Matayo 9

Yesu awonia omusaacha wadataala

(Mrk 2:1-12; Luk 5:17-26)

1Yesu yeemao yeengira mu lyaato, yaambuha yeekaluhirayo mu siko sy'ewaabwe syeene. 2Niyoola sa ati, bamuleetera omusaacha wali niyadataala niyeyaliise hu buliri bwae. Nae Yesu niyabona efukiirira yaabwe, yaboolera omusaacha wali niyadataala oyo ati; “mwaana waange, guma omwooyo, ebyonoono byao bihuleheerwemo.”

3Nae abaandiiki b'Amalako baboolanira abeene-na-beene bati, “Omuundu wuno ali ohufwoola Nasaae!”

4Nae Yesu koti lu yali naamanyire #9:4 yali naamanyire: Ebyandiiko bihuluundu bihale biindi bisoma biti, niyabona. ebibaaso byaabwe, yaboola ati; “Lwasiina muli neende ebibaaso bibi mu myooyo kyeeng'we?” 5Esiri yena esyaangu, ohuboola oti, “Ebyonoono byao bihuleheerwemo,” kose ohuboola oti, “Siingira okeende?” 6Nae hu munyale ohumanya muti Omwaana w'Omuundu ali neende obunyala hu syaalo obw'ohuleheramo ebyonoono, yaboolera omusaacha yali yadataala oyo ati; “Siingira, obukule obuliri bwao ochie engo!”

7Mani yaasiingira yaachia engo. 8Nae esidiiyiha sy'abaandu esyali ao, nisyabona sityo, syatya muno, mani syaakinia Nasaae, owaberesa abaandu obunyala buli butyo.

Yesu alaanga Matayo

(Mrk 2:13-17; Luk 5:27-32)

9Yesu niyali atula eyo, yabona omusaacha olaangwa Matayo niyehaale abuundu yi batoosera omusolo, yaamuboolera ati, “Noonde.” Matayo yasiingira yaamuloonda.

10 # Luk 15:1,2. Haandi Yesu niyali naali ohunyoola esy'engoloobe, #9:10 ohunyoola esy'engoloobe: Mu Lugiriki nayeehere abatoosa b'emisolo baangi neende abahola-mbi, beehala baalya nae esy'engoloobe alala neende abeeki bae. 11Nae Abafarisaayo nibabona sino, baboolera abeeki bae bati; “Lwasiina omweekesa weeng'we alya neende abatoosa b'emisolo alala neende abahola-mbi?”

12Nae niyawulira esyo, yaboola ati, “abaandu balamu haba sinibo abadahaanga omulesi, nae abalwaae nibo abamudahaanga.” 13#Mat 12:7; Hos 6:6.Muchie mweeke amahuluundu ka sino, “Ndaha esisa, nae haba siindaha ebiyaanwa by'ebisolo bisaambwa. Olwohuba sindeecha ohulaanga aboolerefu, nae abahola-mbi.”

Esiteebo sidiira hu husiiba

(Mrk 2:18-22; Luk 5:33-39)

14Olwoola, abaloondi ba Yowaana beecha eyiri Yesu nibaboola bati; “Hu siina efwe neende Abafarisaayo husiiba, #9:14 husiiba: Ebyandiiko bihuluundu bihale biindi bimeedaho biti, muno oba haandi biti, buli siha. nae abeeki bao haba sibasiiba?”

15Nae Yesu yababoolera ati, “Abalaange bohu sidyaalo syohudeehisania, banyala batye ohweelalihira omugole mweene n'asisiiri nabo? Nae endaalo chahoole chi mugole yahabatusirweho, mani olwo nilwo lu bosi bahasiibire. 16Haandi abulao omuundu wahanabira esiraka siyaaha hu ngubo ngofu, olwohuba esiraka esyo siba sinehuuna sitaanduhe situle hu ngubo eyo, mani esitanduuhe esyo syeehole esitabaafu ohuhirahoo. 17Haandi, efiini njaaha sibayitechaanga mu sikiingiro sy'eseero sikofu. Nisiba sityo, esikiingiro sikofu esyo siba sichia ohwaadiha, mani efiini yiidihe, haandi esikiingiro syosi sitaanduhe. Nae, efiini njaaha yihoyere bayite mu sikiingiro sy'eseero siyaaha, hu byoombi binyale ohuliindana.”

Yesu awonia omuhasi w'esihulukuto neende omuhaana w'omuhoongo w'esinagoogi

(Mrk 5:21-43; Luk 8:40-56)

18Yesu niyali naasilomaloma nabo, omwiimirisi w'abayudaaya wuundi yeecha yaasigama mu moni wae, yaamuboolera ati; “Omuhaana waange yahafwa sa esiha sino, nae yichia omwiisehooho omuhono kwao, aba achia ohulamuha.”

19Yesu yasiingiraniramo ebiha ebyo yaamuloondaho alala neende abeeki bae.

20Nae bone, omuhasi wuundi owali naalwaalire obulwaae bw'esihulukuto ohumala emyaaka ehumi-na-kibiri yamutulira emukoongo, yadiira hu kemo ly'engubo yae; 21Olwohuba yali ni yeebooleere mu mwooyo kwae ati, “Niwiichuhana ndaadiiraho kata sa hu ngubo yae, mba njia ohuwona.” 22Yesu niyahubba amahemo yamubona mani yaamuboolera ati; “Mwaana waange, guma omwooyo! Efukiirira yao yihuwoniisye.” Mani ebiha byeene ebyo n'omuhasi oyo awona.

23Nae Yesu niyoola mu nyuumba y'omwiimirisi oyo, yabona aboobbi b'amalere neende esidiiyiha sy'abaandu nisiyobere, 24mani yaababoolera ati, “Mumbweere-eyi! Olwohuba omuhaana wuno haba saafwiire, nae ali ohukona sa.” Nae nabo bamucheha sa. 25Nae esidiiyiha sy'abaandu nisyamala ohutula erwaanyi, Yesu yeengira mu nyuumba, yaamudiira omuhono, mani omuhaana wali afwiire oyo yaasiingira. 26Emboosi eyo yasalaana mu situundu sy'esyaalo esyo syoosi.

Yesu awonia abasaacha bawofu babiri

27Nae Yesu niyali atula n'awaao, abawofu babiri bamuloondaho nibahuumulira aakulu bati, “Mwaana wa Daudi, Tukwiireho esisa!” 28Nae niyeengira mu nyuumba, abawofu babiri beecha yaali, mani Yesu yaababoolera ati, “Mufukiirira muti nyala ohubawonia?” Nabo bamukobolamo bati, “Eee, Omwaami!” 29Yesu yadiira hu moni chaabwe yaaboola ati, “Ohweema hu fukiirira yeeng'we, leha sibaholerwe sityo.”

30Mani emoni chaabwe chaliimbula chachaaka ohubona. Yesu yabalagira ati, “Mutabooleraho omuundu yeesi.” 31Nabo nibatula ao bachaaka ohulaangirira ebidiira hu Yesu mu situundu sy'esyaalo esyo syoosi.

Yesu awonia omusaacha wakwa esiru

32Abo nibali nibawaao bati, bone, bamuleetera omuundu wakwa esiru olwohuba yaliho omusaambwa. 33Nae niyamala ohwiirusa omusaambwa okwo, owakwa esiru oyo yalomaloma, mani esidiiyiha sy'abaandu syali ao syaawuka, nisiboola siti; “Esiindu sifwaana siti, sisibechaanga hoo mu Yisiraeli.”

34 # Mat 10:25; 12:24; Mrk 3:22; Luk 11:15. Nae Abafarisaayo nabo baboola bati; “Wuno yeerusa emisaambwa hulw'amaani k'omwaami w'emisaambwa.” #9:34 Wuno yeerusa emisaambwa hulw'amaani k'omwaami w'emisaambwa: Ebyandiiko bihuluundu bihale biindi bileha olunyiriri luno erwaanyi.

Yesu akwiira abaandu esisa

35 # Mat 4:23; Mrk 1:39; Luk 4:44. Yesu yeemao yaabodoohana mu biko byali ao byoosi neende mu ngoongo choosi, niyeekesa mu Sinagoogi ch'Abayudaaya haandi naalaangirira Emboosi Ndai y'Obwaami bwa Nasaae, haandi naawonia amalwaae neende amadehere kataali nasilala. 36#Hub 27:17; 1 Abat 22:17; 2 Biha 18:16; Esek 34:5; Mrk 6:34.Nae niyabona esidiiyiha sy'abaandu, yabakwiira esisa muno, olwohuba bali belalihiire haandi nibataali neende obuhoonyi koti amakoondi kataali neende omwaayi. 37#Luk 10:2.Mani Yesu yaaboolera abeeki bae ati, “Ekesa liingi, nae abakesa nibo abadiidi. 38Sakira musabe Omwaami mweene kesa, atume abahalaabani mu kesa lyae.”

Currently Selected:

Matayo 9: SAMIA

Highlight

Copy