Luka 18

Olukaado lw'omuhasi mufwiire neende omukayi w'emisaango

1Haandi Yesu yeecha yabakaadira olukaado luundi, olweekesa luti bahoyere ohwekongoyaanga Nasaae buli siha, batawaamo omwooyo. 2Yaboola ati, “Mu siko sihuluundu siindi, yaliwo omukayi w'emisaango wuundi, otaali niyatya Nasaae haandi otabaasaho hu muundu wuundi yeesi; 3nae yosi yaliyo omuhasi mufwiirwe wuundi mu siko sihuluundu esyo, owali yedinya ohumwichaangaho n'aboola ati, ‘Hoonye mani wuheengere omusaango hire abasuku baange.’ 4Nae yahayaho hulw'esiha sidiidi; nae luunyuma yeeboolera omweene ati, ‘Ndahaba mbwe ese haba siitya Nasaae kata neende nitadeeba hu muundu yeesi, 5nae olwohuba omuhasi mufwiire wuno ali ohunyaasa-nyaasa, njia ohumuhoonya, ataali ao aba achia ohunjoong'ya neende ohunonderesa hwae.’ ” 6Omwaami yaboola ati, “Wulireho bi mukayi w'emisaango otaali omuluungifu by'aboola. 7Nae Nasaae salikwiira abalobole bae, abamulirira esiro neende esideete? Mani aba achia ohuhiinda muno ohubahoonya? 8Mbaboolera endi achia ohubakwiira bwaangu muno. Kata katyo, Omwaana w'Omuundu niyaheeche, mani achia ohwakaana efukiirira hu syaalo?”

Olukaado lw'Omufarisaayo neende Omutoosa w'emisolo

9Yesu yaboolera abaandu baandi olukaado luno, abali nibemanyire abeene bati bali aboolerefu mani nibalekeeresaanga abasyaabwe, ati: 10“Olwoola, abasaacha babiri bachia mu Nyuumba ya Nasaae ohulaama. Mulala yali Omufarisaayo nae owuundi yali omutoosa w'emisolo. 11Omufarisaayo yema mani yesabira omweene n'aboola ati, ‘Nasaae, hweebasa muno olwohuba siindi koti abaandu baandi, abang'uusi, ababacha, abacheke, kata siindi koti omutoosa w'emisolo wuno. 12Siiba habiri hu juma, ngaba silala sy'ehumi sya buli siindu si nyoola.’ 13Nae omutoosa w'emisolo yeema eyale, n'atanyala kata ohusiingisa emoni chae yalingaala Muukulu, yachaaka ohw'ehubba mu sirifu n'aboola ati, ‘Nasaae, ngwiire esisa, ese omuhola-mbi!’ 14#Mat 23:12; Luk 14:11.Mbaboolera endi, omusaacha wuno yakobola engo wae naali omwoolerefu mu moni wa Nasaae ohuhira Omufarisaayo wula; olwohuba buli muundu yeesi oweniinia achia ohwiiswa aasi, nae oyo yeesi oweyisa aasi, achia ohuniiniswa.”

Yesu aberesa abaana bayere ehabi

(Mat 19:13-15; Mrk 10:13-16)

15Bulaanu, abaandu bachaaka ohuleeta abaana bayere eyiri Yesu abadiireho neende amahono kae; nae abeeki bae nibabona sino, beecha baabakayira. 16Nae Yesu yabalaanga beeche yali n'aboola ati, “Mulehe abaana beeche yi ndi, haandi mutabakayira; olwohuba, abali bati, nibo abeene bwaami bwa Nasaae. 17Mbaboolera obwadyeeri endi, oyo yeesi otakaanira obwaami bwa Nasaae koti omwaana muyere haba saachia hubwiingiramo.”

Omusaacha muyiinda

(Mat 19:16-30; Mrk 10:17-31)

18Omutuki wuundi yateeba Yesu ati, “Ewe omweekesa mulai, siina syeene sihoyera ohuhola hu nyoole obulamu butaakama?” 19Nae Yesu yamuboolera ati, “Lwasiina wunaanga oti omulai? Abulao omuundu mulai ohutusaho Nasaae yeeng'ene. 20#Hut 20:12-16; Amal 5:16-20. Omanyire amalako kano: ‘Otaholaanga obucheke, Otetaanga, Otebaanga, Otatusaanga obuloli bw'obubacha, Yisaanga mu lataao neende maao oluyaali.’ ” 21Nae yaboola ati, “Bino byoosi, ndabiloonda ohutula mubuyere bwaange.” 22Mani Yesu niyawulira atyo, yamuboolera ati, “Osiibulwaho esiindu silala. Kusa ebiindu byao byoosi, mani okabe abamanani, mani ochia ohunyoola obuyiinda Muukulu; mani wiiche, wunonde.” 23Nae oyo niyawulira atyo, yeecha yaanyoolera muno, olwohuba yali omuyiinda muno. 24Nae Yesu yamulingaala mani yaboola ati, “Nga sidinyu muno abayiinda ohwiingira mu bwaami bwa Nasaae! 25Syaangu muno engamia ohubita mu liina ly'esindaani, ohuhira omuyiinda ohwiingira mu bwaami bwa Nasaae.” 26Nae abawulira sino beecha baboola bati, “Mani wiina mweene onyala ohuwonisibwa?” 27Nae Yesu yaboola ati, “Esitanyalihana eyiri abaandu, sinyalihana eyiri Nasaae.” 28Nae Petero yaboola ati, “Eee, efwe hwaleha amadaala keefwe mani hwahuloonda.” 29Nae Yesu yababoolera ati, “Mbaboolera obwadyeeri endi, abulao omuundu yeesi, owaleha enyuumba, oba omuhasi, oba bamwaanang'ina, oba abeebusi, oba abaana, hulw'Obwaami bwa Nasaae, 30otachia hunyoola amahabi maangi ak'ebyeene ebyo, mu biha bino, haandi neende obulamu butaakama mu ndaalo chiicha.”

Yesu alomaloma ehabi lyohudatu hu hufwa hwae

(Mat 20:17-19; Mrk 10:32-34)

31Yesu yabukula ehumi-na-babiri abo yabayira endulo, mani yababoolera ati, “Bone, mbano huli ohuchia Yerusalemu, mani buli siindu syoosi si banabbi baandiika hu Omwaana w'Omuundu sichia ohwolerera. 32Olwohuba achia ohudiiswa Bateende, mani bamudyaabuhire, haandi bamuyire bubi, haandi bamufuucheho; 33bachia ohumunaala ehoba, mani bamwiite, nae hu ludaalo lwohudatu, achia ohusyuuha.” 34Nae abeeki bae haba sibanyala ohumanya bi yali naalomalomaho; olwohuba enomanoma yino yali yabakiswaho, mani bahaya ohudiira ebyali nibilomaloomwe.

Yesu awonia omuwofu musabirisi

(Mat 20:29-34; Mrk 10:46-52)

35Yesu niyoola aambi neende Yeriko, omusaacha muwofu wuundi yali yehaale hu ndulo w'engira nasabirisaanga, 36nae niyawulira esidiiyiha sy'abaandu nisibita, yateeba esyali nisikwiireo. 37Bamuboolera bati, “Yesu wa Nasareeti niye oli ohubita.” 38Mani yachaaka ohulira n'aboola ati, “Yesu, mwaana wa Daudi, ngwiire esisa!” 39Nae abo abali nibali mu moni wae bachaaka ohumuhabuhira nibamuboolera bati awuleere; nae yemeeda ohulirira mu kono ly'aakulu n'aboola ati, “mwaana wa Daudi, ngwiire esisa!” 40Mani Yesu yeema, yaalagira ati bamuleete yali; mani niyoola aambi, Yesu yamuteeba ati, 41“Siina sy'odaha huholere?” Nae yaboola ati, “Omwaami, leha haandi nyale ohubona.” 42Nae Yesu yamuboolera ati, “Chaaka haandi ohubona; efukiirira yao yihuwoniisye.” 43Mani abweene-na-bweene ao n'achaaka ohubona, mani yaloonda Yesu n'aberesa Nasaae oluyaali; mani abaandu abo boosi nibabona sino, beecha baafumia Nasaae.

Currently Selected:

Luka 18: SAMDC

Highlight

Copy