Yʉánɛs 19

1Pilátos ntɔ̂ʼ lómo bísója byé, dwe byé nkul ó, byé nʉ́aa Yésʉs, le eŋmɛ́hɔɔ nyé mingáhá. 2Bisója ntɔ̂ʼ tiɔɔ nyé káráá e mindwínɨ́nɨ́, swamɔɔ nyé yǎ ɨ́ lʉ̂. Byê nzě bórɔɔ nyé kán, e nyʉ̂l kaá e kaá. 3Byé á be lɨ́ esîhle bǎʼ e né. Bé e né ó: «Njwɨ́ɨ oYúden, bɨ̌h bé lɨ́ ebâʼ e go.»

Byé ntɔ̂ʼ ŋmɨŋmɛ̂h nyé mempɛ̂h.

4Pilátos nzě báʼǎ tô kʉ̌l. Nye le entumo e bʉ̂r ó: «Jóʼláá gâ: mě nzé bɨ́n e mʉr nyâʼ kâʼ kʉ̌l ó, bɨ̌n gʉ́ŋaa ó, mɛm, mé abee ó, nyě e mebě ó, nye ɨ́ jala le edwe.» 5Yésʉs nzě tô kʉ̌l e káráá, pená e mindwínɨ́nɨ́, ɨ́ lʉ̂ ndu e kán kaá e kaá ɨ́ nyʉ̂l. Pilátos, nye e bé ó: «Mʉr waá bê!»

6Mbeá ójwɨ́ɨ o mpáh Nzyɛ̌m ndu e bisója bí óYúden, bé á bee nye yɨ́, bê nzě lwib kʉ́kʉ́. Bé ó: «Bomlaa nyé ɨ́ kolôs! Bomlaa nyé ɨ́ kolôs!» Pilátos, nye e bé ó: «Bɨ̌n bʉr o tɨ̂, nʉaa gá nye bé. Bɨ̌n a bómló nyé ɨ́ kolôs, ebě, ɨ́ wâm pâʼ, mé abee ó, nyě e mebě dí ó, nye ɨ́ jala le edwe tɨ̂ʼ má.» 7OYúden, bé e né ó: «Bɨ̌h bé e lʉ́ʉ́ étié. Etié laá, lé lɨ́ elɛ̂ʼle ó, bɨ̌h jʉ́ʼoo nye, ebě, nye á be ó sí bánǎ lɛ́ɛ ó, nye ó Mwân mé Nzyɛ̌m.»

8Jɔ̌ʼ Pilátos á jóʼo mekǎn maá yɨ́, ekɛ̂n kʉ́ nzě swɨɨ nyé ɨ́ nyʉ̂l, 9nye nzě báʼǎ nî mbɛ̌r, tó dî e Yésʉs ó: «Go á pʉgʉ duho wó?»

Yésʉs ayala. 10Pilátos, nye e né ó: «Nzê gó akpɛl élwib e me ɛ̌? Gó agʉ́a ó, mě e nkul ebîr gó, nkʉ̂ ntémé lɛ́ɛ ó, bé bómlaa go ɨ́ kolôs kʉ́?» 11Yésʉs, nye e né ó: «Nzyɛ̌m óbe, adwe nkûl nó, gó abe e nkul esâ mé sɔ̂ʼ. Sâ gwár, mʉr bɛ́má mé nyá nyɨɛ, nye ólîʼ e mebyaʼ, laa gô.»

12Táare ɨ́ jɔʼ yaá, Pilátos nzě sáa ménzɨ̌ mé ébîr Yésʉs. OYúden bɨ́ɛ kʉ́ jaá bɨ̂r métyêl kʉ́kʉ́ ó: «Gó óbáná kʉ́ bîr mʉ̂r nɨ̌ nó, lɛ́ɛ́, gó akǎ be só mé njwɨ́ɨ gá wɨ́ná, Kɛ́ɛza! Mʉr nyɨnyɛ̂h dí elɛ́ɛ ó, nye ó njwɨ́ɨ nyá, nye ó ntɨ̂m e mbɨn mé Kɛ́ɛza.»

13Jɔ̌ʼ Pilátos á jóʼo nó yɨ́, nye nzě pyêl Yésʉs kʉ̌l, nzě di ɨ́ diá tîʼ milɔ̌b ɨ́ gúmó bé á jɨjébe “Ebɛhɛɛ e Mékóʼ” yɨ́. (Ɨ́ lwǐb ébrœ̂, yé ó “Gabáta”.) 14Yé á be ó, nzɔɔ Páska, nyé osí lîʼ móhó ngwár, kúnókúno e témé móhó. Pilátos, nye le oYúden ó: «Beyɨɨ gá njwɨ́ɨ wɨ́n ɛ̌?»

15Bê nzě báʼǎ táare ébʉ̂ bítím. Bé ó: «Jʉ́ʼóó nyê! Jʉ́ʼóó nyê! Bomlaa nyé ɨ́ kolôs!»

Pilátos, nye e bé ó: «Nzê ó, me bómlaa njwɨ́ɨ wɨ́n ɨ́ kolôs ɛ̌?»

Ojwɨ́ɨ o mpáh Nzyɛ̌m, bé ó: «Bɨ̌h bé abe e nyʉ́ʉ́ njwɨ́ɨ píe koo mé Kɛ́ɛza.» 16Pilátos ntɔ̂ʼ dwe bé Yésʉs, ó bé tô bomlo nyé ɨ́ kolôs.

Yésʉs lɨ́ ebomlɔɔ ɨ́ kolôs

(Matthieu 27.32-44; Marc 15.21-32; Luc 23.26-43)

17Bisója nzě nʉǎ Yésʉs, bé le onɔ́ɔ́ ntɔ̂ʼ duhǒ nkana, Yésʉs mʉr tɨ̂ʼ lɨ́ enkɛ́ɛ̌ kolôs yé. Bé le onɔ́ɔ́ nzě tóŋɔɔ̌ gúmó bé á jɨjébe “Bʉ̌n Lʉ̂” yɨ́. (Ɨ́ lwǐb ébrœ̂, yé ó “Golgotâ”.) 18Ɨ́ gʉ̂ʼ ó, bísója, byé á to bomlo Yésʉs e binzâŋ, bɨ́nɔɔ nyé ɨ́ kolôs kʉ́ yɨ́. Byé á si bomlo ntémé bʉ́ʉ́ bʉ̂r obá ɨ́ bikolôs biswîh bibá: nyâ, ɨ́ wɨ̂ʼ pâʼ; nyʉ́ʉ́, ɨ́ gúú pâʼ; Yésʉs témé tɨ̂.

19Pilátos nzě nʉa ébɔ́m, cɛma tɨ̂, nzě pɛn lé ɨ́ kolôs mé Yésʉs. Lé á be e micɛmá ó:

Yésʉs, mʉr Nazarɛ̂t, Njwɨ́ɨ oYúden.

20OYúden ɨ́ buo buo, bé á be ó lɨ́ eláa mícɛmá myaá, ebě, gúmó bé á bomlo Yésʉs e binzâŋ ɨ́ kolôs, bɨ́nɔɔ nyé kʉ́ yɨ́, yé á be ɨ́ kúnwo e nkana, le ntémé ó, micɛmá myaá, myé á be ó lɨ́ lwǐb ébrœ̂, le lwǐb latɛ̂n ti e lwǐb grɛ̂k. 21Nó ó, ojwɨ́ɨ o mpáh Nzyɛ̌m, bé á nze lɛ́ɛ e Pilátos ó: «Ayɨ́ cɛmǎ njɨ ó: “Njwɨ́ɨ oYúden.” Kʉ́ gwá cɛma ntémé mbɨ̂mbɨá ó: “Mʉr nyâʼ á bana kʉ lɨlɛ́ɛ ó: «Me ó Njwɨ́ɨ oYúden.»”» 22Pilátos, nye e bé ó: «Sá mɛ̂m mû sí cɛma yɨ́, mɨ́ cɛma!»

23Jɔʼ bísója, byé á sil ebomlo Yésʉs ɨ́ kolôs yɨ́, byê nzě nʉa míkán myé, nzě kabɔɔ ménkɔb menâ, sója yɨ́yɛ̂h lɨ́ ebi nyé nkɔ̂b. Byê nzě nʉǎ dur yé. Yé á bé abě lɛrá. Yé á be ó kán ntinɨ̂, tiá táare kʉ́, pyâl sí. 24Jɔʼ yaá ó bé á nze lɛ́ɛ ó: «Mɨná bé ayɨ́ nya gá dur yɨ̂. Mɨná dôʼ gá yé ebya, mɨná nkʉ̂ gʉ́a gá mʉr ngá nʉa yé nyá.»

(Yé á syɛ́ɛ nó ó, sá dí cɛmá ɨ́ Mekaná mé Nzyɛ̌m yɨ́, yé díraa. Yê cɛmá ó: Bé á si kabla mikán myâm páʼ nyɔ́ɔ́. Bê nzě dǒ dur yâm ebya. ) Ntɔ̂ʼ nzě sáŋɔɔ ntémé nó.

25Bǎʼ e kolôs mé Yésʉs, nyɔ̌ŋ wé á be ó tɨ̂, bé e mɨ́ɔɔ́ ti e Maria, mʉmá mé Klopâs, bé e Maria, silě Magdalâ. 26Yésʉs nzě bee nyɔ́ŋ lɨ́ etyɛ̂b bǎʼ e né, bé e mpʉ́n nyé á bu kpɛl nyá. Nye e nyɔ̌ŋ wé ó: «Mʉmá, bee mwánǒ?» 27Nye e mpʉ́n wé ó: «Bee nyʉ́ŋ ɨ́?» Táare ɨ́ jɔʼ yaá ó mpʉ́n waá á nze nʉa nye, dil nyé ɨ́ mbɛ̌r wé yɨ́.

Eswie mé Yésʉs

(Matthieu 27.45-56; Marc 15.33-41; Luc 23.44-49)

28Píe tɨ̂, mpʉ̌ Yésʉs á gʉ́a ó, sá yɨ́yɛ̂h, yé á be ó, yé mû sí síe yɨ́, nye ntɔ̂ʼ lɛ́ɛ ó: «Me lɨ́ ejóʼǒ dwéh médíbé.» Nye á lɛ́ɛ nó ó, sá dí cɛmá ɨ́ Mekaná mé Nzyɛ̌m yɨ́, yé díraa. 29Mpɨ̌ á be ó tɨ̂ʼ e kɛ̌ʼla ményoʼ. Bisója nzě nʉa éponge, dubɔɔ ɨ́ menyoʼ maá, pɛnɔɔ yé ɨ́ mâ lɨ́ ésɔp, nzě tyenɔɔ nyé yǎ bǎʼ e num, ó nye dúʼoo mê. 30Jɔ̌ʼ Yésʉs á sil edû bikɛ̌ʼla ményoʼ byaá yɨ́, nye ó: «Sá yɨ́yɛ̂h, yɨ́ lwɨ́ŋlɨ!» Nye nzě gœ̌r lʉ̂ sí, nzě dwě Nzyɛ̌m sísǐm wé.

Mʉr bisója lɨ́ elúmǒ Yésʉs ekʉá ɨ́ bimpah

31Yé á be ó móhó ti-tír. Nó ó, oYúden, bé á bé akpɛl ó, bʉr líʼɔɔ ɨ́ bikolôs ɨ́ móhó sábat. Bê nzě tó díŋɔɔ̌ Pilátos ó, bé tô búʼo bʉ̂r baá mekʉ̌. Bé opɛʼ bé ɨ́ bikolôs. 32Ɨ́ bʉr obá bé á be mimbomlá ɨ́ bikolôs kʉ́, bé e boo Yésʉs bá, bisója ntɔ̂ʼ búʼɔɔ mʉ̂r esôʼ mekʉ̌ ti e waá nyʉ́ʉ́. 33Jɔʼ byé á ka pyâl gúmó Yésʉs á be yɨ́, byé kǎ kœb ó, nyé osí boó dwe. Sâ yaá ó, byé á be akǎ búʼo nyé mekʉ̌ yɨ́. 34Damá jóʼo nó, yʉ́ʉ́ sója, yé á si lúmo nye ekʉá ɨ́ bimpah. Tólɔ́m métié ndu e medíbé ntɔ̂ʼ sâh.

35(Mʉr dí eboʼlo bísyɛ́ɛla bínɨ̌ nyá, nye ó mʉr á bě sí kʉ́ bee byé nyá. Sá nyé dí eboʼlo yɨ́, yé kʉ́ be ó tyeetye. Nye ntémé, nye lɨ́ egʉ́a ó, nyě lɛ́ɛ́ ó otyeetye, ó bɨ̌n bûʼlaa. 36Bisyɛ́ɛla bínɨ̌, byé á syɛ́ɛ nó ó, péh Mékaná mé Nzyɛ̌m, yé díraa. Yê cɛmá ó: Bé ákóʼó búʼo nyê, damá bě dwehé gwár. 37Yê cɛmá ntémé ɨ́ Mekaná mé Nzyɛ̌m ó: Bé ógwá bee mʉ̂r bé á lúmo ekʉá, ekʉá kpâhla nyá. )

Dɨlá mé Yésʉs

(Matthieu 27.57-61; Marc 15.42-47; Luc 23.50-56)

38Píe tɨ̂, Yóseb, mʉr Arimatê, nzě dî e Pilátos mʉ́ʉ́ mé Yésʉs, ó nye tôʼ dɨl wé ɨ́ soo. (Yóseb á be ó mpʉ́n mé Yésʉs, á dyɛ̂ʼwo e né ɨ́ mesǒ nyá, ebě, nye á be ó lɨ́ ekpɛ́ɛ óYúden.) Pilátos nzě kam. Yóseb ntɔ̂ʼ nkɛ́ɛ̌ múú mé Yésʉs, tô e wê. 39Nikodɛ́mos, mʉr á nyɛɛ to bee Yésʉs ɨ́ pum nyá, nzě nʉa múló bé dí elœm mímúu má. Yé á be ó okílo ó mirrhe nzyɛŋá le aloɛ̂s, kúnókúno e mekám ménâ e metɛ̂n. 40Bé e Yóseb nzě nkɛ́ɛ̌ múú mé Yésʉs, lœmɔɔ wé mǐr waá, le edíblɔɔ myé ɨ́ mimyɔʼ mí dɨlá. (Mimyɔʼ myaá, myé á be ó misɛ́á e ndɔ́má kán ɨ́ pumopumo. Bé á sâ nó ó, lɨ́ edû métum mé óYúden, ɨ́ mbi bé dí esâ dɨlá wɨ́.) 41Gúmó bé á bomlo Yésʉs ɨ́ kolôs yɨ́, pemé, yé á be ó tɨ̂. Ɨ́ pemé yaá, yé á be ó, le edwán é sóo, gúú múu dína apǎ debe tɨ̂. 42Mpʉ yé á be, móhó nzɔ́ɔ, wé osí lîʼ élû egwár yɨ́, bê nzě tó dɨlɔɔ̌ múú mé Yésʉs ɨ́ soo nyaá, á be kúnókúno nyɨ́.

Currently Selected:

Yʉánɛs 19: ozm

Highlight

Copy