Matayo 15

Enjekesa y'abahale

(Mrk 7:1-13)

1Olwoola, Abafarisaayo neende Abeekesa b'Amalako batula Yerusalemu beecha eyiri Yesu baamuteeba bati, 2“Lwasiina abeeki bao balekeeresa emiduunga kya bakuuka yeefwe? Olwohuba sibesaaba amahono kaabwe nibachia ohulya.”

3Yesu yabakobolamo ati, “Nae lwasiina eng'we mulekeresa amalako ka Nasaae olwohuba mudaha ohuloonda emiduunga kya bakuuka yeeng'we? 4#Hut 20:12; Amal 5:16; Hut 21:17; Lef 20:9.Olwohuba Nasaae yaboola ati, ‘Yisaanga mu lataao neende maakoo oluyaali’ haandi, ‘Omuundu onyeka laatang'ene kata ng'ina, ahoyera ohwiitwa.’ 5Nae eng'we muboola muti, ‘Omuundu yeesi naaboolera laatang'ene kata ng'ina ati, omukabo ku ndahahubereese mbao ngubereese Nasaae, #15:5 omukabo: Oba esiyaanwa. bulaanu oyo saaba ahoyera ohuberesa laatang'ene oluyaali.’ 6Mani sakira mulehaanga ohuloonda emboosi #15:6 emboosi: Ebyandiiko bihuluundu bihale biindi bisoma biti, amalako. ya Nasaae, hulw'ohudaha ohuloonda emisiro kyeeng'we. 7Eng'we Abebachirisi! Omunabbi Yisaaya yahola bilai ohubalomalomaho n'aboola ati,

8 # Yis 29:13. ‘Abaandu bano baamberesaanga sa oluyaali

neende eminwa kyoong'ene, nae

emyooyo kyaabwe kiri eyale muno naange;

9ohwiinama hu baanyinamiramo, hubulamo

obuhoonyi,

olwohuba amalako ka beekesa

ka abaandu sa.’ ”

Ebiindu bibaha omuundu omukwoobo

(Mrk 7:14-23)

10Olwoola, Yesu yalaanga abaandu beecha yali, mani yaababoolera ati, “Muwulire mani mumanye; 11esiingira muhanwa w'omuundu, sinisyo esimubaha omukwoobo, nae esitula mu munwa kwae, nisyo esimubaha omukwoobo.”

12Mani abeeki bae beecha yaali baamuboolera bati, “Omanyireho oti bi oboolere ebyo, bichuunire Abafarisaayo muno?”

13Yesu yakobolamo ati, “Buli simera syoosi si Laata oli Muukulu atataaka, sichia ohwiiywa. 14#Luk 6:39. Eng'we mubalehe sa; abo nibo abeemirisi bawofula. Nae omuwofu niyeemirira omuwofu waasye, boombi bachia ohukwa mu buko.”

15Nae Petero yamuboolera ati, “Tutumbuulireho amahuluundu k'olukaado olwo.”

16Nae Yesu yaboola ati, “Eng'we mwesi musisiiri ohumanya amahuluundu ka bino? 17Simubona muti buli siingira muhanwa w'omuundu, sichia sa mu nda mani syaasukunwa esibakala? #15:17 syaasukunwa: Oba syaatusibwa erwaanyi 18#Mat 12:34. Nae esitula mu munwa kw'omuundu, siba situla mu mwooyo kwae, mani nisyo esibaha omuundu omukwoobo. 19Olwohuba mu mwooyo nimwo omutula ebibaaso bibi, obwiiti, obuyirani, obucheke, obwiibi, obwaayirisi, neende ohunyaasa ameeta k'abaandi. 20Bino nibyo ebinyaasa omuundu; nae ohulya noteesaabire amahono, haba sinisyo ebinyaasa omuundu.”

Efukiirira y'omuhasi

(Mrk 7:24-30)

21Haandi Yesu yatula ao yaachia mu situundu siri aambi neende ebiko bya Tiiro neende Sidoni. 22Abweene ao, omuhasi Mukanani wuundi otula mu situundu esyo, yeecha eyiri Yesu yaamulirira ati, “Omwiichuhulu wa Daudi, ngwiireho esisa; omuhaana waange aliho omusaambwa mani mulwaae muno.”

23Nae Yesu haba siyamukobolamo kata emboosi ndala. Nae abeeki bae beecha yaali baamusaba nibaboola bati, “Museebule aweeo, olwohuba ali ohutuloonda niyelirikania-lirikania.”

24Nae Yesu yakobolamo ati, “Ndatumwa eyiri amakoondi kakota k'enyuumba ya Yisiraeli koong'ene.”

25Nae omuhasi oyo, yeecha yaasigama mu makulu ka Yesu yaaboola ati, “Omwaami, noojama hoonyeho.”

26Nae Yesu yakobolamo ati, “Sisihoyerwa ohubukula ebyohulya by'abaana mani waabisukunira embwa.” 27Omuhasi oyo nae yakobolamo ati, “Omwaami esyo syadyeeri, nae kata embwa chosi chilichaangaho ebidonye-donye bilakaha ohutula hu meesa y'omutuki wacho.”

28Yesu yamukobolamo ati, “Ngooli omuhasi w'efukiirira hoongo! Leha sihuholerwe koti lwoodaha.” Mani esiha syeene esyo omuhaana wae niyeemao naawona.

Yesu awonia abaandu baangi

29Yesu yatula ao yaabitira hu ndulo wa enyaanja ya Galilaaya. Mani yaaniina hu lugulu, yeehala aasi. 30Nae esidiiyiha sihoongo syeecha yaali, nibamuleetera abalema, abeebokoya emibiri, abawofu, abakwa esiru neende abaandi batyo, mani baabata mu makulu kae, yaabawonia. 31Abaandu bawuka muno nibabona abaandu bali bakwa esiru nibalomaloma, abeebokoya emibiri, nibawonere; abalema, nibakeenda; haandi abawofu, nibabona; mani bafumya Nasaae wa Yisiraeli.

Yesu aliisa abaandu baandi ababita elifu chine

(Mrk 8:1-10)

32Yesu yalaanga abeeki bae beecha yaali, mani yaaboola ati, “Abaandu bano bakera esisa nisiindiira muno, olwohuba babeere naange endaalo chidatu enaamba, nae bawuma esyohulya syoosi-syoosi; nae siindaha ohubaseebula nibataaliireho esiindu syoosi, olwohuba olumbuuchu lunyala lwaabadiira lwaabakwiisa hu ngira nibakaluhayo.”

33Nae abeeki bamuboolera bati, “Nae mu siparara muno, hunaatuse yeena emigaati kinyala ohwiikusa abaandu bano boosi?”

34Yesu yababoolera ati, “Muli neende emigaati kiinga?” Baboola bati, “Kitaanu-na-chibiri neende otung'eeni tudiidi tuyeraanu.”

35Nae Yesu yaboolera esidiiyiha ohwiihala aasi, 36mani yaabukula emigaati kitaanu-na-kibiri ekyo, neende otung'eeni otwo. Niyamala ohweebasa, yabidonyoladonyolamo, mani yaabiberesa abeeki, nae abeeki baabiberesa abaandu. 37Boosi balya beekuta; mani abeeki ba Yesu baabuusa ebidonye-donye byadoong'aho, beechusa ebimweero bitaanu-na-bibiri. 38Abaandu balya bali abasaacha elifu chine n'otaabalireho abahasi neende abaana.

39Mani Yesu niyamala ohubaseebula, yeengira elyaato yaambuha yaachia mu situundu silaangwa siti Magadani.

Currently Selected:

Matayo 15: SAMIA

Highlight

Copy