Matayo 8

Yesu awonia omulwaae w'Ebigeenge

(Mrk 1:40-45; Luk 5:12-16)

1Olwoola, Yesu niyamala ohwiiha ohutula hu lugulu, esidiiyiha sy'abaandu sihoongo muno syamuloonda. 2Abweene ao, omusaacha wali n'alwaala obulwaae bw'ebigeenge yeecha eyiri Yesu, yaasigama mu moni wae, yaamuboolera ati; “Omwaami, noodaha, onyala waamonia!”

3Yesu yakolola omuhono kwae, yamudiiraho, n'aboola ati; “Ndaha, mani wona.” Esiha syeene esyo, amakere ako kamwaamuluhaho. 4#Lef 14:1-32.Yesu niyamala atyo yamulagira n'aboola ati, sino, otasibooleraho omuundu yeesi ohutusaho chia weyekese eyiri omulaamisi, ahwehaliirise; mani oyaane esiyaanwa syeekesa abaandu siti owonere koti lu Musa yalagira mu malako.

Yesu awonia omuhalaabani w'omusikaari muhunuufu Murooma

(Luk 7:1-10)

5Olwoola, Yesu niyeengira Kaperanaumu omusikaari muhunuufu wa Rooma yaabukaanana nae, yaamusaba obuhoonyi ati; 6“Omwaami, ndi neende omuhalaabani waange engo omulwaae muno, saanyala kata neende ohukeenda hulw'obuchuuni buungi.” 7Yesu yamukobolamo ati; “Njicha ohwiicha muwonie.” 8Nae omusikaari oyo yaamuboolera ati; “Aaa, Omwaami ebyo haba, ese haba siihoyerwaho ewe ohwiicha ohwiingira mu nyuumba yaange, ohumalaho, lomaloma sa emboosi ndala yoong'ene n'omuhalaabani waange awona. 9Olwohuba syesi ndiho neende abaanduka aakulu waange, haandi syesi ndi neende Abasikaari aasi waange, ba nduka. Nindagira mulala endi, ‘Chia,’ naachia sa; haandi nindagira owuundi endi, ‘Yicha,’ niyeecha sa; haandi nindagira omuwaambe waange endi; ‘Hola sino,’ naasihola sa.” 10Yesu niyawulira atyo yawuka muno, yaboolera abali nibamuloondaho ati; “Mbaboolera obwadyeeri endi, sisiiri ohubonaho efukiirira koti yino hu muundu yeesi #8:10 hu muundu yeesi: Ebyandiiko bihuluundu bihale biindi bisoma biti, kata hu muundu mulala. mu Yisiraeli. 11#Luk 13:29.Ndaha mumanye muti abaandu baangi bachia ohutula ebukwe neende emuumbo bayirire alala Obwaami bwo Muukulu neende Abburahamu, Yisaka neende Yakobbo. 12#Mat 22:13; 25:30; Luk 13:28.Nae abo abahoyere ohuba mu bwaami bwo Muukulu bachia ohusukunwa erwaanyi mu siirima, yi bahalirire nibeesia ameeno.” 13Yesu yeemao yaaboolera omusikaari oyo ati, “Koti lu oli neende efukiirira otyo, kaluha engo, byoodaha ebyo bichia ohuhuholerwa.”

Mani esiha syeene esyo omuhalaabani w'omusikaari oyo yawonerao.

Yesu awonia abaandu baangi

(Mrk 1:29-34; Luk 4:38-41)

14Yesu yachia ewa Petero yakaana masaalaang'ene Petero niyeyaliise olwohuba yali n'alwaala omusuuja. 15Nae Yesu ni yamudiira hu muhono, omusuuja kwamuleherao esiha syeene esyo, mani yachaaka ohubahalaabanira. 16Obwiire nibweera, bamuleetera abaandu baangi abaliho emisaambwa. Yesu yabeerusaho ebihyeeno ebyo niyehoonyera sa emboosi yoong'ene, mani yaawonia abalwaae abo boosi. 17#Yis 53:4.Yahola atyo ohwooseresa si munabbi Yisaaya yaboola ati, “Yatutusaho amadehere keefwe, haandi yaakiinga amalwaae keefwe.”

Abahoyeere ohuba abaloondi ba Yesu

(Luk 9:57-62)

18Olwoola, Yesu niyabona esidiiyiha sy'abandu nisimwebodoohaanie, yayiika abeeki bae baambuhe engereha w'enyaanja. 19Nae Omweekesa w'amalako wuundi yeecha yaali yaamuboolera ati; “Omweekesa, njia ohuhuloondaanga buli yoochiira.”

20Nae Yesu yamukobolamo ati; “Amabbwe kali neende ameena ka kamenyamo, haandi amayoni kosi kali neende ebiyu byako, nae Omwaana w'Omuundu saali neende kata yi yahageeng'a omutwe.” 21Mulala hu beeki bae yamuboolera ati; “Omwaami, leha mberi njie siihe Laata.” 22Nae Yesu yamukobolamo ati; “Ewe noonde. Leha abafu basiihe abafu baasyaabwe.”

Yesu ayenjeesa enyaanja yiiyire

(Mrk 4:35-41; Luk 8:22-25)

23Yesu yeengira mu lyaato ohwaambuha engereha alala neende abeeki bae. 24Abweene ao, esiifuusye sy'amaani syeeyisa enyaanja, amafwiinda kaasiingira kaahubba elyaato elyo lyaadaha ohwiibira. Nae Yesu yali niyeyaliise endoolo. 25Abeeki nibabona batyo, bachia yaali, baamusimusa nibamuboolera bati, “Omwaami; Tuwonie! Hufwa!”

26Nae Yesu yababoolera ati, “Lwasiina mutya?” Nga muli neende efukiirira ndiidi! Yesu yasiingira yaahabuhira esiifuusye esyo neende enyaanja, mani byoosi byaayenjeera chi!

27Mani buli muundu hu bo yawuka muno, mani beteeba bati; “Nae wuno muundu w'engeri siina, kata esiifuusye neende enyaanja byosi bimuwulira!”

Yesu awonia abasaacha babiri abaliho emisaambwa

(Mrk 5:1-20; Luk 8:26-39)

28Yesu niyoola hu sikobero sya Gadaraneese, #8:28 Gadaraneese: Ebyandiiko bihuluundu bihale biindi bisoma biti, Gerigesenesi, abaandu babiri abaliho emisaambwa, babukaanana nae nibatulira mu ng'uungu chi basiihaangamo abaandu. Ab'emisaambwa abo bali abaalaba muno, mani abulao omuundu wadahaanga ohubitira yi bali. 29Nibamubona, bachaaka sa ohwayulira aakulu bati, Omwaana wa Nasaae, otukoonyaho siina? Wiichire ano ohutuboneeresa ebiha nibitoola?

30Ao waliwo omukaanda muhoongo okw'embiichi nikwaaya. 31Mani emisaambwa ekyo kyaasaba Yesu kiti; “Noodaha ohutwiirusa, tusiindihe mu mbiichi chino.”

32Yesu yaboola ati; “Muchie.” Mani kyaachia kyeengira mu mukaanda kw'embiichi okwo. Omukaanda okwo kwoosi kwabbabuluha embiro kweehubba mu nyaanja, kweebira kwaafwa.

33Abaayi b'embiichi echo nibabona batyo, bosi beeruha baachia mu siko baboolera abaandu byoosi ebyali ni byeeholeehe hu baandu b'emisaambwa abo. 34Sino syakera abaandu bomu siko esyo beecha ohubonana neende Yesu, mani baamwekweeda bati atule mu situundu syaabwe esyo.

Currently Selected:

Matayo 8: SAMIA

Highlight

Copy