Mateo 9

Jesusqa suchu runata puririchin

(Mc 2.1-12; Lc 5.17-26)

1Chaymanta Jesusqa boteman yaykuspa, qocha chimpaman kutirerqa, llajtanmantaj chayarqa. 2Chaymantaj uj suchu runata apamorqanku, phullupi wantumuspa. Jesustaj paypi atinikusqankuta rikuspa, onqosqata nerqa: Sonqochakuy, wawáy. Juchaykeqa pampachasqaña, nispa.

3Chaywanpis, Diospa kamachisqanmanta wakin yachachejkuna sonqonkupi nerqanku: Kay runaqa ajinata parlaspa, Diospa contranta rimashan, nispa.

4Jesustajrí imatachus yuyashasqankuta yachaspa, nerqa: Imaraykutaj sonqoykichejpi mana allin kajta yuyashankichejri? 5Imataj aswan atikojlla kanman suchu runata ninaypaj: Juchayki pampachasqaña, nispa ninaychu, chayrí: Sayariy, phulluykita oqharispa ripuy, nispa ninaychu? 6Kunan kayta nisaj yachanaykichejpaj Runaj Churenqa atiyniyoj kasqanta kay pachapi juchata pampachananpaj, nispa.

Chantá suchu runatañataj nerqa: Sayariy, phulluykita oqharispataj wasiykiman ripuy, nispa. 7Chay suchutaj sayariytawan, wasinman riporqa. 8Chaypi kajkunataj chayta rikuspa, manchachikorqanku, Diostataj jatuncharqanku chay jina atiyta runakunaman qosqanmanta.

Jesusqa Mateota wajyan

(Mc 2.13-17; Lc 5.27-32)

9Chaymanta rishaspa, Jesusqa Mateo sutiyoj runata rikorqa impuestota cobrananpi tiyashajta, nerqataj: Yachachisqay kanaykipaj noqawan jamuy, nispa. Jinamanta Mateoqa sayariytawan, Jesuswan rerqa.

10Aswan qhepaman Jesuswan, yachachisqankunawan ima Mateoj wasinpi mikhusharqanku, chaypitaj impuestota cobrajkunamanta, juchasapapaj qhawasqa kajkunamanta ima ashkha runakuna paykunawan khuska mikhushallarqankutaj. 11Fariseokunatajrí chayta rikuspa, Jesuspa yachachisqankunata taporqanku: Imaraykutaj yachachejniykichej impuesto cobrajkunawan, juchasapakunawan ima mikhushanri? nispa.

12Jesustaj chayta uyarispa, nerqa: Qhalilla kajkunaqa jampikamayojta mana wajyanankuchu tiyan, manachayqa onqosqa kajkunalla. 13Qankunarí rispa, yachaqamuychej imatachus Diospa Qhelqachisqanpi pay niyta munasqanta: Noqaqa ujkunata khuyanaykichejta munani, mana uywa wañuchisqa q'olachinatachu,#Os 6.6. nispa. Noqarí mana cheqan runa kasqankuta yuyakojkunatachu wajyaj jamuni, manachayqa juchasapa kasqankuta reparakojkunata, nispa.

Ayunomanta tapukunku

(Mc 2.18-22; Lc 5.33-39)

14Uj kuti Bautizaj Juanpa yachachisqankuna Jesusman qayllaykuspa, nerqanku: Noqayku, fariseokuna ima sapa kuti ayunayku. Yachachisqaykikunarí imaraykutaj mana ayunankuchuri? nispa.

15Jesustaj uj rijch'anachinawan paykunaman kuticherqa: Qankuna yuyankichejchu casamientoman wajyarisqa kajkuna llakisqa kaspa ayunanankuta, casarakoj runa paykunawan kashajtin? Manapuni icharí? Uj p'unchay chayamonqa, chaypachataj casarakoj paykunamanta qhechusqa kanqa. Chaypachamá ayunanqanku, nispa.

16Jesús kay rijch'anachinatawan nillarqataj: Mana pipis mawk'a p'achamanqa mosoj telawan t'irinmanchu, imaraykuchus mosoj telaqa q'entispa, mawk'ata astawan jatunta llik'irparinman. 17Manallataj pipis mosoj vinota mawk'a qara botaman jich'anmanchu. Mosoj vinoqa poqoykuspa, chay mawk'a qarata phatachinman, jinapitaj vinoqa jich'akunman, qara botapis usunman. Chayrayku, mosoj vinotaqa mosoj qara botamanpuni jich'ana, ajinamanta ni mayqen usunanpaj, nispa.

Jesusqa Jairoj ususinta kawsarichin, yawar apayniyoj warmitapis qhaliyachin

(Mc 5.21-43; Lc 8.40-56)

18Jesús chay imakunata parlashajtinraj, judiokunamanta uj kamachej runa payman qayllaykorqa, ñawpaqenpi qonqorikuspataj, nerqa: Ususiy kunallanraj wañorqapun. Ama jina kaspa jamuy ari, makiykita payman churajtiyki, pay kawsarenqa, nispa.

19Chantá Jesús sayarispa, paywan khuska rerqa, yachachisqankunapis paykunawan khuska rillarqankutaj. 20Chaypachallataj runakuna ukhupi uj warmi karqa, pichus chunka iskayniyoj watataña yawar apaywan onqosqa karqa. Paytaj Jesuspa qhepanmanta qayllaykuspa, p'achanpa kantunta llankhaykorqa. 21Chayta ruwarqa, imaraykuchus sonqon ukhupi nisharqa: Sichus Jesuspa p'achallantapis llankhaykuyman chayqa, qhaliyapuyman, nispa. 22Jesustaj kutirikuytawan, payta qhawarispa, nerqa: Sonqochakuy wawáy, noqapi atinikusqaykirayku qhaliyasqa kanki, nispa. Chaymantapachataj warmeqa qhaliyakaporqa.

23Chantá Jesusqa judiokunaj kamachejpa wasinman chayaspa, aya oqharinankupaj qena tocajkunata rikorqa, jinallataj ashkha runata waqaspa qhaparishajta ima. 24Jesustaj kay jinata paykunata nerqa: Jawaman llojsiychej. Ch'iriskaqa mana wañusqachu, manachayqa puñushallan, nispa. Runakunatajrí Jesusmanta asikorqanku. 25Chantá Jesusqa runakunata jawaman llojsichispa, wasi ukhuman yaykorqa. Ch'iriskata makinmanta aysarispataj, sayaricherqa. 26Jinataj chaypacha imatachus Jesús ruwasqan tukuynejpi yachakorqa.

Jesús iskay ñawsakunata qhawarichin

27Jesús chaymanta ripushajtin, iskay ñawsakuna qhepanta rispa, qhaparerqanku: Davidpa Churin, khuyarikuwayku ari, nispa. 28Jesús uj wasiman yaykojtintaj, chay ñawsakunaqa payman qayllaykorqanku. Jesustaj paykunata taporqa: Qankunata qhawarichinaypaj atiyniyoj kasqayta yuyankichejchu? nispa. Paykunataj kuticherqanku: Arí, Wiraqochi, nispa.

29Chantá Jesús ñawinkuta llankhaykuspa, nerqa: Noqapi atinikusqaykichejman jina ruwasqa kachun, nispa.

30Chay kikinpachataj chay ñawsakunaqa qhawarerqankupacha. Chantá, Jesús paykunaman mayta kamacherqa: Amapuni ni piman kayta willankichejchu, nispa. 31Paykunatajrí llojsiytawankama, tukuy chay cheqanejpi Jesús imatachus ruwasqanmanta willararqanku.

Jesusqa opata parlarichin

32Chaymanta llojsejtinkukama, Jesusman pusamorqanku supayniyoj uj opa runata. 33Chantá, Jesús chay runamanta supayta qharqojtin, opaqa parlayta qallarerqa.#Mt 12.22; Lc 11.14. Runakunataj t'ukuspa, nerqanku: Kay jinataqa mana jayk'ajpis Israelpi rikorqanchejchu, nispa.

34Fariseokunarí nerqanku: Kay runaqa Kuraj Supaypa atiyninwan supaykunata qharqon,#Mt 10.25; 12.24; Mc 3.22; Lc 11.15. nispa.

Chajra poqoy oqharinamanta rijch'anachina

35Ajinata Jesús muyuynin llajtakunaman, ranchokunaman ima rispa, tantakuna wasikunapi yachacherqa. Chaypi Diospa kamachiyninmanta sumaj willayta willarqa, runakunatataj tukuy onqoykunamanta, nanaykunamantawan qhaliyacherqa. 36Ashkha runata rikuspataj, paykunamanta khuyakorqa, imaraykuchus paykuna saqerpayasqa, ch'eqerasqataj karqanku, mana michejniyoj ovejakuna jina.#Nm 27.16-17; Jer 50.6-7; Ez 34.5; Zac 10.2; Mc 6.34. 37Chaymantataj Jesús yachachisqankunata nerqa: Sut'ita niykichej poqoyta oqharinaqa ashkhamin, oqharejkunatajrí pisilla kanku. 38Chayrayku chajrayojmanta mañakuychej astawan ashkha oqharejkunata kachamunanpaj, nispa.#Lc 10.2; Jn 4.35.

Currently Selected:

Mateo 9: DQPC

Highlight

Copy