Luka 21

Esiyaanwa sy'omuhasi mufwiirwe

(Mrk 12:41-44)

1Yesu yasiingisa emoni aakulu, yabona abayiinda nibali ohuta ebiyaanwa byaabwe mu sibiihiro; 2mani yabona omuhasi mufwiirwe mumanani n'ataamo obuhela bubiri. 3Mani yaboola ati, “Mbaboolera obwadyeeri endi, omuhasi mufwiirwe mumanani wuno ateeremo ohuhira abo boosi; 4olwohuba abo batusireho sa hu biingi bi bali nabyo, nae wuno ohutula mu bumanani bwae ateeremo byoosi byaabeere nabyo mu bulamu bwae.”

Yesu alomaloma hu hukwiiswa hw'Enyuumba ya Nasaae

(Mat 24:1-2; Mrk 13:1-2)

5Abaandu baandi nibali nibalomaloma hu Nyuumba ya Nasaae, koti luyali niyimila-milana hulw'amakina k'obuhala buungi, neende ebiyaanwa byaamwo, Yesu yaboola ati, 6“Ebiindu bi mubona bino byoosi, endaalo chahoole, awuleo ano ekina lyahalehebwe hu liindi, kahalikulwe koosi kaweere aasi.”

Obudinyu neende ohusaandisibwa

(Mat 24:3-14; Mrk 13:3-13)

7Bamuteeba bati, “Omweekesa, sino syahabeeo liina, haandi silolero siina esyahabeeo esyeekesa siti sino siri aambi ohukwaao?” 8Nae Yesu yaboola ati, “Mweliinde muhaye ohukoswa; olwohuba abaandu baangi bachia ohwiicha mu liita lyaange, nibaboola bati, ‘Niise oyo!’ Haandi bati, ‘Ebiha nibyo bino!’ Mutabaloondakiriraanga. 9Nae nimuwuliraanga amaye neende embuungu, mutatengatengaanga; olwohuba sino sihoyere ohubaao mberi, nae enjakamo nayo siyichia hukwaao sa ehabi lala.” 10Yesu yababoolera ati, “esyaalo sichia ohusiingira siseete esiindi, haandi obwaami bwosi buseete obuundi; 11esyaalo syahateengerehe muno, haandi enjala neende amalwaae maangi mabi kahakwe mu byaalo bitaali nasilala; haandi ebiindu bitiisa muno neende ebilolero bw'amaani ohutula aakulu bichia ohubaao. 12Nae bino byoosi nibisisiiri ohukwaao, abaandu bachia ohubadiira mani babasaandye muno, nibabayira mu sinagoogi chitaali nasilala neende mu jeela, haandi muchia ohuleetwa eyiri abatuki neende bagafana hulw'eliita lyaange. 13Ao niwo yi eng'we mwahatusire obuloli. 14#Luk 12:11,12. Mani sakira mumanyire elalira mu myooyo kyeeng'we, mutachaaka ohukana-kana hale nibitoola koti lu muba muchia ohukobolamo ebiteebo; 15olwohuba, njia ohubaba eby'ohulomaloma neende amakesi kadahibwa, ka kata mulala hu basuku beeng'we aba achia ohunyala ohuhira kata ohudoondobania. 16Muchia ohusiindihwayo kata neende abeebusi beeng'we, kata abanaluyia beeng'we, kata abeecha beeng'we haandi abaandi hweeng'we muchia ohwiitwa-bwiitwa; 17abaandu boosi bachia ohubasyuula hulw'eliita lyaange. 18Nae haba kata olwooya lw'efwiiri lulala olwohumitwe cheeng'we siluchia husihirira daawe. 19Nae ni mu hweesimiirisa hweeng'we mumuchia ohunyoolera obulamu.

Yesu alomaloma hu husihiriswa hwa Yerusalemu

(Mat 24:15-21; Mrk 13:14-19)

20“Nae nimubonaanga Yerusalemu nisyebodoohanisiibwe neende amaye, mani mumanyeenge sa muti, olubwa lwasyo luba lumalire ohwoola. 21Mani leheenge abo ababa nibali mu Yudesa beeruheenge bachia hu ngulu, haandi leheenge abo ababa nibali mu siko sihuluundu bweene bawuuya, haandi mutalehanga abo ababa nibali erwaanyi mu ngoongo beecha baasiingiramo; 22#Hos 9:7. olwohuba chino nicho endaalo ch'ohwetuungiramo, ohwooseresa byoosi ebyandiikwa. 23Chaakaanire abo abaliba neende abaana neende abo abaliba nibanuunia abaana mu biha ebyo! Olwohuba amasira amaangi kachia ohuba hu syaalo neende egiili ohuweera hu baandu bano; 24bachia ohwiitwa neende obusoonjo bw'engaanga haandi bayirwe mu jeela mu byaalo biindi byoosi; mani Yerusalemu sichia ohuseenakirwa mu makulu neende Bateende, ohwoola lu ndaalo ch'Abateende chiriweera.

Ohwiicha hw'Omwaana w'Omuundu

(Mat 24:29-31; Mrk 13:24-27)

25 # Yis 13:10; Esek 32:7; Yoel 2:31; Hubwi 6:12,13. “Haandi yicha ohubaao ebilolero hu lyuuba neende hu mwoosi neende hu ng'ining'ini chosi, nae hu syaalo, ebyaalo bichia ohuba neende engisa nyiingi muno nibitiire ohuwoola hw'enyaanja huluundu neende ohukiingana hw'amafwiinda kaayo, 26abaandu boosi bachia ohufwichaanga obuti nibelalihiire ebichia ohukwaao hu syaalo; olwohuba obunyala bwoomu Kulu bwosi bucha ohudengaanisibwa. 27#Dan 7:13; Hubwi 1:7. Mani ao niwo abachia ohubonera Omwaana w'Omuundu niyeechera mu sireesi naali neende amaani neende oluyaali lubitiirifu. 28Nae bulaanu, ebiindu bino byoosi nibiba nibichaaka ohuholehana, eng'we musiingisaanga emitwe cheeng'we, mani mulingaala aakulu, olwohuba obuwonia bweeng'we buba busuda aambi bweene.”

Elyeeko litula hu mutuli

(Mat 24:32-35; Mrk 13:28-31)

29Haandi Yesu yeecha yabakaadira olukaado luundi ati, “Mubonere hu mutuli, neende kata hu misaala chiindi choosi; 30huchahasebuhira chiti amasaafu, mweeboneraanga abeene mani mumanya muti esiminyu simalire ohwoola. 31Mani nasilala nilwo lu biri, nimubonaanga ebiindu bino nibikwao, manyeenge sa muti, obwaami bwa Nasaae buli aambi. 32Mbaboolera obwadyeeri endi, oluse luno haba silwahaweeo bino byoosi nibitaakwao. 33Ekulu neende esyaalo bichia ohuwaao, nae emboosi chaange haba sichicha ohuwaao.

Obulai bw'ohuba meeso

34“Nae mweliinde abeene, emyooyo kyeeng'we kitakatayaswa neende emideeho neende obumeesi neende ohwelalihirira hw'ebihoyera obulamu buno, bikere oludaalo olwo lwaabakwaaho koti omuteego nimutetekeehe; 35olwohuba oludaalo olwo luchia ohwichira abaandu bali hu syaalo huno boosi. 36Nae eng'we mube ameeso esiha syoosi, nimusaba Nasaae muti muduhane amaani ak'ohwewonia ebiindu bino byoosi ebichia ohukwaao, neende ohweema mu moni w'Omwaana w'Omuundu.”

37 # Luk 19:47. Yesu yemeeda ohweekesanga buli ludaalo mu Nyuumba ya Nasaae, nae nibweeraanga yatulanga erwaanyi achia akona hu sigulu silaangwa Esy'emiseituuni. 38Nae nibwahyechaanga echuli, abaandu bawuunaanga ohwiicha yali mu Nyuumba ya Nasaae ohumutekeeresa.

Currently Selected:

Luka 21: SAMDC

Highlight

Copy