Mateo 24

Templo thuñisqa kanqa

(Mc 13.1-2; Lc 21.5-6)

1Jesús Temploj pationmanta llojsishajtin, yachachisqankuna qayllaykuspa, Temploj muyuyninpi wasikuna imaynachus ruwasqa kasqankuta rikucherqanku. 2Jesustajrí paykunata nerqa: Kay tukuyta rikunkichejchu? Kayta sut'ita niykichej: Kaypeqa mana uj rumillapis rumi patapi qhepakonqachu, manachayqa tukuynin thuñisqa kanqa, nispa.

Qhepanejman ñak'ariykuna kanqa

(Mc 13.3-23; Lc 21.7-24; 17.22-24)

3Olivos orqopi Jesús kashaspa, pay tiyaykukorqa, yachachisqankuna qayllaykuspataj, sapallanpi taporqanku: Niwayku ari, mayk'ajtaj Templo thuñisqa kanqa? Ima señaltaj kanqa yachanaykupaj mayk'ajchus kutimunaykita, chantá mayk'ajchus kay pacha tukukunanta ima? nispa.

4Chantá Jesús paykunaman kuticherqa: Allinta qhawakuychej, pajtataj pipis q'otiyasunkichejman. 5Chayta niykichej, imaraykuchus sutiypi ashkha runakuna jamuspa, nenqanku: Noqaqa Diospa kachamusqan Cristo kani, nispa. Ajinamantataj ashkha runata pantachenqanku.#1 Jn 2.18. 6Qankunaqa wañuchinakumanta, maqanaku kananmanta ima uyarispa, ama mancharikuychejchu. Chay tukuy ima kananpuni tiyan. Chaywanpis manaraj kay pachaj tukukuyninchu kanqa. 7Uj suyoqa waj suyoj contranta oqharikonqa, uj kamachejtaj waj kamachejpa contranta. Jinallataj tukuynejpi jallp'a ikhakuykuna kanqa, yarqhay ima.#Is 19.2; Ap 6.3-8,12-17. 8Chaywanpis chay tukoyqa paqarichikoj warmej nanayninpa qallariynin jinalla kanqa.

9Chantá runakuna qankunata jap'ichispa, ñak'arichisonqachej, wakinniykichejtataj wañuchisonqachej. Ajinata tukuy runaj chejnisqan kankichej noqaj sutiyrayku.#Mt 10.17-18,22; Jn 16.2. 10Chaypacha yachachisqaykunamanta ashkha qhepaman kutiriponqanku, purajmantataj ch'atanakonqanku, chejninakonqanku ima. 11Ashkha llulla sut'inchajkuna rikhurimuspa, may chhika runata pantachenqanku. 12Jinallataj millayta ruwana mayta ashkhayajtin, runakunaqa manaña wajkunata munakonqankuchu. 13Chaywanpis qankunamanta pichus tukukuykama sinch'ita sayaj, chay runatamá Dios qhespichenqa.#Mt 10.22; Ap 2.10,26. 14Jinallataj Diospa janaj pacha kamachiyninmanta sumaj willayqa tukuynejpi willasqa kanqa, tukuy runakuna yachanankupaj. Chaymantaraj kay pachaj tukukuynin kanqa.#Mt 28.19; Ro 1.5,8; 10.18; Col 1.23; 1 Ts 1.8.

15Pichus kayta ñawirejqa sut'ita yachachun: Qankuna rikunkichej chay chejnina millay millachikunata Diospa Templonpi sayashajta, mayqenmantachus Diosmanta sut'inchaj Daniel parlarqa, chayta. 16Chaypacha Judeapi kashajkuna orqokunaman ayqechunku. 17Chay p'unchaypi pipis wasi alto patapi kashaspaqa, ama urayk'amuchunchu wasinmanta imatapis orqhonanpaj. 18Chajrapi kajpis nillataj wasinman kutirimuchunchu p'achanta apakunanpaj.#Lc 17.31. 19Ay, chay p'unchaypi wijsayoj warmikunamanta, ñuñoj wawayoj warmikunamantapis. 20Diosmanta mañakuychej ari, chay ayqenaykichej ama chiri tiempopi kananpaj, nitaj samarina p'unchaypipis. 21Chay jina llakeyqa mana jayk'ajpis karqachu, Dios kay pachata ruwasqanmantapacha kunankama, nillataj qhepamanpis kanqachu.#Dn 12.1; Ap 7.14. 22Manachus Dios chay p'unchaykunata pisiyachinman chayqa, mana pipis qhespichisqachu kanman. Aswanpis payqa ajllakusqankunata munakusqanrayku chay p'unchaykunata pisiyachenqa.

23Chaypachachus pipis nisunkichejman: Qhawaychej, kaypi Diospa kachamusqan Cristo kashan, nispa, chayrí: Jaqaypi Cristo kashan, nispa chayqa, amapuni nisqankuta jap'ikunkichejchu. 24Ajinamanta llullakuspa: Cristo kani, nispa nejkuna rikhurimonqanku, mana cheqanta sunt'inchajkuna ima. Paykunataj runaj mana jayk'aj rikusqan t'ukunakunata ruwaspa, runakunata pantachenqanku. Atispaqa, Diospa ajllakusqankunatapis pantachinkuman. 25Kay nisqayta allinta uyariwajchej. Kay tukuyta ñawpajmantaña willashaykichej.

26Chayrayku sichus pipis nisunkichejman: Qhawaychej, Cristo ch'innejpi kashan, nispa chayqa, amapuni rinkichejchu. Chayrí sichus nisunkichejman: Qhawaychej, wasi ukhupi pakasqa kashan, nispa chayqa, amallataj nisqanta jap'ikunkichejchu. 27Manachayqa imaynatachus lliuj lliujqa inti llojsimuynejmanta inti yaykuynejkama lliphipirispa k'ancharin, ajinallataj kanqa Runaj Churinpa jamunan p'unchay. 28Maypichá aya tiyan, chayman suwintukuna tantakonqanku, nispa. Ajinata Jesús yachacherqa.

Runaj Churinpa kutimuynin

(Mc 13.24-37; Lc 17.25-37; 21.25-33)

29Jesús yachachillarqataj: Ñak'ariy p'unchaykunaj qhepanta, inti laqhayaykaponqa.#Is 13.10; 24.23; Ez 32.7; Jl 2.10,31; 3.15-16; Am 5.20; 8.9; Sof 1.15. Killapis manaña k'anchanqachu, ch'askakunapis urmaranqanku.#Is 34.4. Jinallataj janaj pacha atiykunapis kharkatitenqanku. 30Chaypacha Runaj Churinpa jamuyninmanta señal janajpi rikhurimonqa. Jinapitaj tukuy kay pachapi ayllukuna mayta manchachikuspa, waqanqanku. Chantá paykuna Runaj Churinta janaj pachamanta phuyu patapi jamushajta rikuwanqanku,#Dn 7.13. jatun atiywan, jatun kayniypa lliphipiyninwan ima. 31Noqataj angelniykunata kachamusaj, trompetata sinch'ita waqachispa.#Ex 19.16; Dt 30.4; Is 27.13; Zac 9.14. Paykunataj tukuy ajllasqaykunata tantanqanku kay pachaj ujnin k'uchunmantapacha, janajpa ujnin kantunkama.#Is 27.13; Mt 13.41-42,49-50; 1 Co 15.52; 1 Ts 4.16.

32Kunan kay higo sach'a rijch'anachinamanta yachaychej. Maypachachus higo sach'aj k'allmankuna wawayarin, laqhenkunataj ijirimun, chaypacha, qankuna q'oñi tiempo qayllapiña kasqanta yachankichej. 33Ajinallatataj qankunapis kay tukuy ima rikhurimojtin, Runaj Churin ñapis punkupiña kasqanta yachankichej. 34Kayta sut'ita niykichej: Manaraj mita masiykichej tukukushajtinku, kay tukuy ima junt'akunan tiyan. 35Janajpis, kay pachapis tukukaponqanku. Chaywanpis nisqayqa mana jayk'ajpis pasanqachu, manachayqa junt'akonqapuni.

36Chay p'unchay, Runaj Churinpa jamunan p'unchay, chayrí chay phani mayk'ajchus kananmantaqa mana pipis yachanchu, ni janaj pachapi angelkunapis, nitaj Churipis. Tata Dioslla chaymantaqa yachan.

37Imaynachus Noéj tiemponpi karqa, ajinallataj kanqa Runaj Churinpa kutimunan p'unchaypipis. 38Chaypacha, manaraj jatun para chayamushajtin, runakunaqa mikhusharqanku, ujyasharqanku, casarakusharqanku ima, Noé arcaman yaykunan p'unchaykama. 39Paykuna mana imatapis reparakorqankuchu jatun para jamunankama, tukuyninkutaj chinkachisqa karqanku. Ajinallataj kanqa Runaj Churin rikhurimunan, chay p'unchaypi.

40Chaypachaqa iskay runakuna chajrapi kashanqanku. Ujnin oqharisqa kanqa, ujnintaj saqerparisqa. 41Jinallataj iskay warmikuna molinopi jak'ushanqanku. Ujnin oqharisqa kanqa, ujnintaj saqerparisqa.

42Chayrayku, qankunapis wakichisqa suyaychej, imaraykuchus mana yachankichejchu ima p'unchaychus Tukuyta Kamachejniykichej kutimunanta. 43Kaytawan yachaychej: Sichus wasiyoj ima phanitachus suwa jamunanta yachanman chayqa, mana puñuspa suyaykunman, manataj suwachikunmanchu. 44Chayrayku qankunapis wakichisqallataj kaychej, imaraykuchus Runaj Churenqa mana yuyasqaykichej p'unchaypi kutimonqa.#Lc 12.39-40; 1 Ts 5.2; 2 P 3.10; Ap 3.3; 16.15.

Iskay kamachikuna

(Lc 12.41-48)

45Pitaj allin yuyayniyoj mayordomo jina kanman? Paytaqa patronnin churan maychus tiemponpi kamachin masinkunaman mikhuchinanpaj. 46Jaqay mayordomo kusikuyniyojmin kanqa, sichus patronnin ajinata ruwashajta taripanqa chayqa. 47Kayta sut'ita niykichej: Chay jina mayordomotaqa patronnin tukuy kapuyninta qhawananpaj churanqa.

48Chaywanpis mayordomo sajra sonqoyoj kaspa, ichapis ninman: Patronneyqa manaraj chayamonqachu, nispa. 49Chantá wakin kamachi masinkunata maqayta qallarinman, jinallatataj warmi kamachikunatapis. Chantá mikhunman, ujyanmantaj machanankama. 50Jinallapi patronnin kutimonqa mayordomoj mana suyasqan p'unchaypi, mana yachasqan phanipitaj. 51Chayamuspataj, patronqa chay mayordomota sinch'ita jasut'iytawan, puraj uyakunatawan khuska wijch'onqa, maypichus waqay, kiru k'arukuytaj kanqa, chayman, nispa. Ajinata Jesús yachacherqa.

Currently Selected:

Mateo 24: DQPC

Highlight

Copy