Yʉánɛs 21

Yésʉs lɨ́ enyɨ̂n kwá ompʉ́n nzaangbá

1Jɔʼ nzě bá laa. Yésʉs nzě báʼǎ pyâl gúmó ómpʉ́n bé, bé á be yɨ́, ɨ́ mâŋ bé á jɨjébe “Tiberiâs” má. Nye á kœb bé ó, mbi wɨ̂: ompʉ́n bé, bé á be ó sɔ́má gwár. Bé á be ó 2Simon Pétrus, Thomas (waá bé jɨ́jébé “Égbâh” nyá), Natanaɛ̂l (mʉr Kanâ, sí Galilê), bwán mé Zebedê ndu e bʉ́ʉ́ ómpʉ́n mé Yésʉs obá. 3Simon Pétrus, nye e bé ó: «Me mû ó lɨ́ etó syɛb ósû.»

Bé e né ó: «Bɨ̌h ntémé bé ónze.»

Bê nzě tó pyâl lɨ́ ebʉ́m é mâŋ, kalwɔɔ ɨ́ byɛ̂l. Pǔm nɨ̌ wɨ́wɛ̂h, bé á bé ajʉ̂ sɔ̂ʼ. 4Ádwií ɨ́ melɔ́ma mé mɛ́n nɛ́ɛ: bê nzě beě Yésʉs lɨ́ etyɛ̂b lɨ́ ebʉ̂m laá. Sâ gwár, ompʉ́n bé, bé á bé adweʼe nyê. 5Yésʉs, nye e bé ó: «Bwân ɔ́, bɨ̌n bé abe e mede, yé abe nó ɛ̌?»

Bê nzě kam ó: «Eee!»

6Nye ó: «Guhaa gá bé ontâm ɨ́ páʼ mbó éjʉ̂m. Bɨ̌n bé óbee.» Bê nzě guho óntâm. Bé á bé akǎ koʼo édulo wé ɨ́ medíbé, wé osí lóno lɨ́ osû. 7Mpʉ́n Yésʉs á be ɨ́ buú kpɛl nyá, nye e Pétrus ó: «Tî Yésʉs ó nɨ̌!»

Jɔ̌ʼ Pétrus á jóʼo ó, “Yé ó Tî Yésʉs” yɨ́, nye ntɔ̂ʼ bwâr kʉ̂r wé, ebě, nye á be ó suswáh. Nye nzě guho nyʉ̂l ɨ́ medíbé. 8Bʉ́ʉ́ ómpʉ́n ntɔ̂ʼ dúʼo byɛ̂l, lɨ́ enze le edulo óntâm lwɨ́ŋlá le osû. (Bé á bé abuú cɛra le ebʉ̂m, bɛ̌m be óméra nter.) 9Jɔʼ bé á sulo ɨ́ byɛ̂l, bére tín yɨ́, bé kœb ó, duró, le sû tɨ̂ʼ lɨ́ ebɨ́e ti e blêr. 10Yésʉs, nye e bé ó: «Ntáʼ gá e bʉ́ʉ́ ósû ɨ́ baá bɨ̂n jʉ́ ónɨ̌.»

11Simon Pétrus nzě kalwo ɨ́ byɛ̂l, dwih óntâm lwɨ́ŋlá le osú onɨ́nɨ́ɨ́ nter e mekám métɛ̂n le osú ólɛ̂l. Damá bě bím ósû baá, ontâm, wé á bé anyɛɛ. 12Yésʉs, nye e bé ó: «Ntaá nzě de gâ.» Abe e mpʉ́n ngwár á dî e né ó: “Yê gua nzé?” Ebě, bé á be ɨ́ gʉ́a ó, yé ó Tî Yésʉs. 13Yésʉs nzě nʉǎ blêr, pɛ̂ʼ bé yǎ, nzě dwe ntémé bé osû. 14Yé á be ó jɔʼ lɛ̂l Yésʉs á pyâl gúmó ómpʉ́n bé, bé á be yɨ́, píe pahá nyé á pah ɨ́ soo wɨ́.

Yésʉs, bé e Pétrus

15Jɔʼ bé á sil ede yɨ́, Yésʉs, nye e Simon Pétrus ó: «Simon, mwân mé Yʉánɛs, nzê gʉ́ kpɛl mê, laǎ bím bʉ̂r bâʼ ɛ̌?»

Nye nzě kam ó: «Dâ ɛ̌, go lɨ́ egʉ́a ó, me lɨ́ ekpɛl gô.»

Yésʉs, nye e né ó: «Baʼlaa bwá bínteme bâm.»

16Nye nzě báʼǎ dî e né ɨ́ jɔʼ mbá ó: «Simon, mwân mé Yʉánɛs, nzê gʉ́ kpɛl mé ɛ̌?»

Nye e né ó: «Eee, Dâ, go lɨ́ egʉ́a ó, me lɨ́ ekpɛl gô.»

Yésʉs, nye e né ó: «Baʼlaa bínteme byâm.»

17Píe tɨ̂, nye nzě báʼǎ dî e né ɨ́ jɔʼ lɛ̂l ó: «Simon, mwân mé Yʉánɛs, nzê gʉ́ kpɛl mé ɛ̌?»

Pétrus nzě jóʼo ébúʼ ebě Yésʉs á baʼa dî e né ɨ́ jɔʼ lɛ̂l ó: “Simon, mwân mé Yʉánɛs, nzê gʉ́ kpɛl mé ɛ̌?” Nye e né ó: «Dâ ɛ̌, go lɨ́ egʉ́ǎ sá yɨ́yɛ̂h. Go lɨ́ egʉ́a ntémé ó, me lɨ́ ekpɛl gô.»

Yésʉs, nye e né ó: «Baʼlaa bínteme byâm.» 18Me lɨ́ elɛ́ɛ gó lɨ́ otyeetye, ɨ́ jɔʼ gó á be, go dína loʼo yɨ́, go mʉr tɨ̂ʼ ó b'á tityeele kaná gǒ, tô nko gó á kpɨkpɛl yɨ́. Sâ gwár, ɨ́ jɔʼ gó ngá jwɨm yɨ́, go óbɨ̂r mébô, mʉr swîh nzě tyeele gó kaná, tô e go nko gúa dí akpɛl étô yɨ́. 19(Yésʉs á lwib nó ó, lɨ́ elɛ̂ʼlě mbi éswiě Pétrus ngá dwe wɨ́. Eswie laá, lé ódwě Nzyɛ̌m kûm.)

Yésʉs, nye e né ó: «Dúʼóó mê.»

Yésʉs, bé e mpʉ́n nyé á bu kpɛl nyá

20Jɔ̌ʼ Pétrus á dwira píhe yɨ́, nye nzě bee mpʉ́n Yésʉs á be ɨ́ buú kpɛl nyá, lɨ́ enze píhe. (Nye ó b'á dyêʼ lʉ̂ wé ɨ́ bɨr mé Yésʉs ɨ́ jɔʼ bé á be lɨ́ ede ɨ́ nzɔɔ yɨ́. Nye ntémé ó b'á dî ó: “Dâ ɛ̌, nzé óbɛ́ma gô?”) 21Pétrus nzě bee nyê. Nye e Yésʉs ó: «Dâ ɛ̌, yé yɨ́ɛ ngá pyâl waá nyâʼ ɛ̌?» 22Yésʉs, nye e né ó: «Mé sí kpɛl ó, nye díʼee, tó pyâl ɨ́ jɔʼ mé óbáʼǎ nze yɨ́ nɛ́ɛ: gó e wáǎ lɔ̌b tɨ̂? Gua, dúʼóó mê.»

23Táare ɨ́ jɔʼ yaá, lɔ́ɔ nzě myaŋla ɨ́ sɔ́má óbûʼla ó, mpʉ́n waá, nye ákǎ dwe. Tó kœb ó, Yésʉs á bé alɛ́ɛ̌ Pétrus ó: “Nye ákóʼó dwe.” Nye á lɛ́ɛ ó: “Mé sí kpɛl ó, nye díʼee, tó pyâl ɨ́ jɔʼ mé óbáʼǎ nze yɨ́ nɛ́ɛ: gó e wáǎ lɔ̌b tɨ̂?”

24Mʉr dí eboʼlo le ecɛma bísá bîʼ nyá, nye ó mpʉ́n mé Yésʉs waá. Bɨ̌h bé lɨ́ ekʉ́ gʉ́a ó, bisá nyé dí eboʼlo bí, byé ó tyeetye.

25Yésʉs á be ɨ́ sâ byúú bísyɛ́ɛla ɨ́ buo buo. Bé cɛ́má bíbyɛ̂h gúgwár gúgwár nɛ́ɛ: mé abûʼla ó, sí yɨ́yɛ̂h, yé e nkul ekoʼo ébɨ́ʼ é mékaná maá.

Currently Selected:

Yʉánɛs 21: ozm

Highlight

Copy