Matay 17

Nimablis o keyteytawan ni Yeso

(Make 9:2-13; Locya 9:28-36)

1Ikanem na araw am palolwen ni Yeso si Pite a kani Yake a kani Yowani a meyketeh a mangay do makarang a tokon. 2No kanang am todablis o keyteytawan ni Yeso do tangain da. So nicyakma ney araw no moing na maniray. Akman sang o talili na. 3Makarahan am macita da no tatlo a ka macinanao jya si Moyse a kani Idiya a tao no kakwa pa, a macisirsiring ji Yeso. 4Maniring si Pite ji Yeso am, “Mo Panirsirngen, yata tey yapya do jya. No si apyahen mo am to ko na mamaring do jya so atlo a ka sarwap, asa jimo a asa ji Moyse a asa ji Idiya.”

5Ji na pa teyka ni Pite o ciring na am to ngyan so cinalab a ombengbeng sira a keyyan no ciring a maciralay do cinalab ang. Maniring am, “Iya rana am ney kaglaw ko Anak ko. So sarayan ko nya. Amizngan nyo sya.” 6Mamizing da o ciring no macinanao jya am to rana sira meyrorokma do teyrahem a manyahey. 7Karahan am mangay jira si Yeso a mapadnadna so nakem da. Maniring am, “Tanek kamo na. Ji kamo anyahey.” 8Citahen da am si Yeso rana o macita da.

9Omosok sira apo do tokon am maniring jira si Yeso am, “Do ji ko pa nimirwai a mavyay a Nipamnekan na ni Ama ta do to a tao am ji nyo pa meycicicyan o yanyo nimacita vazay an.”

10Karahan am pacicin da no macinanao jya si Yeso. Maniring sira am, “Ikongo da pancyan nya no yamangnanao no iwawalam na ni Ama ta do to o kapanmanma na mai ni Idiya.” 11Maniring si Yeso am, “Si Idiya rana am manmanma mai a mapeyyalalap so nakem no meykaoya tao. 12Am ko ipanci pa jinyo am yarana nimai si Idiya am da jyatenngi no tao. Am ori o to da naziboi nya no tao. So ikakman na sang no Nipamnekan na ni Ama ta do to a tao a peyraraheten da.” 13Ori rana o nipakateneng da rana jya no macinanao ji Yeso so pakacirngen na do nimanaktak a si Yowani.

Nivozwaw ni Yeso o komovot do kanakan a kalamsoyan ni Satan

(Make 9:14-29; Locya 9:37-43a)

14Makaranes sira do aro a tao am amyan so asa ka tao a nimai a mangay meylilitod do tangain na ni Yeso. 15Maniring am, “Mo Panirsirngen, ikarilaw mo pa o anak ko. Ta yamamezamezay. So na ipangasi a yamaleklektek do apoy a kado ranom. 16Nyangay ko na do macinanao jimo am ji da vonas jya.” 17Maniring si Yeso am, “Kamo tey yalikey pa so nakenakem ji Ama ta do to a tao sicyaikwaya do yanyo kapeyraraten. Akman rana so wanjin o kownownay ko a macikaop jinyo. Akman ko rana so wanjin a marilaw ninyo. Ayyan kamo o kanakan do jya.” 18Karahan am ioya na o kalamsoyan ni Satan a kapakowbot na rana. So nikapiya na rana no anak na.

19Karahan am pacicin da si Yeso no macinanao jya. Maniring sira am, “Ikongo namen ji makavozwawi so kalamsoyan ni Satan ang.” 20Maniring si Yeso am, “O nyo ikakman sang am yaji makanet pa o nakenakem nyo si Ama ta do to. To ko na macitangayan jinyo am tana akman kamo so alikey a vettow no nappa so kakdekdeng no nakem am tana to nyo nirsirnga o tokon a meylis do yanan na kangay na do kwang am meylis ori an. So ikabo no ji nyo a peyvazay a vazay. 21[To nyo peykakasa o onowned nyo a meynozi a ji mangakaday. Ta ori o ikavozwaw no akman so sang a kalamsoyan ni Satan.”]

Ipirwa na pazimanen ni Yeso o kawakwak na

(Make 9:30-32; Locya 9:43b-45)

22Malovot o macinanao ji Yeso do Cyadidi am maniring si Yeso jira am, “Itoro da o Nipamnekan na ni Ama ta do to a tao do macioya jya tao, 23a kawakwak da sya. Am ikatlo na araw am mirwa pa mavyay.” Mamizing da ori no macinanao jya am marahet sira so aktokto.

Tomoro so deyking do rako a panaralayan

24Makaranes si Yeso a kano macinanao jya do Cyapaynong am amyan so mangangap so deyking no rako a panaralayan a tao a mangay ji Pite. Maniring sira jya am, “Manngwa, tomoro so deyking do rako a panaralayan o Sinsi nyo an?” 25Maniring si Pite jira am, “Ta ji na noroi.” Somdep do vahay si Pite am panmahen na pacicin ni Yeso. Maniring jya am, “Mo Simong, sino o pangangapan no panirsirngen do karawan so deyking. Mangap do anak na? No mangap do karwan no tao. Manngo ka dang.” 26Maniring si Pite am, “Mangap do karwan no tao.” Maniring si Yeso jya am, “No ori o nakem mo am ji noroi saon o anak na am. 27Am taosya o kakma tey mapasobsobna. So to mo rana angai a mamasil. Si citahen mo o ngoso no ney manma na among mo am makacita ka so asa ka nizpi. Makanet rana ori a itoro ta deyking do rako a panaralayan.”

Currently Selected:

Matay 17: snt

Highlight

Copy