Matay 19

Nanao so mapakaro so katovong do vahay

(Matay 5:31-32; Make 10:1-12; Locya 16:18)

1Teyka mangononong si Yeso am karwan na do Cyadidi a kangay na do katovangan no Yotan a ayo a meypangay do Yotay. 2Aro o tao a omonot jya. Am ori o to na rana ngiwakwaki do meykeyngeyngen a tao do dang.

3O tatasa ka tao a macyagom do Vadisay a nimangay ji Yeso am naknakmen da o keyleylamdam da sya. Am ori o nipancyan da no, “Manngwa, apya do iwawalam ta o kapakaro ta so kahanghangan ta an?” 4Maniring si Yeso am, “Manngwa, ji nyo pa nivilangan o ciring do Seysyo? Ta maniring am, ‘No kavayo na pa mangamaog so karawan ni Ama ta do to am nimangamaog so mahakay a kano mavakes.’#19:4 Tswang Se Ci 1:27. 5Maniring pa am, ‘Ori o karwan da na do inyapwan da no mapapapen a tao a matarek so vahay. So icyakma dey yasa ka tao rana meyyaven do vahay.’#19:5 Tswang Se Ci 2:24. 6So icyakma dey yasa rana so kataotao. Am ori o jya to meysyai no meyyaven do vahay. Ta nimeysinmo rana sira do tangain ni Ama ta do to.”

7Maniring o tao a macyagom do Vadisay jya am, “No ori am to na mancii nya ni Moyse do ineynapo ta so sang a iwawalam a manci no kapya no kapeyvatvatek so vakong a itoro do pakarwen a mavakes.” 8Maniring si Yeso am, “Nipya ni Moyse sira o ineynapo nyo a yamapakaro so katovong da do vahay. Am o na nipyan sira am sira akman jinyo a tey rahet, jya pasovoy a tao. Ta no ka ori pa so kapangamaog ni Ama ta do to so karawan am jya nimakman so sang. 9To ko na macitangayan jinyo am no ji da panadnada inyo no kataned nyo do vahay a mavakes am ori o ikakman nyo so sang. Am no abo a kato nyo pakarwan so kataned nyo do vahay a kangay nyo pa mapasakay so asa ka tao am raraten nyo rana ori.”

10Maniring o macinanao jya am, “No yakman sang o yahahapan sya no meyyaven do vahay am apyapya rana o kaji mapasakayan.” 11Maniring si Yeso am, “O akman rana sang a nanao am beken a todamimin o tao a makahap sya. Ta o nioyatan ni Ama ta do to a tao o makahap so sang. 12Ta aro peypeypangayan no kaji mapasakayan no tao. Ta tatasa ka tao o nimeycicinda no kalyalikey da o kasalit na jira no kapasakasakay da. Am o tatasa ka tao am amyan so peypeypangayan no kaji da mapasakasakayan. O tatasa ka tao am to da rana mamneki o kaji da mapasakasakayan, do kahap da so vazay ni Ama ta do to. So ipeykataretarek no tao a omahap so nanao eya.”

Ipanlanlag na o kanakan ni Yeso

(Make 10:13-16; Locya 18:15-17)

13Amyan so tao a mangay no kanakan do tangain ni Yeso a komakzeb so kapanlanlag na nira ni Yeso a meynozi nira. Macita da sira no macinanao jya am azahen da sira ioya. 14Maniring si Yeso jira am, “Pancyan sira o kanakan a mai jyaken. Ji nyo ngaza sira. Ta o italamozong na ni Ama ta do to am akman sira so sang.” 15Karahan am ipanlanlag na sira ni Yeso a kakaro na rana do dang.

Aro so peymeymasaodan a mowva tao

(Make 10:17-31; Locya 18:18-30)

16Ipisa am amyan so tao a mangay ji Yeso. Maniring am, “Mo Mangnanao, makongo ko so wanjin a meyvazay so apya vazay a kapakahap ko so to meyyonong a ikavyay no pahad ko.” 17Maniring si Yeso am, “Ikongo mo panahsan nya jyaken so apya vazay. Yasa saon o yapya so vazay am. Am no si kakzeben mo o kapakahap mo so to meyyonong a ikavyay no pahad mo am ahapen mo o iwawalam ni Ama ta do to.” 18Maniring o tao ori am, “Ikongo do iwawalam ni Ama ta do to ang.” Maniring si Yeso am, “Ji mangap so tao. Ji pasagpyana o aktokto. Ji manakaw. Ji mangamaog so malas a ciring. 19Ikaglaw nyo a ikanig o inyapwan nyo.#19:19 Soayci Ci 20:12-16; Sen Ming Ci 5:16-20. Akman so aryarilaw so kataotao o karilawan no icyatatao.”#19:19 Diwey Ci 19:18. 20Maniring o mowva tao am, “Ko na nimamimin o aro a iwawalam na ni Ama ta do to a yanipeyvazay. Ikongo pa o peyvazain koo.” 21Maniring si Yeso am, “No si kakzeben mo o kapyapya na pa no ahahapan mo sya am to mo na mimina ipanazang o kangangay mo a ipanidong so makasi a tao. Ta ori iyan no kangangay mo do teyngato, a kapacilolo mo rana jyaken.” 22Mamizing na ori no mowva tao am to na ligaligana o oo na, do kapakanakem na so karo no peymeymasaodan na.

23Karahan am maniring si Yeso do macinanao jya am, “To ko na macitangayan jinyo am tey masalit o aro so peymeymasaodan a tao a macikaop do italamozong ni Ama ta do to. 24Ko pa ipanci jinyo am mowwamek pa o meykavokovokoz so likod a baka a lomyos do lala no rayom a kano aro so peymeymasaodan a macikaop do italamozong na ni Ama ta do to.” 25Mamizing da o ciring na no macinanao jya am mina to ogto sira. Maniring rana sira ji Yeso am, “No akman sang am sino o patazadangen na ni Ama ta do to do teyngato.” 26Maniring jira si Yeso a tomita sira am, “O masalit do tao am mowwamek ji Ama ta do to. Ta abo ji na peyvazay ni Ama ta do to.”

27Makarahan am maniring rana si Pite am, “Cita pala yamen a yarana nimamimin a yanikomaro do peymeymasaodan namen a yamacilolo jimo. Ikongo kakownongan na no akman sang.” 28Maniring si Yeso jira am, “To ko na macitangayan jinyo am no makwa am no amlisna o Nipamnekan na ni Ama ta do to a tao do lilisnan na do teyngato am inyo rana yanimacilolo jyaken am amlisna kamo do adwa so icyarwa lilisnan no panirsirngen a tomalamozong no sivosivovoong da no rarwa so ikakarwan a ananak ni Yakebo. 29O mahap so vazay ko a to rana ngaro do kavavahay da kano kakakteh da kano inyapwan da kano minapodpod jya kano nihakawan da am arwaro pa o makadpeh jira a kapakahap da so to meyyonong a ikavyay no pahad da. 30Am o macipanmanma sicyaikwaya am masipanownowji rana no makwa do teyngato. Sira rana o nimasipanownowji am masipanmanma rana sira do teyngato.

Currently Selected:

Matay 19: snt

Highlight

Copy