Luka 19

Yesu neende Sakayo

1Yesu yacha yeengira mu Yeriko mani yali nasibitamo. 2Nae waliwo omusaacha wuundi olaangwa Sakayo; owali omutoosa w'omusolo, haandi omuyiinda muno. 3Mani yali n'adaha muno ohubona Yesu koti lu fwaana, nae haba siyanyala ohumubona ohweema hu buungi bw'abaandu, haandi yali omuundu mwiimbikiti muno. 4Yeemao yeeruha yaachia mu moni w'esidiiyiha sy'abaandu, mani yaniina hu muhuyu hw'anyale ohubona Yesu, owali achia ohubitira ebweene eyo. 5Nae Yesu niyoola abuundu ao, yalingaala aakulu mani yamuboolera ati, “Sakayo, yanguyaho bwaangu wiihe aasi; olwohuba nyaanga yino ese hoyeere ohuba mu nyuumba yao.” 6Sakayo yaanguyaho, yeeha aasi bwaangu, yakaanira Yesu neende esangaalo liingi muno. 7Nae abaandu nibabona batyo, boosi-boosi bachaaka ohweng'ulung'unya nibaboola bati, “Bone, yahacha ohukeniya omusaacha muhola-mbi.” 8Nae Sakayo yasiingira, mani yaboolera Omwaami ati, “Omwaami bona, njia ohuberesa abamanani esituundu sy'ebiindu byaange byoosi; haandi ni mba nindeebaho omuundu yeesi esiindu syoosi, njia ohumukoboserayo ebiindu ebyo, amahabi kane amalaamba.” 9Nae Yesu yamuboolera ati, “Olwaleero, obuwonia bwiichire mu nyuumba yino, olwohuba wuno yesi mwaana wa Abburahamu. 10#Mat 18:11. Olwohuba Omwaana w'Omuundu yeecha ohukoonya neende ohuwonia abakota.”

Olukaado lw'eseende ch'esaabbu

(Mat 25:14-30)

11Abaandu nibawulira ebiindu bino, Yesu yemeeda ohubakaadira olukaado, olwohuba yali aambi ohwoola Yerusalemu, haandi olwohuba abaandu bali babaasirisa bati, obwaami bwa Nasaae bucha ohwoola ebiha byeene ebyo. 12Mani sakira Yesu yababoolera ati, “Olwoola, omusaacha w'oluyaali wuundi, yatula yaacha mu syaalo sy'eyale muno bamubeerese obwaami, mani amale akobole. 13Yalaanga abahalaabani bae ehumi, yaababeresa epawuundi ehumi, #19:13 epawuundi ehumiEpawuundi ehumi ano, chaakana neende omusaara kw'omuhalaabani kw'emyoosi kidatu. mani yaababoolera ati, ‘Muchurusire eseende chino ohwoola lu ndirikobola.’ 14Nae abaandu bomu bwaami bwae bali bamusyuula, mani beecha batuma bawamwaanda ohumuloondaho nibaboola bati, ‘Sihudaha omusaacha wuno atutuke.’ 15Mani niyakobola, n'amalire ohunyoola obwaami, yalagira bamulaangire abahalaabani ba yali yaberesa eseende, anyale ohumanya obuhala bu banyoola mu buchurusi bwaabwe obwo. 16Owataangira mweene, yeecha mu moni wae, n'aboola ati, ‘Omwaami, epawuundi yao ndala yira, yeebula epawuundi chiindi ehumi.’ 17Mani yamuboolera ati, ‘Oholere bulai muno, oli omuhalaabani mulai mweene! Olwohuba obeere omweesikwa mu siindu sidiidi, mani ochia ohutuka ebiko bihuluundu ehumi.’ 18Haandi owohubiri yaboola ati, ‘Omwaami, epawuundi yao ndala yira, yeebula epawuundi chiindi chitaanu.’ 19Nae yamuboolera ati, ‘Mani ewe ochia ohutuka ebiko bihuluundu bitaanu.’ 20Haandi owuundi yeecha yaboola ati, ‘Omwaami, epawuundi yao ndala yira ngino, ndayibiiha bulai adiiyu mu sitambaara; 21ndahutya muno, olwohuba oli omuundu mudinyu mweene; obukulaanga byotabiiha, haandi wakesaanga byotataaka.’ 22Yamuboolera ati, ‘Ewe omuhalaabani mubi muno, njia ohuhuheengera omusaango ohweema hu by'olomaloome omweene neende omunwa kwao! Ewe hane wamanya oti ndi omusaacha mudinyu, obukula bitabiiha, haandi okesa bitataaka? 23Lwasiina siwachia waata eseende chaange mu biihiro ly'eseende, mani nindahakoboole, sindahachitusireyo nichiriho obuhala?’ 24Yesu yaboolera abo abali nibeemere aambi ao ati, ‘Mumubukuleho epawuundi ndala eyo, mani muyibeerese oyo oli neende epawuundi ehumi.’ 25Nabo bamuboolera bati, ‘Omwaami, oyo ali neende epawuundi ehumi!’ 26#Mat 13:12; Mrk 4:25; Luk 8:18. ‘Mbaboolera endi, buli muundu yeesi oli nabyo, achia ohumeedwa ebiindi; nae oyo yeesi otaliho neende esiindu, kata neende ebyo byaaba naali nabyo bichia ohumutusibwaho. 27#Mat 25:14-30. Nae abasuku baange bano, abatadaha ese mbatuke, mubaleete ano mani mubeetere mu moni waange.’ ”

Ohwiingira hwa Yesu hw'oluyaali mu Yerusalemu

(Mat 21:1-11; Mrk 11:1-11; Yow 12:12-19)

28Mani Yesu niyamala ohuboola atyo, yemeeda mu moni ohuchia Yerusalemu. 29Mani niyali aambi ohwoola Bbetifaage neende Bbetani, hu sigulu silaangwa siti Esy'emiseituuni, yeecha yaatuma abeeki bae babiri 30n'aboola ati, “Muchie mu lukoongo lubali mu moni olwo, mani nimunaba humwiingiramo muti, muchia ohunyoola omwaana kw'esuhiri nikuboyerwe, ku muundu yeesi ateehalaho hooho; mukuboolole mani mukuleete ano. 31Nae omuundu yeesi n'abateeba ati, ‘Lwasiina muli ohukuboolola?’ Mumuboolera sino muti, ‘Omwaami niye okudaha.’ ” 32Mani abatumwa abo, nibatula bachia bakaana sa koti lu Yesu yali ababoolere. 33Mani nibali hubaboololanga omwaana kw'esuhiri okwo, abeenekwo bababoolera bati, “Lwasiina muli ohuboolola omwaana kw'esuhiri okwo?” 34Nabo baboola bati, “Omwaami niye okudaha.” 35Bakuleetera Yesu, mani nibasukuna engubo chaabwe hu mwaana kw'esuhiri okwo, behasaho Yesu. 36Omwaana kw'esuhiri nikwali kukiingire Yesu naachia, abaandu bachaaka ohwaala engubo chaabwe hu ngira. 37Nae niyali aambi ohwoola Yerusalemu, n'ali hu siihiriro sy'Olugulu lw'Emiseituuni, esidiiyiha sihoongo sy'abeeki, syachaaka ohwehoya haandi nibafumia Nasaae mu kono ly'aakulu muno, hulw'emirimo mikali kibali nibabweene, 38#Sab 118:26. nibaboola bati, “Ali neende ehabi Omutuki oyo owiicha mu liita ly'Omwaami! Omuleembe kube Muukulu, haandi oluyaali lube aakulu Muukulu!” 39Nae Abafarisaayo baandi abali mu sidiyiiha bamuboolera bati, “Omweekesa, kaania abeeki bao.” 40Nae Yesu yakobolamo ati, “Mbaboolera endi, kata bano boosi nibawuleera, amakina keene kachia ohuyokera.”

Yesu alira hulwa Yerusalemu

41Yesu niyasuda aambi mani yabona esiko sihuluundu esyo, yasirira muno, 42n'aboola ati, “Biba mbwe enyaanga yino wamanya ebiindu bileeta omuleembe! Nae bulaanu ebyo byahweekisaho. 43Olwohuba endaalo chichia ohwoola, abasuku bao bachia ohuyaba olukoba, mani bahwebodoohanie, mani bahwiikalire embeka choosi, 44mani bamale bahuubbe aasi, ewe alala neende abaana bamenya mu lukoba lwao, mani sibachia huhulehamo ekina hu liindi; olwohuba siwamanya esiha sy'obuwonia bwao nisyoolere.”

Yesu achia mu Nyuumba ya Nasaae

(Mat 21:12-17; Mrk 11:15-19; Yow 2:13-22)

45Yesu niyeengira mu Nyuumba ya Nasaae yachaaka ohwiirusamo abo abali nibachurusiramo, 46#Yis 56:7; Yer 7:11. yaboola ati, “Syandiikwa siti, ‘Enyuumba yaange yicha ohuba enyuumba yoohusabiraangamo’; nae eng'we mwayihola obweyikamo bw'abanyaka.”

47 # Luk 21:37. Yesu yachaaka ohweekesaanga buli ludaalo mu Nyuumba ya Nasaae. Abalaamisi bahuluundu neende abaandiiki b'Amalako alala neende abaandu b'oluyaali luhoongo bachaaka ohukiiya engira y'ohumusihirisa; 48nae sibanyoola esiindu syoosi sibanyala ohuhola, olwohuba abaandu boosi bali bahayiire hu mboosi chae.

Currently Selected:

Luka 19: SAMDC

Highlight

Copy