa tukuy mana allin rurasusqaykitapas rikurqanim. 13Ñoqam kani Betel lawpi rikuriqniki Dios. Chaypim rumiman aceiteta tallirqanki sapaqchanaykipaq hinaspam prometikuwarqanki. Kay llaqtamanta lloqsispayá kutiy aylluykikunapa kasqanman —nispa.

14Chaymi Jacobta Raquelwan Lea nirqaku:

—Manañam taytaykupa wasinpiqa kanñachu herenciaykuqa. 15Qanman rantikuruwasqanku qollqetapas gastakurunñam hinaspam ñoqaykutaqa forastera warmikunata hinaña qawawachkanku. 16Taytaykumanta Diospa qechusqan tukuy imaqa ñoqaykupaqwan wawaykupaqmi. Chaynaqa Diospa tukuy nisusqaykitayá ruray —nispa.

Padan-aram lawmanta Jacobpa ripukusqanmanta

17Jacobmi sillachirqa camellokunaman churinkunata warminkunatawan. 18Hinaspam llapallan animalninkunata otaq Padan-aram lawpi armasqankunata aparikuspan pasakurqa Canaan lawpi taytan Isaacpa kasqanman. 19Labanñataqmi mana chaypichu karqa ovejankuna rutuq pasakusqanrayku. Chaykamam taytanpa taytachankunata Raquel suwarurqa. 20Aram casta Labantam Jacob engañarurqa upallalla ripukuspan. 21Jacobmi ripukurqa lliw kapuqninkunata aparikuspan hinaspam chimparurqa Eufrates mayuta Galaad orqokunaman rinanpaq.

Jacobta Laban qatipasqanmanta

22Kimsa punchawmantañam Labanman willarqaku Jacob ripukusqanta. 23Chaymi Laban ayllunkunapiwan qatirqaku qanchis punchaw puriyta hinaspam hayparurqaku Galaad orqokunapi. 24Hinaptinmi Aram casta Labanman chay tuta Dios rikuriykurqa mosqoyninpi hinaspam nirqa:

—Yanqataq mana allinkunata niwaq Jacobta —nispa.

25Labanmi Jacobta hayparurqa karpankuna sayachisqan Galaad orqokunapi, Labanpas chaypim sayachirqa karpankunata ayllunkunapiwan. 26Chaymi Jacobta Laban nirqa:

—¿Imatataq rurarunki kaynata engañawaspayki? Churiykunatam guerramanta hina presota aparamurqanki. 27¿Imanasqataq upallalla ayqeramurqanki hinaspa engañawaspayki mana willawarqankichu? ¿Manachu aviamuykiman karqa takiwan, tinyawan, arpawan fiestata ruraspa? 28Manamya churiykunatapas nitaq willkachaykunatapas muchaykachimuwarqankichu, loco hinam kaytaqa rurarunki. 29Makillaypim kachkankichik imapas rurarunaypaq. Ichaqa taytaykipa Diosninmi chisi tuta niwarqa: “Yanqataq imatapas niwaq Jacobta” nispa. 30Taytaykipa wasinmanta llakikuspa ripumuspaykiqa ¿imanasqataq taytachaykunataqa suwamuwarqanki? —nispa.

31Chaymi Jacobñataq nirqa:

—Manchakurqaykim churikikuna qechuruwanaykimanta. 32Ichaqa taytachaykikunata pipas suwakamuqqa wañuchunyá, ayllunchikkunapa qayllanpiyá maskakuruy, imaykikunatapas reqsikuspaqa apakuyá —nispa.

Jacobqa manam yacharqachu taytachakunataqa Raquel suwakaramusqanta.

33Labanmi Jacobpa karpanman yaykururqa, yaykururqataqmi Leapa karpanmanpas chaynataq iskaynin sirvientankunapa karpanmanpas ichaqa manam tarirqachu. Leapa karpanmanta lloqsimuspam Raquelpa karpanman yaykururqa. 34Raquelñataqmi taytachakunata hapispa camellokunapa caronan ukuman pakarurqa hinaspam tiyarurqa hawanpi. Labanmi maskarqa Raquelpa karpanta aswanqa manam tarirqachu chay taytachakunataqa. 35Hinaptinmi Raquelñataq taytanta nirqa:

—Taytáy, amayá piñakuychu, killaywan onqospaymi mana hatariyta atinichu —nispa.

Chaynapimá Labanqa maskaspanpas mana tarirqachu taytachakunataqa 36chaymi Jacobñataq piñakuruspan qaqcharqa Labanta:

—¿Ima mana allintataq ruraruni? ¿Imataq huchay sinchita piñakuspa qatipamuwanaykipaqqa? 37Tukuy imaykunata maskaparuspaykiqa ¿wasikipi kaqkunamantaqa imaykikunatataq tarirunki? Churamuy ayllunchikkunapa qayllanman paykuna juzgawananchikpaq. 38Iskay chunka watañam qanwan kuska karqani. Ovejaykikuna, cabraykikunapas manam haykapipas sullurqachu nitaqmi kanchaykimantaqa carneroykitapas mikurqanichu. 39Manam haykapipas purun animalkunapa puchuntaqa apamurqaykichu, chinkaqkunamantapas pagarqaykim, tutapas otaq punchawpas suwasqakunamantaqa mañawaqmi kanki. 40Punchawmi rupaypi ñakarirqani, tutanñataqmi qasa chiripi ñakarirqani, puñuypas manam chayawaqchu. 41Chaynamá wasikipi karqani iskay chunka wata. Chunka tawayoq watam servirqayki iskaynin churikikunamanta, soqta watañataqmi animalnikikunamanta. Sapa kutillam ganancioytapas cambiawarqanki. 42Abrahampa Diosnin otaq taytay Isaacpa respetasqan Dios ñoqawan mana kaptinqa kunanmi mana imayoqta kachaykuwankiman karqa. Ichaqa Diosmi ñakariywan llamkasqayta qawarqa hinaspam chisi tuta qaqchasurqanki —nispa.

Labanwan Jacob contrato rurasqankumanta

43Jacobtam Laban nirqa:

—Kay warmikunaqariki ñoqapa churiykunam, kay qari wawakunapas ñoqapa willkaykunam, kay ovejakunapas ñoqapa ovejaykunataqmi, tukuy kay qawasqaykipas ñoqallapataqmi. Kunanqa manam imanaymanñachu churiykunatawan willkaykunataqa. 44Kunanyá qanwan contratota rurasun testigo hina ñoqanchikpi kananpaq —nispa.

45Chaymi Jacob suytu rumita sayachirqa señal kananpaq 46hinaspam ayllunkunata nirqa:

—Rumikunata huñumuychik —nispa.

Llapallanku rumita montoruspam chaypa ladonpi mikurqaku. 47Chaymi Laban suticharqa Aram castakunapa rimayninpi “Jegar Sahaduta” nispa. Jacobñataqmi suticharqa “Galaad” nispa, Heber casta runakunapa rimayninpi.

48Hinaptinmi Laban nirqa:

—Kay monton rumim kunan kachkan testigo hina ñoqanchikpaq —nispan.

Chayraykum suticharqaku Galaadwan. 49Chaypa huknin sutinñataqmi karqa “Mizpa”. Chaynataqa suticharqaku Laban kaynata nisqanraykum:

—Tayta Diosyá qawawasunchik qamtawan ñoqata manaña rikunakuptinchikpas. 50Churiykunata ñakarichispa huk warmikunatawan casaraptikiqa manaña pi qawawaptinchikpas Diosmi testigo kanqa ñoqanchikmanta —nispa.

51Labanqa nirqataqmi:

—Kay montonasqa rumikunapiwan kay churasqay suytu rumim ñoqanchik ukupi 52kanqa testigokuna hina. Manam pasamusaqchu qanman, qampas manataqmi pasamunkichu ñoqaman mana imananakunanchikpaq. 53Mana chayna kaptinqa Abrahampa, Nacorpa Diosninyá otaq abuelonkunapa Diosninyá arreglawasunchik —nispa.

Hinaspam Jacob juramentarqa taytan Isaacpa respetasqan Diosrayku. 54Chaymi Diospaq animalkunata wañuchispan Jacob kañarqa hinaspam ayllunkunata qayaspa mikurqaku. Mikuruspankum chay tuta puñurqaku chay orqopi.

55Labanmi tutapayta hatarispan muchaykurqa churinkunatawan willkankunata. Paykunapaq bendicionta mañakuspanmi kutikurqa maymi kasqanman.

Currently Selected:

GENESIS 31: QUEAYA87

Highlight

Copy