Mateo 25

Chunka sipaskunamanta rijch'anachina

1Jesús nillarqataj: Diospa janaj pacha kamachiynenqa casarakupi kaj chunka sipaskunaman rijch'akun. Paykunaqa lamparankuta oqharikuspa, casarakoj runata taripaj risqanku. 2Phishqa sipaskuna mana yuyayniyoj kasqanku, phishqataj yuyayniyoj. 3Chay mana yuyayniyoj sipaskunaqa lamparankuta aceiteyojta apaspapis, mana astawan aceiteta apakusqankuchu. 4Yuyayniyoj sipaskunarí, lamparankupi, yuritunkupi ima aceiteta apakusqanku. 5Jinapi casarakoj mana usqhayta chayamojtin, tukuyninku puñuywan atipachikuspa, puñurparisqanku.

6Chawpi tutata jina uj qhapariy uyarikusqa: Casarakoj chayamushanña, taripamuychej ari, nispa. 7Tukuynin sipaskunataj jatariytawan, lamparankuta wakichisqanku. 8Jinapi mana yuyayniyoj sipaskunaqa yuyayniyojkunata nisqanku: Uj chhika aceiteta qoriwayku ari, imaraykuchus lamparayku wañupushanña, nispa. 9Yuyayniyojkunatajrí kutichisqanku: Mana qoriykumanchu, imaraykuchus noqaykupaj, qankunapajpis pisiyanman. Aswanpis qhatojkunamanta aceiteta rantikamuychej ari, nispa.

10Chaywanpis chay phishqa sipaskuna aceiteta rantej rinankukama, casarakoj chayamusqa, jinataj yuyayniyoj sipaskuna paywan khuska casamiento wasiman yaykusqanku. Chantá wasiyojqa punkuta wisq'aykusqa. 11Jinapi chay phishqa sipaskuna chayamuspa, wajyakusqanku: Wiraqochi, wiraqochi, kicharimuwayku ari, nispa. 12Casarakojtajrí nimusqa: Qankunataqa manapuni rejsiykichejchu,#Mt 7.21-23; Lc 13.25. nispa.

13Noqataj qankunatapis nillaykichejtaj: Wakichisqapuni kaychej, imaraykuchus mana yachankichejchu ima p'unchaytachus, chayrí ima phanitachus Runaj Churin kutimunanta, nispa.#Mt 24.42; Mc 13.33,35; Lc 12.40.

Qolqemanta rijch'anachina

(Lc 19.11-27)

14Diospa janaj pacha kamachiynenqa rijch'akun uj patronman, pichus karuman ripushaspa, kamachinkunaman tiyapuyninta jaywasqa mirachinankupaj, chayman. 15Payqa uj kamachiman 5.000 qolqeta qosqa, ujmantaj 2.000 qolqeta, ujninmantaj waranqallata. Ajinata sapa ujman qosqa ruwayta atisqankuman jina. Chaymantataj chay patrón karuman ripusqa.

16Chantá 5.000 qolqeta jap'ej kamacheqa chay qolqeta uj jinatawan mirachisqa. 17Jinallatataj 2.000 qolqeta jap'ejpis iskaytawan mirachisqa. 181.000 qolqeta jap'ejrí rispa, pampata allaytawan, patronninpa qolqentaqa p'ampaykusqa.

19Chantá patronninkoqa unaymanta kutimuspa, paykunamanta cuentata mañasqa. 20Jinapi pichus 5.000 qolqeta jap'ej kamachi chimpaykuspa, uj phishqa waranqatawan jaywasqa: Wiraqochíy, kay 5.000 qolqeta qowarqanki, chaywantaj kay 5.000 qolqetawan ganarqani, nispa. 21Patronnintaj nisqa: Walejpacha, qanqa sumaj kamachi kanki. Kay pisi qolqewan allinta ruwasqaykirayku, kunanqa aswan sumaj ruwanaman churasqayki. Noqawan khuska kusirikunachej, nispa.

22Chaymantaqa 2.000 qolqeta jap'ejñataj chimpaspa, nisqa: Wiraqochíy, kay 2.000 qolqeta qowarqanki, chaywantaj kay 2.000 qolqetawan ganarqani, nispa. 23Patronnintaj payta nisqa: Walejpacha, qanqa sumaj kamachi kanki. Kay pisi qolqewan allinta ruwasqaykirayku, kunanqa aswan sumaj ruwanaman churasqayki. Noqawan khuska kusirikunachej, nispa.

24Chantá 1.000 qolqeta jap'ejñataj chimpaykuspa, patronninta nisqa: Wiraqochíy, rejserqayki phiña runa kasqaykita. Mana tarpuspalla poqoyta oqharinki, jinallataj mana imatapis ruwaspalla jap'ikapuyta munanki. 25Chayrayku, manchachikuspa, jallp'aman qolqeykita p'ampaykamorqani. Kayqa, qolqeykita jap'ikapuy ari, nispa.

26Patronnintajrí payman kutichisqa: Qanqa ni imapaj allin, qhella kamachi kanki. Sichus qan yacharqanki mana tarpuspalla poqoyta oqharisqayta, chantá mana imatapis ruwaspalla jap'ikapuyta munasqayta chayqa, 27chay qolqeyta bancoman churanayki karqa. Ajinamanta noqa kutimuspa, qolqeyta interesnintawan orqhokapuyman karqa, nispa. 28Chantá patronqa chay waj kamachinkunata nisqa: Chay 1.000 qolqeta paymanta qhechuychej, chantá 10.000 qolqeyojmantaj jaywaychej. 29Tiyapuyniyojmanqa aswan ashkha qosqa kanqa, mana tiyapuyniyojmantatajrí pisi kapusqantapis qhechonqanku. #Mt 13.12; Mc 4.25; Lc 8.18. 30Chantá kay ni imapaj allin kamachitaqa jawa laqhaman wijch'uychej, maypichus waqay, kiru k'arukuytaj kanqa, chayman.

Suyukuna juzgasqa kanqanku

31Maypachachus Runaj Churin kuraj kamachej jina jatun kayninpa lliphipiyninpi, tukuy angelninkuwan jamonqa chaypacha, lliphipej kamachinan tiyanapi tiyaykukonqa. 32Chantá tukuy suyumanta runakuna ñawpaqenman tantakamonqanku. Paytaj ujkunata ujkunamanta t'aqanqa, imaynatachus michejpis ovejakunata cabrakunamanta t'aqan, ajinata. 33Paytaj ovejakunata pañanman churanqa, cabrakunatataj lloq'enman.

34Chantá Kuraj Kamachejqa pañanpi kajkunata nenqa: Jamuychej, qankunaqa Tataypa saminchasqan kankichej. Chayrayku Diospa janaj pacha kamachiyninman yaykuychej, mayqenchus kay pachaj qallariyninmantapacha chayaqeykichejpaj wakichisqa karqa, chayman. 35Chayman yaykunkichej, imaraykuchus yarqhasqa kashajtiy, qankuna mikhuchiwarqankichej.#Is 58.6-10; Ez 18.7; Heb 13.3; Stg 1.27; 2.15-16. Yakumanta ch'akisqa kashajtiy, ujyachiwarqankichej. Karu llajtayoj jina purishajtiytaj, wasiykichejman wajyarikuwarqankichej. 36Jinallataj mana p'achayoj kashajtiy, p'achallichiwarqankichej. Onqosqa kashajtiy, waturikuwarqankichej. Kikillantataj carcelpi kashajtiypis, watukoj jamuwarqankichej, nispa.

37Chantá cheqan kajta ruwajkuna nenqanku: Tukuyta Kamachej, mayk'ajtaj yarqhasqata rikususpa, mikhuchisorqaykuri, chayrí yakumanta ch'akisqa kashajtiyki, ujyachisorqaykuri? 38Chantapis mayk'ajtaj karu llajtayoj kasqaykita reparaspa, wasiykuman wajyarikorqaykuri? Chayrí p'achamanta usushajtiyki, mayk'ajtaj p'achallichisorqaykuri? 39Qan onqosqa, chayrí carcelpi kashajtiyki, mayk'ajtaj waturikusorqaykuri? nispa. 40Kuraj Kamachejtaj paykunaman kutichenqa: Kayta sut'ita niykichej: Imatachus aswan pisipaj qhawasqa ujnin kaj wawqeypaj ruwarqankichej, chaytaqa noqapajmin ruwarqankichej,#Mt 10.40-42; 18.5. nispa.

41Chantá Kuraj Kamachejqa lloq'enpi kajkunatañataj nenqa: Qankunaqa millayta ruwaj kankichej. Chayrayku kaymanta wiñaypaj nina lawrayman riychej, mayqenchus wakichisqa kashan Kuraj Supaypaj, chantá angelninkunapaj ima, chayman.#Ap 20.10,15. 42Chayta niykichej, imaraykuchus yarqhasqa kashajtiy, qankuna mana mikhunata qoriwarqankichejchu, yakumanta ch'akichikojtiytaj, mana yakuta jaywariwarqankichejchu. 43Karu llajtayoj kashajtiy, mana wajyarikuwarqankichejchu. P'achamanta usushajtiy, mana p'achallichiwarqankichejchu. Onqosqa, carcelpitaj kashajtiypis, mana waturikuwarqankichejchu, nispa.

44Chantá paykuna taponqanku: Tukuyta Kamachej, mayk'ajtaj rikusorqayku yarqhasqata, yakumanta ch'akichikojta, karu llajtayoj kasqaykita, p'achamanta pisichikojta, onqosqata, carcelpi wisq'asqata ima, manataj yanapasorqaykuchuri? nispa. 45Kuraj Kamachejtaj paykunaman kutichenqa: Sut'ita niykichej: Sichus aswan pisipaj qhawasqa ujnin kaj wawqeyta mana yanaparqankichejchu chayqa, nillataj noqatapis yanapawarqankichejchu, nispa.#1 Co 8.12. 46Chaymantataj paykuna wiñay ñak'ariyman renqanku, cheqan kajta ruwajkunatajrí wiñay kawsayman yaykonqanku, nispa.#Dn 12.2; Jn 5.29. Ajinata Jesús yachacherqa.

Currently Selected:

Mateo 25: DQPC

Highlight

Copy