Luka 20

Esiteebo sidiira hu bunyala bwa Yesu

(Mat 21:23-27; Mrk 11:27-33)

1Ludaalo luundi, Yesu niyali ali ohwekeseraanga abaandu mu Nyuumba ya Nasaae haandi naali ohuyalaanga Emboosi Ndai, abahuluundu b'abalaamisi neende abaandiiki b'Amalako alala neende abahuluundu beenjia beecha 2mani bamuboolera bati, “Tuboolereho bunyala siina bwooholera ebiindu bino, oba wiina mweene owahuba obunyala buno.” 3Yesu yabakobolamo ati, “Ese syesi njia ohubateebaho esiteebo silala; bulaanu mumboolereho, 4Ohubatiisa hwa Yowaana hwali hutula Muukulu kose mu baandu?” 5Mani baasilomalomaho abeene-na-beene nibaboola bati, “Nihuboola huti, ‘Hwatula Muukulu,’ aba achia ohuboola ati, ‘Lwasiina simwamufukiirira?’ 6Nae nihuboola huti, ‘Hwatula mu baandu,’ abaandu bano boosi baba bachia ohutuhubba amakina; olwohuba bamanyire bati Yowaana yali omunabbi.” 7Mani nibakobolamo bati haba sibamanyire yi yatula. 8Yesu yesi yababoolera ati, “Syesi siinjia hubaboolera yi ndusa obunyala buholera ebiindu bino.”

Olukaado lw'abaliindi bomu ndalo y'emisabbiibbu

(Mat 21:33-46; Mrk 12:1-12)

9 # Yis 5:1. Yesu yachaaka ohukaadira abaandu olukaado luno ati: “Olwoola, omusaacha wuundi yalima endaalo y'emisabbiibbu, mani yamala yayirehera abahalaabani, yacha mu syaalo siindi embaka ndeeyi. 10Nae ebiha by'ohunoka ebyaamo nibyoola, yaatuma omuhalaabani muwaambe mulala eyiri abaliindi abo, bamubeereseho hu byaamo byomu ndalo eyo; nae abaliindi abo bahuya omuhalaabani muwaambe oyo mani baamwiirusa mahono mereere. 11Yatuma omuhalaabani muwaambe wuundi; oyo yesi beecha bamuhuya bamala bamuwaambya esoni muno, mani bamwiirusa mahono mahaya. 12Haandi atuma omuhalaabani muwaambe owohudatu; nae wuno beecha baanyala, bamala bamusukuna erwaanyi. 13Abweene ao, omweene ndalo oyo yaboola ati, ‘Ndaahole siina? Njia ohutuma omwaana waange muheerwa muno; awuundi banyala ohumwiisamo oluyaali.’ 14Nae abaliindi abo nibamubona, baboolanira abeene-na-beene bati, ‘Wuno niye omusiha mweene; lehe humwiite, obusiha bube obweefwe.’ 15Mani bamusukuna erwaanyi w'endaalo y'emisabbiibbu, bamwiita. Omweene ndalo y'emisabbiibbu aba achia ohuholera siina abaandu abo? 16Achia ohwiicha mani asihiriise abahalaabani abo, mani aberese abaandu baandi endaalo y'emisabbiibbu eyo.” Mani nibawulira sino, baboola bati, “Sitabaaho sityo kata nabudiidi!” 17#Sab 118:22. Nae Yesu yabalingaala mani yaboola ati, “Mani esyandiikwa sino syeekesa siina siti:

‘Ekina lyeene li bombahi balekeeresa,

nilyo elyeeholere ely'amaani mu soonda’?

18Buli muundu yeesi owegumula hu kina elyo, achia ohusasakuha; nae nilikwa hu muundu yeesi, lichia ohumunyoonyobola.”

Esiteebo sidiira hu hutooya emisolo

(Mat 22:15-22; Mrk 12:13-17)

19Abaandiiki b'Amalako neende abalaamisi bahuluundu bateemaho ohumukwaaho esiha syeene esyo, nae baatya abaandu; olwohuba basiyira bati nibo bakaadire mu lukaado luno. 20Mani bamwewunja bilai, mani bamala batuma abaheeti, abebachirisa bafwaana koti abaandu b'obwadyeeri, banyale ohumudiira mu mboosi chae, hu banyale ohumudiisa abo obunyala neende obutuki bwa gafana wa Rom. 21Bateeba Yesu bati, “Omweekesa, humanyire huti by'olomaloma neende bi weekesa byadyeeri, haandi haba siwehubbira, nae mubwadyeeri bweene weekesa bi Nasaae adaha abaandu bahole. 22Mani sifukiirirwa efwe ohuberesa Kaisaari omusolo, kose haba?” 23Nae Yesu yeecha yaamanya obukodyo bwaabwe, mani yababoolera ati, 24“Munjekeseho emwaamwa. #20:24 emwaamwa: Mu Lugiriki bati, ‘Edinaari.’ Esifwaanani neende obwandiike biriho bya naanu?” Baboola bati, “Bya Kaisaari.” 25Yesu yababoolera ati, “Mubeerese Kaisaari ebya Kaisaari, nae beerese Nasaae ebya Nasaae.” 26Mani haba sibanyala ohudiisa Yesu omusaango kwoosi mu lwichuule lw'abaandu ohweema hu bi yalomaloma; nae bawuka muno engaluhamo yae, mani nibanyita chi.

Esiteebo sidiira hu husyuuha hw'abafwa

(Mat 22:23-33; Mrk 12:18-27)

27 # Biho 23:8. Abweene ao Abasadukaayo baandi, ababoola bati abulao ohusyuuha hw'abafwa, beecha eyiri Yesu, 28#Amal 25:5. mani bamuteeba esiteebo nibaboola bati, “Omweekesa, Musa yatwandiikira ati, mwaanang'ina muundu naafwa yaleha omuhasi n'atebuuleho nae omwaana, omusaacha oyo #20:28 Mu Lugiriki bati, mwaanang'ina oyo ahoyere ohubukula omuhasi oyo, mani yebulira mwaanang'ina wafwa abaana. 29Bulaanu, waliwo abasyaani b'enda ndala bataanu-na-babiri; omuhuluundu waabwe yadeehya omuhasi, yafwa n'ataalehereho abaana; 30owohubiri yesi yaamudeehya yaba atyo 31haandi owohudatu yesi yamubukula mani byaaba bityo. Nasilala batyo boosi bataanu-na-babiri baafwa nibatalehereho abaana. 32Luunyuma, omuhasi oyo yesi yafwa. 33Mani sakira mu husyuuha hw'abafu, omuhasi oyo achia ohuba owa wiina mweene? Olwohuba yadeheraho abasyaani bataanu-na-babiri abo boosi.”

34Nae Yesu yababoolera ati, “Abaandu bohusyaalo huno nibo abadeehya haandi badeeha; 35nae abo abahoyera ohuba mu bulamu bwiicha, neende mu husyuuha hw'abafwa, haba sibadeehya, haandi kata sibadeeha, 36olwohuba sibanyala hufwa haandi, olwohuba bali koti bamalaika, haandi baana ba Nasaae, olwohuba bali abaana b'ohusyuuha mu bafwa. 37#Hut 3:6.Nae ohweekesa mbwe abafu basyuuha, kata Musa yesi yekesa atyo, mu situundu sy'ebyandiiko byoolerefu esidiira hu sichaha, syalangiramo Omwaami ati, Nasaae wa Abburahamu, haandi Nasaae wa Yisaka, haandi Nasaae wa Yakobbo. 38Bulaanu haba saali Nasaae wa bafu, nae ali Nasaae wa balamu; olwohuba abaandu boosi balamu yali.” 39Abaandiiki b'Amalako baandi bakobolamo bati, “Omweekesa, olomaloome bulai bweene.” 40Olwohuba ohutula hu olwo, abulao omuundu yeesi owateemaho ohuteeba Yesu esiindu syoosi.

Esiteebo sidiira hu Kristo

(Mat 22:41-46; Mrk 12:35-37)

41Nae Yesu yababoolera ati, “Bahaboola batye bati, Kristo mwaana wa Daudi? 42#Sab 110:1. Olwohuba Daudi mweene aboola mu sitabo sy'Esabbuli ati,

‘Omwaami yaboolera Omwaami waange ati,

Yihala hu muhono kwaange muluungi,

43ohwoola lu ndahahole abasuku bao babe esiteeni syowuluusiraho amakulu kao.’

44Mbao, Daudi amulaanga ati Omwaami; mani haandi yahaba atye omwaana wae?”

Yesu yoolobya abeekesa b'Amalako

(Mat 23:1-36; Mrk 12:38-40)

45Yesu yaboolera abeeki bae abaandu boosi nibawulira ati, 46“Mweliinde abaandiiki b'Amalako, abaheera ohung'alaala nibefwaalire emiganjuula kyereera, haandi abaheera muno ohuheeswa neende oluyaali mu biito, haandi abaheera muno ohwiihalira mu bweyaango bw'oluyaali mu sinagoogi neende mu bidyaalo, 47abayaaya amadaala k'abahasi bafwiire, haandi abasaba esaala ndeeyi nibekaadya. Abo bachia ohunyoola ohusaandisibwa huhiramo obubi.”

Currently Selected:

Luka 20: SAMDC

Highlight

Copy