Matay 18

Sino ney rakeh na

(Make 9:33-37; Locya 9:46-50)

1No kanang am pacicin da no macinanao si Yeso. Maniring sira jya am, “Sino pakarakehen a tao do italamozong na ni Ama ta do to.” 2Karahan am manara si Yeso so asa ka kanakan a kapatanek na sya do tangain da. 3Maniring si Yeso am, “To ko na macitangayan jinyo am no si mamlis kamo akman so kanakan eya am ori o ipacikaop nyo do tao a italamozong na ni Ama ta do to. 4O akman so kanakan eya ji makazyazyak am ney rakeh na do italamozong na ni Ama ta do to. 5O mapanadnad jyaken a tomaotao so likta kanakan eya am kataotao ko na ori a taotawwen na.

Kalittan a meyraraten

(Matay 5:29-30; Make 9:42-48; Locya 17:1-2)

6“No amyan so tao a tomirara so pakananaken da tao a meyraraten a kapeymakaro na jyaken am apyapya rana kato rana milan do zagaw na itbong do awa a wakwaken. 7To sira makasi o tao do karawan a kalittan a meyraraten. O raraten no tao am kangay na ori. Am o tao a yapwan no kapeyraraten na am ney rako o oyaoyyan na no akman sang a tao ni Ama ta do to. 8No si asa ka lima mo no beken a ai mo o ipeyraraten mo am to ranangteba kawalit nya. Tana abo lima kano ai a kapakahap so to meyyonong a ikavyay no pahad am apyapya pa o akman sang, a kano meynanod so lima kano ai a mangay payongben do jyahesep a lila no apoy. 9No si asa ka mata mo o nipeyraraten mo am to rana ngoswa iwalit. Tana asa rana o mata mo a kapakahap mo so to meyyonong a ikavyay no pahad mo am apyapya o akman sang a kano meynanod so mata mangay do apoy do kararatan.

Pehngehngain na o ciring na do asa ka nimavozaw a kagling

(Locya 15:3-7)

10“Makapzat kamo. Ji nyo ngolala sira o pakananaken da tao. To ko na macitangayan jinyo am o tinsi a yasomidong sira am yamyan sira do tangain ni Ama ta do to do teyngato. 11[O Nipamnekan na ni Ama ta do to a tao am nimai a mapatazadang so meyraraten a tao.]

12“Naknakmen nyo pala. No amyan so tao a mapalam so yasa poo (100) a kagling a kavozaw no asa am jyabo kaji na to macyozayan do asyam so ipakapoo (99) a kagling a mangay komala so asa ka kagling a nimavozaw a. 13To ko na macitangayan jinyo am no si makala na o nimavozaw a asa ka kagling am jyabo kaji na noyotan a makacita so nimavozaw a kagling a kano asyam so ipakapoo (99) a kagling a. 14Akman sang si Ama ta do to, a ji mamyapya no pakananaken da tao a mavozaw so onowned ji Ama ta do to.

Nakenakem so meyraraten a kakteh mo do cinai

15“No amyan so malas a vazay na jimo no akma moy kakteh do cinai am to ka nangay a macitangay jya a manci no kalasan na. Am no maveyvow kamo am ori ikakman mo sang. No amizngen na imo am manoyong kamo na meypyapya so nakem do tangain ni Ama ta do to. 16Am no si ji na ngamiznga imo am to ka na manara so rarwa a mangay jya. O ikakman na sang am akma ney yongkad o rarwa am tatlo a ka tao do kanoyong da kalas da no mina ciring da.#18:16 Sen Ming Ci 19:15. 17No ji na pa ngamiznga am to mo nangayan do tangain no aro a sinjya a manci no cinapowapwan na no vazay. No ji na pa ngamiznga sira am to nyo rana ngopas o ngaran na, kaji na rana macibedbedan jinyo.

18“To ko na macitangayan jinyo am o raten nyo do teyrahem am raten ni Ama ta do teyngato. O apyahen nyo do teyrahem am akman sang a apyahen na do teyngato. 19Ko pa ipanci jinyo am tana rarwa kamo a kakma nyoy yasa so nakenakem a mapasyasi ji Ama ta do to am itoro na o amin nyo jya. 20Tana teyrararwa, teytatatlo o mapasyasi jyaken am macilovot ko jira.”

Pehngehngain na o ciring na do ji vonas so raraten no tao a lamlamsoy

21No kano nang am pacicin ni Pite si Yeso. Maniring am, “Mo Panirsirngen, no amyan so oyyan ko no kakteh ko am ipira ko a paoyowan. Manet rana o ipipito?” 22Maniring si Yeso am, “Beken a ipipito, ta to meyyonong o kapaoyo mo jya. 23Ta o italamozong ni Ama ta do to am akman so pehngehngayan ko so ciring eya. Ipisa o panirsirngen a omami so nivood da nizpi na no lamlamsoy na am, 24yai da do tangain na o asa do lamlamsoy na a nimamood jya so meykalaklaksa nizpi. 25Ikongo do abo o paolin na do nivood na no tao ang, am ori o to na rana manazangi nya do tao a lamlamsoy da, kapazanod na pa so mavakes na kano ananak na kano aro a peymasaodan na itbos na so nivood na nizpi. 26Karahan am to rana meylilitod o lamlamsoy na do tangain na a mapasyasi jya. Maniring am, ‘Ikasi mo pa yaken an. Cyaha, ta paolin ko o ko nivood jimo a nizpi.’ 27Ikarilaw no panirsirngen na am to na ranangbowa o nivood na jya a kapasaway na rana sya.

28“Makowbot o lamlamsoy na am masazi na o kararay na a nimamood jya so to makangarnan a nizpi. Karahan am rakpen na kavitkeh na so zagaw na. Maniring am, ‘Inney jya o nivood mo jyaken a nizpi asyo.’ 29To rana meylilitod o kararay na a mapasyasi jya. Maniring am, ‘Ikasi mo pa yaken an. Cyaha, ta paolin ko o nivood ko jimo a nizpi.’ 30Am ji na mya paronoronen na. Am ori o nyangayan na do pamemtengan a mangay do ipaoli na rana so nizpi ang. 31Macita da o vazay na no karwan da am marahet sira so aktokto. Ori o nyangay da do panirsirngen a kapanci da no vazay ang. 32Karahan am rarahen no panirsirngen o lamlamsoy na a mai. Maniring jya am, ‘Imo rana ya am ka tey marahet a lamlamsoy ko! No kapasyasi mo jyaken asyo am ko tongbowa o mo nivood jyaken a nizpi. 33Ikeykongo ka ya, yajyarilaw no kararay mo akman jyaken a yamarilaw nimo.’ 34Ori o nipeyoyaoya na no panirsirngen. Karahan am alyowen na do pamemtengan a mangay do miminan na rana so nizpi a nivood a paolin.” 35Maniring pa si Yeso am, “Si ji monganay do onowned nyo o to nyo peykaboboi so oyyan nyo no kakteh nyo am akman sang si Ama ta do to jinyo.”

Currently Selected:

Matay 18: snt

Highlight

Copy