Matayo 14

Ohufwa hwa Yowaana Omubaatiisi

(Mrk 6:14-29; Luk 9:7-9)

1Mu siha esyo Herode omutuki, yawulira efuma ya Yesu; 2mani yaaboolera abahalaabani bae ati; “Wuno niye Yowaana Omubaatiisi osyuuhire ohutula mu bafu, sakira amaani kano kali ohumuholeramo.”

3 # Luk 3:19,20. Olwohuba, Herode niye owali yadiira Yowaana, yaamusukuna mu jeela. Yahola atyo ohweema hu mboosi cha Herodia omuhasi wa Filipo mwaanang'ina; #14:3 omuhasi wa Filipo mwaanang'ina: Ebyandiiko bihuluundu bihale biindi bisoma biti, omuhasi wa mwaanang'ina. 4#Lef 18:16; 20:21.olwohuba Yowaana yali yaamuboolera ati, “Haba sisifukiirirwa ewe ohubukula omuhasi oyo.” 5Kata Herode yadaha ohwiita Yowaana, nae yatya abaandu, olwohuba bali nibamanyire bati Yowaana yali omunabbi.

6Nae oludaalo lw'ohwiichulisiraho ohwiibulwa hwa Herode nilwoola, omwaana wa Herodia muhaana, yahina bulai muno mu moni wa abakeni, mani sino syasaangaasa Herode muno, 7mani yaasuubisa omuhaana oyo niyeechuba ohumuberesa esiindu syoosi syaaba n'asabire.

8Nae omuhaana oyo yeemao yaaholera hu makesi ka ng'ina yali naamubereese mani yaaboolera Herode ati, “Mberese omutwe kwa Yowaana Omubaatiisi hu lusaani bulaanu buti.”

9Nae sino syamala omutuki amaani muno, nae ohweema hu hweechuba huyali ni yeechubire abakeni bae nibawulira, yatya muno mani yeemao yaatusa omunwa ati, baberese omuhaana oyo syaadahire. 10Yatuma ati baachia mu jeela baaheenga hu Yowaana omutwe, 11baakuleetera hu lusaani, mani baakuberesa omuhaana oyo, nae yaakuyirira ng'ina. 12Nae abeeki ba Yowaana beecha baabukula omubiri kwae, baachia baakusiiha, mani baaboolera Yesu.

Yesu aliisa abaandu babita elifu chitaanu

13Bulaanu Yesu niyawulira sino, yatula ao, yaambuhira mu lyaato yaachia yaaba yeeng'ene abuundu abula abaandu. Nae abaandu nibawulira batyo, bamuloondaho n'amakulu ohutula mu biko byaabwe. 14Niyatula mu lyaato, yabona esidiiyiha sy'abaandu sihoongo muno, mani syamudiisa esisa, yaawonia abalwaae baabwe.

15Nae obwiire nibweera, abeeki bae beecha yaali baamuboolera bati, “Obwiire mbuno bwiirire, haandi huli abuundu abulao abaandu; sakira seebula abaandu beeweereo bachie mu ngoongo beekulire ebyohulya.”

16Nae Yesu yaboola ati, “Abaandu bano haba sibahoyere ohutula sa ano batyo; eng'we mubaberese esyohulya.”

17Nabo bamuboolera bati, “Efwe huli sa neende emigaati kitaanu kyoong'ene alala neende eng'eeni chibiri sa.”

18Nae Yesu yaboola ati, “Mubindeetere ano.” 19Mani Yesu yamala yaalagira abaandu ohwiihala aasi hu bunyaasi; mani yaabukula emigaati kitaanu neende eng'eeni chibiri ebyo, yatingaala aakulu Muukulu, yeebasa Nasaae, mani yaadonyoladonyolamo emigaati ekyo yaakiberesa abeeki bae, nae abeeki baakikaba abaandu abo. 20Abaandu abo boosi balya beekuta. Mani abeeki ba Yesu baabuusa ebidonye-donye byadoong'aho beechusa ebimweero ehumi-na-bibiri. 21Nae abalya bali abasaacha aambi elifu chitaanu, n'otaabalireho abahasi neende abaana.

Yesu akeenda hu maachi

22Abweene ao, Yesu yaboolera abeeki bae ohwiingira mu lyaato basyaabale bamutaangirire ohwaambuha bachie engereha w'enyaanja, nae omweene yaadoong'a naaseebula esidiiyiha sy'abaandu esyo. 23Nae niyamala ohubaseebula, yaniina yeeng'ene hu lugulu ohulaama. Mani obwiire nibweera, yali adoong'ere yeeng'ene, 24nae esiha esyo elyaato lyali nilyoolobereere ebusiba, #14:24 ebusiba: Ebyandiiko bihuluundu bihale biindi bisoma biti, eyale muno hu nyaanja mani amafwiinda k'amaani nikalihubba; olwohuba omuyaka kwali nikuwuucha muno nikubatulira mu moni.

25Aambi w'esaa ehumi mu maherebeende, Yesu yeecha yi bali naakeenda hu maachi. 26Nae abeeki bae nibamubona naakeenda hu maachi, batya muno, baaboola bati, “Sino ngaandi siboneha sihyeeno nisyo!” Mani baatya muno boobba wuuwi.

27Nae abweene ao, Yesu yalomaloma nabo n'aboola ati, “Mugume emyooyo, niise; mutatya daawe.”

28Nae Petero yamukobolamo ati, “Omwaami, nooli niiwe, mboole njiche yooli syesi ningeenda hu maachi.” 29Yesu yamuboolera ati, “Ngaandi keenda sa niwiicha.” Mani Petero yatula mu lyaato, yachaaka ohukeenda hu maachi naachia eyiri Yesu; 30nae Petero niyabona omuyaka nikuwuucha, #14:30 omuyaka nikuwuucha: Ebyandiiko bihuluundu bihale biindi bisoma biti, omuyaka kw'amaani. yatya muno, yachaaka ohwiibira, mani yaahuumula ati, “Omwaami, monie!”

31Abweene ao, Yesu yakolola omuhono, mani yaamudiira, yaamuboolera ati, “Ewe, omusaacha w'efukiirira ndiidi, hu siina okana-kaane?”

32Nae nibeengira mu lyaato sa bati, omuyaka kwaakama ohuwuucha. 33Mani abo abali mu lyaato, beenamira Yesu nibaboola bati, “Mubwadyeeri bweene, oli Omwaana wa Nasaae.”

Yesu awonia abalwaae mu Genesareeti

(Mrk 6:53-56)

34Nibamala ohwaambuha enyaanja boola engereha, bakobera Genesareeti. 35Nae abaandu b'eyo, nibamanya bati niye Yesu, bachia baaboolera abaandu bomu situundu esyo syoosi, bati baleete eyiri Yesu abalwaae baabwe boosi, 36mani baamusaba bati afukiirire abalwaae badiireho sa hu kemo ly'engubo yae hamaahiri. Mani abo boosi abalidiiraho, bawonera elalira.

Currently Selected:

Matayo 14: SAMIA

Highlight

Copy