Mateo 10

Jesús chunka iskayniyoj kuraj kachankunata ajllan

(Mc 3.13-19; Lc 6.12-16)

1Chantá Jesús chunka iskayniyoj yachachisqankunata wajyaspa, paykunaman atiyta qorqa supaykunata runamanta qharqonankupaj, jinataj imaymana onqoykunamanta, nanaykunamantawan ima runakunata qhaliyachinankupaj.

2Chay chunka iskayniyoj kuraj kachankunaj sutinku kaykuna kanku: Ñawpaj kaj Simón, Pedro nisqa, wawqen Andreswan, Zebedeoj churinkuna Santiagowan, Juanwan ima. 3Kallarqankutaj Felipe, Bartolomé, Tomás, impuestota cobraj Mateo, Alfeoj churin Santiago, Tadeo, 4cananeo nisqa Simón, Judas Iscariote ima, pichus Jesusta jap'ichinan karqa, chay.

Jesusqa kuraj kachankunata kachan

(Mc 6.7-13; Lc 9.1-6)

5Jesús chay chunka iskayniyoj kuraj kachankunata kay jinata kamachispa kacharqa: Mana judío kajkunaman ama rinkichejchu, nitaj Samaria jap'iyman yaykunkichejchu. 6Manachayqa Israel ayllullaman riychej, pikunachus chinkasqa oveja jina kanku, chaykunallaman.#Jer 50.6; Mt 15.24. 7Rispataj, willaramuychej: Diospa janaj pacha kamachiynenqa qayllapiña kashan, nispa. 8Chantá onqosqakunata qhaliyachiychej, wañusqakunatataj kawsarichiychej. Jinallataj llejti onqoyniyojkunata qhaliyachispa llimphuchaychej, supaykunatapis runakunamanta qharqoychej. Qankunaqa kay atiyta qhasilla jap'erqankichej. Chayrayku chay ruwasqaykichejmantaqa ama pagachikuychejchu.

9Wayaqaykichejpi ama qolqeta, nitaj qorita, nillataj cobremanta phatatapis apakuychejchu. 10Ñanpi mikhunaykichejpaj amallataj qoqawi wayaqata apaychejchu, nitaj iskay p'achakunata, nitaj waj juk'utakunatapis, nillataj varatapis. Ama imatapis apakuychejchu, imaraykuchus pichus llank'ajqa ruwasqanmanta mikhunanpuni tiyan.#Lc 10.7; 1 Co 9.14; 1 Ti 5.18.

11Qankuna may llajtamanpis, chayrí ranchomanpis chayaspaqa, pichus k'acha runa kajta mask'aychej, chay wasinpitaj qhepakuychej, waj llajtaman rinaykichejkama. 12Wasiman yaykuspataj, chaypi tiyakojkunata Diospa sutinpi napaykuychej. 13Chay wasipi tiyakojkuna napaykusqaykichejta jap'ikunapaj jinachus kankuman chayqa, Dios paykunata saminchanqa. Mana chaypaj jina kajtinkurí, Dios paykunata mana saminchanqachu. 14Sichus pillapis wasinkuman mana wajyarikusunkichej, nitaj parlasqaykichejtapis uyarisunkichej chayqa, chay wasimanta, chayrí chay llajtamanta llojsiychej, chakiykichejmanta jallp'ata thalarakuspa, ajinamanta mana allin ruwasqankuta yachanankupaj. 15Noqataj sut'ita niykichej: Juicio p'unchaypeqa chay llajtayojkunapaj aswan ñak'ariy kanqa, Sodomapi, Gomorrapi tiyakojkunamanta nisqaqa, astawanraj, nispa.

Jamoj p'unchaykunapi ñak'ariykuna

16Kunanqa, noqa kachashaykichej ovejatapis atojkunaj chawpinkuman kachashayman jina. Qankunarí katarikuna jina sumaj yuyayniyoj kaychej, urpikuna jinataj llamp'u sonqoyoj. 17Allinta qhawakuychej runakunamanta, imaraykuchus juntaman qankunata pusaspa, tantakuna wasikunapi jasut'ichisonqachej. 18Noqaraykutaj llajtata kamachejkunaman, kuraj kamachejkunaman ima pusasonqachej. Chantá, ñawpaqenkupi paykunaman, mana judío kajkunamanpis noqamanta testigo jina willankichej. 19Kamachejkunaman apachisojtiykichej, ama phutikunkichejchu imaynatachus parlanaykichejmanta, chayrí imatachus ninaykichejmanta. Chaypacha Dios imatachus parlanaykichejta yuyaychasonqachej. 20Mana qankunallachu parlankichej, astawanqa Tata Diosniykichejpa Espíritun qankunanejta parlanqa.#Mc 13.9-11; Lc 12.11-12; 21.12-15; Hch 4.1-8.

21Chaypachaqa uj ayllupi runaqa wawqenta wañuchinankupaj jap'ichenqa, tatapis wawanta jap'ichillanqataj. Wawakunapis tatankoj, mamankoj contranta oqharikuspa, paykunata kamachejkunawan wañuchichenqanku. 22Noqarayku tukuy runakuna chejnisonqachej. Chaywanpis qankunamanta pichus tukukuykama sinch'ita sayaj, chay runata Dios qhespichenqa.#Mt 24.9,13; Mc 13.13; Lc 21.17. 23Sichus mayqen llajtapipis chejnispa qhatiykachasunkichej chayqa, waj llajtamanñataj ayqeychej. Kayta sut'ita niykichej: Manaraj tukuy israelitakunaj llajtankukunapi willayta tukushajtiykichej, ñapis Runaj Churenqa kutimonqaña, nispa.

24Yachakojqa yachachejninmanta mana aswan kurajchu, nitaj wata runapis patronninmanta aswanchu.#Lc 6.40; Jn 13.16; 15.20. 25Yachakojpajqa walej yachachejnin jina kanan, wata runapajpis patronnin jina kanan. Jinallataj, noqatachus Beelzebú sutiwan sutichawanku chayqa, imatarajchus qankunata sutichasonqachej, nispa. Ajinata Jesús kachankunata nerqa.

Pitataj manchachikusunri?

(Lc 12.2-7)

26Jesús nillarqataj: Chayrayku, ama runakunata manchachikuychejchu. Tukuy pakasqa kajpis, jinallataj mana sut'inchasqa kajpis sut'inchakonqapuni. 27Imatachus laqhapi nisqaykichej, chaytaqa qankuna sut'i p'unchaypi niychej. Pakaypi uyarisqaykichejtapis wasi patamanta qhaparispa willaychej.

28Ama qankunata wañuchejkunata manchachikuychejchu, imaraykuchus paykuna almaykichejtaqa mana imanayta atinkuchu. Aswanpis, Diostamin manchachikuychej, imaraykuchus pay wañuchisuspa, lawrashaj nina qochaman wijch'uykusuyta atin. 29Manachu runakuna iskay p'isqetutapis phisullapi vendenku? Chaywanpis, Tata Diosniykichej mana munajtenqa, ni uj p'isqetullapis pampaman urmanchu. 30Jinallataj Diospis qankunamanta mana qonqanchu. Umaykichejpi chujchaykichej mashkhachus kasqanta yachan. 31Chayrayku ama manchachikuychejchu, imaraykuchus qankunaqa aswan valorniyoj kankichej ashkha p'isqokunamanta nisqaqa.

Jesucristojta kasqanmanta rimarej

(Lc 12.8-9)

32Sichus pipis runakunaj ñawpaqenpi yachachisqay kasqanta rimarenqa chayqa, noqapis janaj pachapi kashaj Tataypa ñawpaqenpi nisaj: Payqa noqajtamin, nispa. 33Chantá, sichus pipis runakunaj ñawpaqenpi mana rejsiwaj tukonqa chayqa, noqapis payta mana rejsisajchu janaj pachapi kashaj Tataypa ñawpaqenpi.#Mc 8.38; Lc 9.26; 2 Ti 2.12.

Jesusrayku t'aqanaku

(Lc 12.49-53; 14.25-27)

34Ama yuyaychejchu noqa kay pachaman allin kawsayta apamoj jamusqayta. Aswanpis mana allin kawsayta apamuni, runakunatataj t'aqanachej jamuni. 35Noqaqa jamuni uj runaj churin tatanpa contranpi kananpaj, jinallataj uj ususi mamanpa contranpi kananpaj, ñojch'apis suegranpa contranpi.#Miq 7.6. 36Sapa ujpata ayllun ukhullamantataj awqan rikhurenqa.

37Pichus tatanta, chayrí mamanta noqamanta astawan munakojqa mana noqajta kananpaj jinachu. Ajinallatataj, sichus pipis churinta, chayrí ususinta noqamanta astawan munakun chayqa, nillataj payqa noqajta kananpaj jinachu. 38Jinallataj manachus pipis cruzninta oqharispa qhepayta jamunman chayqa, payqa mana noqajta kananpaj jinachu. 39Pichus noqata kasunawanmanta nisqa kawsaynin aswan kasqanta qhawanman chayqa, payqa mana wiñay kawsayman yaykonqachu. Chaywanpis pichus noqarayku kawsayninta mana may kasqanta qhawanchu, chay runa wiñay kawsayman yaykonqa.#Mt 16.24-25; Mc 8.34-35; Lc 9.23-24; 17.33; Jn 12.24-25.

T'inkakunamanta

(Mc 9.41)

40Sichus pipis qankunata wajyarikusunkichej chayqa, noqata wajyarikushawan. Pichus noqata wajyarikuwajtaj Kachamuwajniyta wajyarikushan.#Mc 9.37; Lc 9.48; 10.16; Jn 13.20; 14.9. 41Sichus pipis Diosmanta sut'inchajta wajyarikun Diosmanta sut'inchaj kasqanrayku chayqa, payqa Diosmanta sut'inchaj jinallataj t'inkata jap'enqa. Sichus pipis cheqan runata wajyarikun cheqan runa kasqanrayku chayqa, paypis cheqan runa jinallataj t'inkata jap'enqa. 42Sichus pipis yachachisqaykunamanta pisipaj qhawasqa kajman uj vaso yakullatapis jaywarin yachachisqay kasqanrayku chayqa, kayta sut'itapuni niykichej: Chay runaqa t'inkata jap'enqapuni, nispa.

Currently Selected:

Mateo 10: DQPC

Highlight

Copy