Mariko 11

Yesu yeengira mu Yerusalemu neende oluyaali

(Mat 21:1-11; Luk 19:28-40; Yow 12:12-19)

1Nae nibali niboola mu Yerusalemu, aambi neende Bbetifaage neende Bbetani, boola hu Lugulu lw'Emiseituuni, mani Yesu yaatuma babiri hu beeki bae, 2naababoolera ati, “Muchie mu lukoongo lubali mu moni, nae nimunalwiingiramo sa muti, muchia ohunyoola omwaana kw'esuhiri nikuboyerwe, okuteehalwahooho neende omuundu; mukuboolole mani mukuleete. 3Nae omuundu yeesi naababoolera ati, ‘Muli ohuhola siina sino?’ Muboole muti, ‘Omwaami niye okudaha, achia ohukukalusa bwaangu.’ ” 4Mani bawaao, banyoola omwaana kw'esuhiri nikuboyerwe amulyaango w'enyuumba hu ndulo w'engira ndakalafu; mani baakuboolola. 5Nae abo abali nibeemere aambi ao bababoolera bati, “Eng'we muhola siina esyo? Lwasiina muli ohuboolola omwaana kw'esuhiri okwo?” 6Nae abeeki abo baabakaluhamo koti Yesu yali ababoolere; mani baabaleha bawaao. 7Abeeki abo baleetera Yesu omwaana kw'esuhiri okwo, baakwaalaho engubo chaabwe; mani Yesu yaakwiihalaho. 8Mani abaandu abaangi baala engubo chaabwe hu ngira, nae abaandi baakula amasaga k'emisaala akaliho amasaafu maangi mani baakaala hu ngira. 9#Sab 118:25,26. Mani abo abali nibatangiiremo neende abo abali nibaloondaho bachaaka ohuhuumula nibaboola bati, “Hosaana! Ali neende ehabi oyo owiicha mu liita ly'Omwaami! 10Buli neende ehabi obutuki bwa seefwe Daudi obuli ohwiicha! Hosaana aakulu muno!”

11Yesu yeengira mu Yerusalemu, yaachia mu Nyuumba ya Nasaae; yatingaala yaaswaania buli siindu; nae koti obwiire bwali bwiirire, yatula yaachia Bbetani alala neende abeeki bae ehumi-na-babiri.

Yesu abwaaba omutuli

12Nibwahya, hu ludaalo luloondaho, nibeecha ohutula Bbetani, enjala yaluma Yesu. 13Nae niyabona omutuli eyale nikudidiisye amasaafu, yasuda aambi ohubona naanyala ohukunyoolahooho esyaamo syosi. Nae niyakwoolaho, haba siyakunyoolahooho esiindu syosi ohutusaho amasaafu sa, olwohuba sisyali esiha sy'emituli ohwaama. 14Mani Yesu yaakuboolera ati, “Omuundu yeesi ahoya yahaya ohuhulyaahooho esyaamo syosi haandi.” Mani abeeki bae nabo bawulira sino.

Yesu yeengira mu Nyuumba ya Nasaae

15Mani boola Yerusalemu. Nae niyeengira mu Nyuumba ya Nasaae, yachaaka ohwiirusamo abo abali nibakusira alala neende abo abali nibakulira mu Nyuumba ya Nasaae eyo. Mani yafuumamya emeesa ch'abafuunji b'eseende neende ebisaala by'abo abali nibakusa amabburuuku; 16mani haba siyafukiirira omuundu yeesi ohubisira esiindu syosi mu Nyuumba ya Nasaae. 17Yesu yeekesa n'ababoolera ati, “Haba sisyandiikwa mu byandiiko byoolerefu siti, ‘Enyuumba yaange yahalaangwe enyuumba y'esaala eyiri abaandu boosi?’ Nae eengwe muyiholere obweekiso bw'abanyaka.” 18Nae abalaamisi bahuluundu alala neende abaandiiki b'Amalako nibawulira batyo, bachaaka ohukiiya engira y'ohumwiitiramo; nae bamutya olwohuba esidiiyiha sy'abaandu syali siwukaho sa enjekesa yae. 19Nae engoloobe niyoola, Yesu neende abeeki bae #11:19 Yesu neende: Ebyandiiko bihuluundu bihale biindi bisoma biti, ‘Ye neende.’ batula mu siko esyo.

Elyeeko litula hu mutuli

20Nae nibali nibabitao echuli, babona omutuli okwo nikwoomere ohwoolera elalira hu misi. 21Ao Petero yeechulisa, mani yaboobera Yesu ati, “Omwaami, #11:21 Oba Rabbi oba Omweekesa bonaho! Omutuli ku wabwaabire kumalire ohwooma.”

22Nae Yesu yabakobolamo ati, “Mufukiirire mu Nasaae. 23#Mat 17:20; 1 Kor 13:2. Mbaboolera obwadyeeri endi, oyo yeesi oboolera olugulu luno ati, ‘Wekiinge weesukune mu nyaanja,’ mani yahaya ohukana-kana mu mwooyo kwae, nae yafukiirira ati esyo syaaba alomaloma sichia ohweehola, siba sichia ohumweeholehera sityo. 24Sakira mbaboolera endi, buli syosi syooba noosaba mu saala, fukiirira oti omalire ohusinyoola #11:24 omalire ohusinyoola: Ebyandiiko bihuluundu biindi bisoma biti, ‘bali ohunyoola.’ esyo, haandi siba sichia ohuba esyeeng'we. 25#Mat 6:14,15. Nae nimweema ohulaama, mulehereenge abasyeeng'we babaliho emboosi mberi, hu Seeng'we oli Muukulu yesi anyale ohubalehera ebyonoono byeeng'we. 26Nae nimutalehera abasyeeng'we, Seeng'we oli Muukulu yesi haba saaba achia ohubalehera ebyonoono byeeng'we mwesi.” #11:26 Nae nimutalehera abasyeeng'we, Seeng'we oli Muukulu yesi haba saaba achia ohubalehera ebyonoono byeeng'we mwesi: Ebyandiiko biindi bibulamo olunyiriri luno.

Esiteebo sidiira hu bunyala bwa Yesu

27Mani haandi boola mu Yerusalemu. Nae niyali akeenda mu Nyuumba ya Nasaae, abalaamisi bahuluundu alala neende abaandiiki b'Amalako, beecha yi yali, 28bamuboolera bati, “Otusaanga yeena obunyala bw'ohuhola ebiindu bino, kose wiina owahuba obunyala bw'ohuhola bino?” 29Yesu yababoolera ati, “Njia ohubateeba esiteebo silala syoong'ene; nimuungaluhamo, syesi mba njia ohubaboolera yi ndusaanga obunyala bw'ohuhola bino. 30Ohubatiisa hwa Yowaana, hwatula Muukulu, kose mu baandu? Muungaluhemo.” 31Baboolanira abeene-na-beene bati, “Nihuboola huti, ‘hwatula Muukulu,’ achia ohutuboolera ati, ‘Lwasiina simwamufukiirira?’ 32Kose huboole huti, ‘Hwatula mu baandu?’ ” Bali batiire abaandu, olwohuba abaandu boosi bali bamanyire bati, Yowaana yali omunabbi mweene. 33Mani bakaluha mu Yesu bati, “Efwe hukoterwe.” Nae Yesu yababoolera ati, “Syesi haba siinja ohubaboolera yi ndusaanga obunyala bw'ohuhola ebiindu bino.”

Currently Selected:

Mariko 11: SAMIA

Highlight

Copy