Matayo 16

Ohusaba Yesu aholeho esy'amayia

(Mrk 8:11-13; Luk 12:54-56)

1 # Mat 12:38; Luk 11:16. Abafarisaayo neende Abasadukaayo baandi beecha eyiri Yesu ohumuhema nibamusaba bati abeekeseho esy'amayia ohutula Muukulu. 2Nae Yesu yabakobolamo ati, #16:2 Elyuuba nilichia ohukwa, muboolaanga muti, esyaalo mbao sichia ohuba esiyenjeefu, olwohuba ekulu liba lyaahaanye: Ebyandiiko bihuluundu bihale biindi bileha emboosi chiloondaho chino ohwoola yi lunyiriri lwa 3 lwaakamira “Elyuuba nilichia ohukwa, muboolaanga muti, ‘esyaalo mbao sichia ohuba esiyenjeefu, olwohuba ekulu liba lyaahaanye’. 3Haandi mu mabwiibwi, muboolaanga muti, ‘Oludaalo lunaba olw'omuyaka, olwohuba ekulu lyaahaanye haandi amaleesi kamaliiye.’ Mumanyire muno ohukeraania engeri yi syaalo sichia ohubeeramo ni mutingaala sa hu maleesi, nae simunyala ohukeraania obulolero bw'ebiha bino. 4#Mat 12:39; Luk 11:29.Oluse luno nga lubi haandi nga lucheke! Mukoonyeresa sa esy'amayia syoong'ene? Nikali katyo, sibulao esy'amayia si ndababeresa, ohutusaho esya Yona.” Bulaanu Yesu yeemao yaasiingira yaabeelehera ao yaawaawo.

Amamera k'Abafarisaayo neende Abasadukaayo

(Mrk 8:14-21)

5Nae Abeeki ba Yesu nibaambuha enyaanja boola engereha, bali beebiriire ohukiingaho omugaati kwoosi. 6#Luk 12:1.Yesu yababoolera ati, “Mweeme buheke, haandi mweliinde eyiri amamera k'Abafarisaayo neende Abasadukaayo.”

7Bachaaka ohweteebanaho nibaboola bati, “Aboola atyo olwohuba sihukiingireho omugaati kwoosi kose?”

8Nae Yesu yamanya mu mwooyo kwae bi bali nibabaasa, mani yaabateeba ati, “Eng'we ab'efukiirira ndiidi, lwasiina mweeteebanaho obutaba neende omugaati? 9#Mat 14:17-21.Eng'we mwesi, musisiiri ohumanya? Simwiichulisa emigaati kitaanu ekyeekusa abaandu elifu chitaanu? Nae ebimweero biinga bi mwabuusa? 10#Mat 15:34-38.Oba, emigaati kitaanu-na-kibiri ekyeekusa abaandu elifu chine? Nae ebimweero biinga bi mwabuusa? 11Mubeere mutye mwaahaya ohumanya muti, simbeere ninomanoma ebidiira hu mugaati? Mweliinde amamera k'Abafarisaayo neende ak'Abasadukaayo.”

12Abeeki bulaanu bamanya bati, Yesu siyali n'ababoolera ohweliinda amamera k'emigaati, nae yali naali ohulomalomaanga hu njekesa y'Abafarisaayo neende ey'Abasadukaayo.

Ohutuumbula hwa Petero ati, Yesu niye Kristo

(Mrk 8:27-30; Luk 9:18-21)

13Bulaanu, Yesu niyeecha mu situundu silaangwa siti Kaisarea sya Filipi yateeba abeeki bae ati, “Abaandu baboola bati, Omwaana w'Omuundu niye naanu?”

14 # Mat 14:1,2; Mrk 6:14,15; Luk 9:7,8. Nae baboola bati, “Abaandi baboola bati, Yowaana Omubaatiisi, abaandi bati, Elija, haandi abaandi bati, Yeremia, oba mulala hu banabbi.”

15Nae yabateeba ati, “Nae eng'we muboola muti ese niise naanu?”

16 # Yow 6:68,69. Simooni Petero yakobolamo ati, “Niiwe Kristo, Omwaana wa Nasaae mulamu.” 17Nae Yesu yamukobolamo ati, “Simooni mwaana wa Bbari-Yona, oli neende ehabi! Olwohuba obwadyeeri buno, soobunyoolere ohutula hu muundu sa, nae Laata oli Muukulu niye ohubwiihuliireo. 18Mani huboolera endi, niiwe Petero, #16:18 Petero: Mu Lugiriki Peterosi. haandi hu lwaanda luno, #16:18 lwaanda: Mu Lugiriki Petera. nihwo hu njia ohwoombaha Omukaanda Abakristo, ku mani kata ohufwa #16:18 ohufwa: Mu Lugiriki ebiruwa by'emakoombe. sihwahanyale ohubayiingira. 19#Mat 18:18; Yow 20:23.Njia ohuhuberesa obufunguwo bw'Obwaami bwo Muukulu, mani buli siindu syoonafuundihaanga hu syaalo, sichia ohufuundihwaanga Muukulu, haandi buli syoonatuumbululaanga hu syaalo, sichia ohutuumbululwaanga Muukulu.”

20Yesu yamala atyo yaalagira abeeki bae obutabooleraho omuundu yeesi bati niye Kristo.

Yesu alomaloma hu husaanda hwae, neende hu hufwa hwae

(Mrk 8:31—9:1; Luk 9:22-27)

21Ohutula esiha esyo, Yesu yachaaka ohweekesaanga abeeki bae ati, ahoyere ohuchia Yerusalemu, mani Abeemeresi b'abaandu, neende Abalaamisi bahuluundu, neende Abeekesa b'Amalako, bamusaandie muno haandi bamwiite, nae hu ludaalo lwohudatu asyuuhe.

22Nae Petero yamusudya endulo yachaaka ohumuyiingania n'aboola ati, “Omwaami! Nasaae atakanya esyo syaahweeholehaho.”

23Yesu nae yakaluuhana mani yaaboolera Petero ati, “Mbweere-eyi, Sitaani! Leha ohundehiinga mu moni, #16:23 ohundehiinga mu moni: Mu Lugiriki mbwe, esichihi sy'ohwegumulaho. olwohuba embaasa yao eyo, haba si ya Nasaae, nae y'abaandu sa.”

24 # Mat 10:38; Luk 14:27. Mani Yesu yaboolera abeeki bae ati, “Omuundu yeesi odaha ohunoonda, omweene yeetuseyo akiinge omusalabba kwae, mani yanoonde. 25#Mat 10:39; Luk 17:33; Yow 12:25.Olwohuba omuundu yesi odaha ohuwonia obulamu bwae, achia ohubufwiirwa; nae oyo yeesi ofwiirwa obulamu bwae hulwaange achia ohubunyoola. 26Ngaanga siina yi muundu anyoola, naanyoola esyaalo syoosi nae yaafwiirwa obulamu bwae bweene? Oba, siina syeene si muundu yahoofwong'aniamo obulamu bwae nasyo? 27#Mat 25:31; Sab 62:12; Rom 2:6.Olwohuba, Omwaana w'Omuundu achia ohwiicha neende bamalaika bae mu luyaali lwa Simwaana, mani akabe buli muundu omukabo, ohweema hu biholwa byae. 28Nae mbaboolera obwadyeeri endi, baliwo abaandi, hu beemere ano, abatalifwa nibataabona Omwaana w'Omuundu niyeecha mu Bwaami bwae.”

Currently Selected:

Matayo 16: SAMIA

Highlight

Copy