Mariko 12

Olukaado lw'abahalaabani b'omuundalo y'emisabbiibbu

(Mat 21:33-46; Luk 20:9-19)

1 # Yis 5:1,2. Yesu yachaaka ohulomaloma nabo mu ngaado ati, “Yaliwo omusaacha wuundi owalima endalo y'emisabbiibbu, mani yoombaha olukaka yaayibodoohania, haandi yaayaba eliina ly'esihunyiro sy'emisabbiibbu, haandi yoombaha omunaara okw'ohuliindiramo endalo eyo, mani yaayiberesa abahalaabani nae omweene yaasamula mu syaalo siindi. 2Esiha nisyoola, yatuma omuhalaabani wae mulala eyiri abahalaabani abo, achie bamubeeho ebyaamo hooho biti ohutula mu ndalo y'emisabbiibbu eyo. 3Nae abahalaabani abo, bamudiira baamuhuya, baamukalusa yaatulire mahono mahaya. 4Omweene ndalo haandi yatumira abahalaabani abo omuhalaabani wae wuundi, nae abahalaabani abo bamunyaala omutwe baamuhola ebyeesoni. 5Haandi yabatumira omuhalaabani wuundi nae yi beeta; alala neende abaandi abaangi batyo, nibabahuya haandi abaandi nibabeeta. 6Haandi omweene ndalo oyo yali adoong'iise omuhalaabani wuundi mulala; oyo niye owali omwaana muheerwa; niye yi yamaliirihayo ohutuma yi bali, n'aboola ati, ‘Bachia ohwiisa oluyaali mu mwaana waange.’ 7Nae abahalaabani abo baboolanira abeene-na-beene bati, ‘Wuno niye omukobola mu makulu; mwiche, mulehe humwiite, mani endalo y'emisabbiibbu yibe eyeefwe.’ 8Mani bamubukula baamwiita, baamusukuna erwaanyi w'endalo y'emisabbiibbu eyo.” 9Yesu yabateeba ati, “omweene ndalo y'emisabbiibbu eyo aba bulaanu achia ohuhola siina?” “Aba achia ohwiicha asihirise abahalaabani abo, mani abukule endalo y'emisabbiibbu eyo ayiberese abaandu baandi. 10#Sab 118:22,23.Haba simwasomaho ebyandiiko byoolerefu bino biti,

‘Ekina lyeene lira li boombahi bahaya

nilyo elyeeholere ehuluundu mu musiingi;

11yino yali ehola y'Omwaami,

haandi ndai muno mu moni cheefwe’?”

12Bateemaho ohumudiira haandi, nae batya esidiiyiha esyo, olwohuba bali bafumbuule bati olukaado lu Yesu yali naababoleere olwo lwali nilubadiiraho; mani baamuleha bawaao.

Esiteebo sidiira hu hutooya omusolo

(Mat 22:15-22; Luk 20:20-26)

13Haandi bamutumira Abafarisaayo baandi neende Abaandu baandi ohutula eyiri Herode baandi ohumutekera mu nomanoma yae yene. 14Mani beecha yali baamuboolera bati, “Omweekesa, humanyire huti ewe oli ow'obwadyeeri, haandi haba si wekweeda omuundu yeesi; olwohuba ewe haba sootya oluyaali lw'abaandu, nae mubwadyeeri bweene weekesaanga engira ya Nasaae yene. Mani sihoyera ohutooya emisolo eyiri Kaisaari, kose haba? 15Efwe huhoyere ohukitooya, kose, sihuhoyere?” Nae Yesu koti luyali n'amanyire ohwebachirisa hwaabwe, yababoolera ati, “Lwasiina muuhema mutyo? Muundeetere etoongolo, #12:15 etoongolo: Mu Lugiriki bati, ‘edinaari.’ mani mulehe nditingaale” 16Mani baamuleetera lala. Nae Yesu yababoolera ati, “Esifwaanani sino neende obwandiike buno bya naanu?” Nabo bamuboolera bati, “Bya Kaisaari.” 17Yesu yababoolera ati, “Ebya Kaisaari mubereseenge Kaisaari, nae ebya Nasaae mubereseenge Nasaae.” Mani baatya Yesu muno.

Esiteebo sidiira hu husyuuha hw'abafu

(Mat 22:23-33; Luk 20:27-40)

18 # Biho 23:8. Haandi Abasadukaayo bosi beecha yali, abo ababoolaanga bati, ohusyuuha hubulao; mani baamuteeba esiteebo nibaboola bati, 19#Amal 25:5. “Omweekesa, Musa yali yatwandiikira ati, mwanaang'ina muundu naafwa mani yaaleha omuhasi, nae haba saalehere omwaana, omuundu oyo #12:19 Mu Lugiriki bati, mwanaang'ina ahoyera ohubukula omuhasi oyo, yeebulira mwanaang'ina abaana. 20Olwoola, yaliwo abasyaani beebulanwa bataanu-na-babiri; Omuhuluundu waabwe yadeehya omuhasi, mani niyafwa, haba siyalehaho omwaana kata mulala; 21mani owohubiri yadeehya omuhasi oyo, haandi yesi yaafwa n'ataalehereho omwaana kata mulala; haandi owohudatu yesi yaafwa atyo; 22mani bataanu-na-babiri abo haba sibalehaho omwaana kata mulala. Muhumaliirihira elalira, omuhasi oyo yesi yafwa. 23Mani mu husyuuha, omuhasi oyo achia ohuba muha naanu? Olwohuba abasaacha bataanu-na-babiri abo boosi bali bamuyira koti omuhasi waabwe.”

24Yesu nae yababoolera ati, “Sino sinisyo esikeraanga nimudoondobana, olwohuba mbwe haba simumanyire ebyandiiko byoolerefu kata neende obunyala bwa Nasaae? 25Olwohuba abo nibahasyuuhe mu bafu, haba sibahabe nibali ab'ohudeehya, kata ab'ohudeeha, nae bachia ohuba koti Malaika bo Muukulu. 26#Hut 3:6. Nae esya abafu ohusyuuhisibwa, haba simwasomaho mu sitabo sya Musa, mu lukano ludiira hu sichaha, koti lu Nasaae yamuboolera ati, ‘Ndi Nasaae wa Abburahamu, haandi Nasaae wa Yisaka, haandi Nasaae wa Yakobbo’? 27Haba saali Nasaae wa abafu, nae ali owa balamu; mwadoondobana muno.”

Elako ehunuufu

(Mat 22:34-40; Luk 10:25-28)

28Mani mulala hu abaandiiki b'Amalako yeecha yi bali yawulira nibali ohuyiingananga abeene-na-beene, mani niyabona ati Yesu ali ohubakaluhamo bulai bweene, yamuteeba ati, “Lako siina elihiramo koosi obuhunuufu?” 29#Amal 6:4,5. Yesu yakobolamo ati, “Elitaangira lyeene liri liti, ‘Wulira Ewe Yisiraeli: Omwaami Nasaae weefwe, Omwaami ali mulala yeeng'ene; 30mani ohoyere ohuheera Omwaami Nasaae wao neende omwooyo kwao kwoosi, haandi neende obulamu bwao bwoosi, neende amakesi kao koosi, neende amaani kao koosi.’ 31#Lef 19:18. Eliloondaho nilyo lino, ‘Heeraanga owaasyo koti lu weheera omweene.’ Haba siliri hoo elako liindi elihira kano kabiri.” 32#Amal 4:35. Mani omwandiiki w'amalako yaboobera Yesu ati, “Omweekesa, oli abweene; oboolere obwadyeeri oti ali mulala yeeng'ene, haandi abulao owuundi ohutusaho oyo; 33#Hos 6:6. haandi neende ohumuheera neende omwooyo kwoosi, neende amakesi koosi, neende amaani koosi, haandi ohuheera owaasyo koti lu weheera omweene, bihira muno ebiyaanwa bisaambe bilaamba byoosi alala neende ebiyaanwa by'ebiindu biindi eyiri Nasaae.” 34#Luk 10:25-28. Nae Yesu niyabona ati akaluuhemo neende amakesi, yamuboolera ati, “Ewe haba sooli eyale muno ohutula hu bwaami bwa Nasaae.” Mani ohutula hu ludaalo olwo, abulao omuundu yeesi owateemaho ohumuteeba esiteebo siindi syoosi.

Esiteebo sidiira hu Kristo

(Mat 22:41-46; Luk 20:41-44)

35Mani Yesu niyali niyeekesa mu Nyuumba ya Nasaae, yaboola ati, “Abaandiiki b'Amalako bahaboola batye bati Kristo ali omwaana wa Daudi? 36#Sab 110:1. Nae Daudi mweene niyechuule #12:36 Oba omweene, mu Mwooyo Mwoolerefu, yesaara ati,

‘Omwaami yaboolera Omwaami waange ati,

Yihala hu muhono kwaange muluungi,

ohwoola lu ndiliteera abasuku bao aasi w'amakulu kao.’

37Daudi mweene amulaanga ati, Omwaami; mani yahaba atye omwaana wae?” Mani esidiiyiha sihoongo syamuwulira neende esangaalo.

Yesu alabula abaandu ohweliinda eyiri abeekesa b'Amalako

(Mat 23:1-36; Luk 20:45-47)

38Mani mu hweekesa hwae haandi yaboola ati, “Mweliinde eyiri abaandiiki b'Amalako, abaheera ohung'alaalira mu maganjuula kaabwe maleeyi, neende ohubona bati baheesibwa bulai mu biito 39haandi neende obubereswa ebisaala bilai mu Sinagoogi alala neende obwiihalo bw'oluyaali hu bidyaalo, 40haandi abo abayaaya amayuumba k'abahasi bafwiirwe haandi muhwebachirisa abaleeyia muno amasaayo kaabwe. Abo bachia ohunyoola esaando mbi yihiramo.”

Esiyaanwa sy'omuhasi mufwiirwe

(Luk 21:1-4)

41Yesu yeehala n'atingaalire esibiihiro sy'eseende, mani yewuunja abaandu nibata eseende chaabwe mu sibiihiro esyo. Abaandu bayiinda abaangi batechaangamo eseende enyiingi muno. 42Mani omuhasi mufwiirwe mukofu muno yesi yeecha, yayaanayo obuhela bubiri obw'omugasa obwaakana neende etoongolo lala. 43Yesu yalaanga abeeki bae beeche yaali, mani yaababoolera ati, “Mbaboolera obwadyeeri endi, omuhasi mufwiirwe mumanani wuno, ateeremo eseende nyiingi echihira echa abo boosi abaleetere mu sibiihiro sino. 44Olwohuba abo boosi baleetereenge hweebyo ebidoong'ere hu biindu bi bali nabyo; nae wuno ohutula hubumanani bwae, aleetere syoosi si yali n'ali nasyo, mu bulamu bwae bwoosi.”

Currently Selected:

Mariko 12: SAMIA

Highlight

Copy