Yʉánɛs 20

Yésʉs, nyɨ́ pah ɨ́ soo

(Matthieu 28.1-10; Marc 16.18; Luc 24.1-12)

1Ɨ́ dwiné mɛ́n sóno, edúrʉ́ʉ́ dína sí, Maria, silě Magdalâ, nzě tô nko sóo nyaá. Nyě kǎ tó bee ó, ekóʼ, lɨ́ pɛʼɔɔ ɨ́ num sóo. 2Nye ntɔ̂ʼ búla e kám, tó beě Simon Pétrus, bé e nyʉ́ʉ́ mpʉ́n, waá Yésʉs á bu kpɛl nyá. Nye ó: «Bɨ́ pɛʼ Tî Yésʉs ɨ́ soo! Bɨ̌h bé agʉ́ǎ nko bê tó e né yɨ́!»

3Pétrus, bé e mpʉ́n waá nzě tóŋɔɔ̌ nko sóo. 4Bɨ́bɛ̂h obá tóŋɔɔ míkám. Nó ó, nyʉ́ʉ́ mpʉ́n á be ɨ́ buú lɨ̌ kám, laǎ Pétrus. Nye ó b'á nyɛɛ to pyâl esôʼ ɨ́ soo. 5Nye nzě kúrwo sí lɨ́ edéŋle sóo, nzě beě njɨ mimyɔʼ mí dɨlá myé omér. (Mimyɔʼ myaá, myé á be ó misɛ́á e ndɔ́má kán ɨ́ pumopumo.) Nyɨɛ á bé anî tʉ́ŋlʉ̌ soo. 6Simon Pétrus kǎ nzě pyâl, nî tʉ́ŋlʉ̌ soo, bee ntémé mimyɔʼ mí dɨlá 7ndu e kán wé á be Yésʉs ɨ́ lʉ̂ wɨ́. Kán waá, wé á bé abě gúmó mímyɔʼ mí dɨlá, myé á be yɨ́. Wé á be ó ndíblá, komá lɨ́ empah. 8Mpʉ́n á nyɛɛ pyâl ɨ́ soo nyá, nye ntémé nzě nî, nzě bee, ntɔ̂ʼ kʉ́ bûʼla. 9(Yé á be ó, ompʉ́n dína apǎ gwá jóʼǒ mpʉ mícɛmá myé á boo lɛ́ɛ ó, “Nye á si jala le epah, duho lɨ́ odwe” yɨ́.) 10Bê nzě báʼǎ tóŋɔɔ ɨ́ mediá mɔ́ɔ́.

Yésʉs, bé e Maria, silě Magdalâ lɨ́ ebeela

(Marc 16.9-11)

11Maria á tityɛ̂b ó, bǎʼ e soo, lɨ́ ejɨ. Nye dína lɨ́ ejɨ nɛ́ɛ: nye nzě kúrwo sí, lɨ́ edéŋle sóo tʉ́ŋlʉ̌, 12nzě bee bééngeles obá e mikán ɨ́ pumo pumo. Bé á be ó mindîndǐl gúmó múú mé Yésʉs, wé á be yɨ́, nyâʼ nkǒ lʉ̂, nyʉ́ʉ́ nko mékʉ̌. 13Jɔʼ yaá ó bééngeles bé á dî e né ó: «Mʉmá, gǒ jɨ̌ yé?»

Nye ó: «Bɨ́ nzě pɛʼ tî wǎm wâ; me l'agʉ́ǎ nko bê tó e né yɨ́!»

14Nyé osí lɛ́ɛ bé nó, nyé ká dwira nɛ́ɛ: nyě beé ó, Yésʉs náǎ tîtyěl! Sâ gwár, nye á bé agʉ́a ó, yé ó Yésʉs. 15Yésʉs nzě dî e né ó: «Mʉmá, gǒ jɨ̌ yé? Nzé ntɔ̂ʼ gó pʉ́gʉ́ di lɨ́ esáa?»

Mʉmá waá á jwɨʼ ó, yé á be ó mbɔʼlʉ mesoo. Nye e né ó: «Dâ ɛ̌, yé bé go ô nkɛ́ɛ́ múú wé, tô e wé gúú pâʼ nó, lɛ́yɨ́ɨ́ mê, me ótó nʉa wê.» 16Yésʉs, nye e né ó: «Maria!»

Nye nzě báʼǎ dwirǎ nkǒ Yésʉs á be yɨ́. Nye e né ɨ́ lwǐb ébrœ̂ ó: «Rabunî!»

(Díe laá, lé páʼlɔ́ɔ́ ó, “lɛ̂ʼla”.)

17Yésʉs, nye e né ó: «Sá akǎ mɛ̂r mê, ebě, me dína apǎ bɨ́nɔɔ ɨ́ jʉ́o kʉ́, tô kwá mé Dâ. Tóʼ, tó lɛ́ɛ bɨ́ɔɔ́ bâm ó, me mû ó lɨ́ ebére, búlǎ nko Sɔ́ŋ wǎm dí yɨ́. Nye ntémé, nye ó sɔ́ŋ wɨ́n. Nye ó Nzyɛ̌m wǎm. Nye ó Nzyɛ̌m wɨ́n ntémé.»

18Maria, silě Magdalâ ntɔ̂ʼ tó lɛ́ɛ ómpʉ́n ó: «Mɨ́ bee Tî Yésʉs!» Nye ntɔ̂ʼ lɛ́ɛ bé sá nyé á lɛ́ɛ nye yɨ́.

Epyál mé Yésʉs kwá ompʉ́n bé

(Matthieu 28.16-20; Marc 16.14-18; Luc 24.36-49)

19Ɨ́ bíí kʉ̌ʼ ɨ́ móhó sóno ngwár waá, ompʉ́n bé, bé á bě sí tó syɛŋa ɨ́ gúú mbɛ̌r, pɨrɔɔ mébê e mengʉŋ, ebě, bé á be ó lɨ́ ekpɛ́ɛ óYúden. Yésʉs nzě pyâl, tyɛ̂b páʼ nyɔ́ɔ́. Nye ó: «Mepyɛbla, mé díʼee bɨ̌n ɨ́ miléme.»

20Jɔʼ nyé á be ɨ́ lɛ́ɛ bé nó yɨ́, nye nzě lɛ̂ʼle bé mebó mé ti e bimpah byé. Ompʉ́n bé kʉ́ nzě buú soho lɨ́ ebee Tî Yésʉs. 21Yésʉs ntɔ̂ʼ báʼǎ lɛ́ɛ e bé ó: «Mepyɛbla, mé díʼee e bɨ̌n. Mpʉ Sɔ́ŋ wǎm á lómo me yɨ́, jwɨʼ gwár e gwár yaá ntémé ó mɛ̂m dí elómo bɨ́n yɨ́.»

22Jɔʼ nyé á be ɨ́ lɛ́ɛ bé nó yɨ́, nye ntɔ̂ʼ gúmlo bé ngûl ɨ́ menyʉ̂l. Nye ó: «Biʼee gá Sísǐm mé Nzyɛ̌m! 23Bɨ́n ópɛʼ bíbaa bɨ́n á niʼe ɨ́ lɔ̌b syóm mé nyʉ́ʉ́ mʉ̂r bí nó, Nzyɛ̌m ntémé ópɛʼ bíbaa nyé mʉr tɨ̂ʼ á niʼe ɨ́ lɔ̌b mísyóm myaá bí. Mʉr nyɨnyɛ̂h bɨ́n óbe, apɛʼ bíbaa bí ébébe nyá, Nzyɛ̌m ntémé, nye ákóʼó pɛʼ nyé byaá byé.»

Yésʉs, bé e Thomas

24Thomas, mʉr ngwár ɨ́ sɔ́má ómpʉ́n kám le obá, waá bé á jɨjébe “Egbâh” nyá, á bé abe tɨ̂ʼ ɨ́ jɔ̌ʼ Yésʉs á pyâl yɨ́. 25Bʉ́ʉ́ ómpʉ́n, bé e né ó: «Bɨ̌h bé ó sí bee Tî Yésʉs!»

Thomas, nye e bé ó: «Mé bé abee mépɨ́ɨ́ bínzâŋ ɨ́ mebó mé, lâʼ diné yâm tɨ̂, swam ntémé mbó wâm ɨ́ mpah yé nɛ́ɛ: me l'abûʼlǎ lɔ́ɔ́ wɨ́n.»

26Sóno ntinɨ̂, nyé osí laa, ompʉ́n mé Yésʉs báʼǎ tó syɛŋa ɨ́ mbɛ̌r waá. Thomas á be ó tɨ̂. Mebê, mé á be ó mipɨrá e mengʉŋ. Yésʉs nzě pyâl, tyɛ̂b páʼ nyɔ́ɔ́. Nye ó: «Mepyɛbla, mé díʼee bɨ̌n ɨ́ miléme!» 27Nye e Thomas ó: «Ntaá nzě lâʼ diné yô wâ. Jwɛ́ʼɛ́ɛ́ mékœ́h mâm. Swamaǎ mbó gô ɨ́ mpah yâm. Go e gwáʼ mésónó. Go e dí mbûʼla.» 28Thomas nzě lɛ́ɛ e né ó: «Tî wǎm! Nzyɛ̌m wǎm!» 29Yésʉs, nye e né ó: «Nzê gǒ bûʼlá ó, ebě, gʉ́ bee mé ɛ̌? Metyɛʼ me mpóm, mé buú buo ó e bʉr o ngá dyêʼ koo e me, bɨ́ɛ yɨ́ɛ apǎ bee mé bá.»

Lʉ́ ékǎn e mékaná mâ

30Yésʉs á be ɨ́ báʼǎ sâ mʉ́ʉ́ mésimá ɨ́ buo buo ɨ́ míh mé ómpʉ́n bé. Mɨ́mɛ̂h, mé abe mícɛmá ɨ́ mekaná mâ. 31Sá mé mû sí cɛma bɨ́n ɨ́ mekaná mâʼ yɨ́, yé ó, bɨ̌n bûʼlaa ó, Yésʉs ó dí Mʉ̌r Nzyɛ̌m á lœm múló mé jwɨ́ɨ nyá, nye ntémé, nye ó Mwân mé Nzyɛ̌m. Bɨ́n sí dyɛ̂ʼwo e né nó, bɨ̌n bé óbǐ twiʼ ɨ́ nzɨ̌ nyé.

Currently Selected:

Yʉánɛs 20: ozm

Highlight

Copy