Génesis 45

José wawqenkunaman rejsichikun

1Judajpa nisqanta José uyarejtin, sonqon wawayarqa, jinataj kamachinkunaj ñawpaqenkupi manaña awantakuyta aterqachu. Chayrayku jatunmanta qhaparispa, paykunata nerqa: Kaymanta tukuy llojsiychej, nispa. Ajinaqa José wawqenkunaman rejsichikushajtin, Egipto llajtayojkunamanta mana pipis paywan karqachu. 2Chantá José jatunmanta jik'un jik'unta waqarikorqa. Waqarikusqantaqa Egipto llajtayojkunapis uyarerqanku, jinallataj faraonpa wasinpi kajkunapis yachallarqankutaj.

3Chantá Joseqa wawqenkunata nerqa: Noqa José kani. Tatayqa kawsakushanrajchu? nispa. Wawqenkunatajrí mana imatapis kuticherqankuchu, imaraykuchus ñawpaqenpi ancha mancharisqa kasharqanku. 4Josetaj ujtawan paykunata nillarqataj: Qayllaykamuwaychej, nispa. Paykuna qayllaykojtinkutaj, José nerqa: Noqa José kani, wawqeykichej, pitachus qankuna Egiptopi wata runa kanaypaj vendewarqankichej, chay. 5Chaywanpis ama chaymanta anchata llakikuychejchu, nitaj vendewasqaykichejmanta juchachanakuychejchu. Diosmin qankunamanta ñawpajta kayman kachamuwarqa, qankunata kawsachinaypaj.#45.5 Diosmin ñawpajta kachamuwarqa: José niyta munarqa paywan imachus kasqan mana jinallachu kasqanta. Manachayqa tukuy imapis Diospa wakichisqanman jina kasqa (v. 8). 6Kay suyupi yarqhay kasqanqa iskay wataña, phishqa watatawanraj kanan kashan. Chay watakunapi manapuni chajra oqharina kanqachu, nitaj tarpusqapis poqonqachu. 7Chayrayku Dios qankunamanta ñawpajta noqata kayman kachamuwarqa, kay pachapi mirayniykichej ama tukukunanpaj uj jatun t'ukunata ruwasqannejta. 8Ajinaqa Diospuni kay llajtaman kachamuwarqa, mana qankunachu. Paymin faraonta yuyaychanaypaj churawarqa. Jinallataj tukuy imanta qhawapunaypaj churallawarqataj, chantá tukuy Egiptopi kamachinaypaj ima.

9Ajinaqa, maypichus tatay kashan, chayman usqhayta kutiychej, niychejtaj: Wawayki José nisunki: Egipto suyuta kamachinaypaj Dios churawan. Tatáy, waturikuwaj usqhayllata jamuy. 10Egiptoman chayamuspataj, Gosén cheqanejpi, noqamanta qayllapi tiyakunki wawaykikunawan, allchhiykikunawan, uywaykikunawan, chantá tukuy kapuyniykiwan ima. 11Chantá kawsanaykichejpaj noqa mikhunata qosqaykichej, aylluykichej, tukuy qanwan kashajkuna ima ama imamanta pisichikunaykichejpaj, imajtinchus yarqhayqa phishqa watatawanraj kanan kashan, nispa.

12José nillarqataj: Qankuna, sullk'ay Benjaminwan ima testigo kankichej noqapuni kayta nishasqayta. 13Ajinata qankuna tatayman willampuwaychej Egipto suyupi kamachej kasqaymanta, jinallataj imatachá rikusqaykichejta. Chayrayku usqhayta rispa, tatayta pusampuwaychej, nispa.

14Chantá José ujtawan wawqen Benjaminta ojllaykuspa, waqarikorqa. Benjaminpis waqarikullarqataj. 15Chaymantataj José sapa ujta much'aykuspa, ojllaykuspataj, waqarikorqa. Chaymantaña wawqenkunaqa mana manchachikuspa paywan parlarqanku.

16Josejpa wawqenkuna chayamusqankuta faraonpa kamachinan wasipi yacharqanku. Chayta yachaspataj, faraonwan, yanapajninkunawan ima manchayta kusikorqanku. 17Chantá faraón Joseta nerqa: Wawqeykikunata niy burronkukunaman trigota chajnariykukuspa, Canaanman kutinankuta. 18Chantá tataykichejta, aylluykichejtawan pusamuchunku. Noqataj Egiptomanta sumajnin kaj jallp'ata qosqaykichej, qankunataj kaypi poqosqanmanta sumajta mikhunkichej, nispa. 19Chantá wawqeykikunata kamachillaytaj Egiptomanta carretakunata apanankuta, chaykunapi wawankukunata, warminkukunata, tatankuta ima apakampunankupaj. 20Ama imaykichejta Canaanpi saqesqaykichejmanta llakikuychejchu, imajtinchus imachá Egiptopi tiyan, chaymanta sumajnin kaj qankunapaj kanqa, nispa.

21Chaypacha Israelpa churinkuna ajinata ruwarqanku. Joseqa faraonpa kamachisqanman jina carretakunata paykunaman qorqa. Jinallataj ñanpi mikhunankupajpis qollarqataj. 22Chantá sapa ujninkuman mosoj p'achata qollarqataj. Benjaminmantajrí 300 qolqeta qorqa, phishqa mosoj p'achatawan. 23Jinataj imachus Egiptopi sumajta poqojmanta chunka burropi tatanman apacherqa. Jinallataj tatan jamushaspa mikhunanpaj apachillarqataj chunka burropi trigota, t'antata, qoqawitawan ima.

24Chantá José wawqenkunata kacharpayashaspa, nerqa: Pajtataj ñanpi siminakuspa maqanakushawajchej, nispa. Paykunataj purirerqanku. 25Egiptomanta puririspa, Canaanman chayarqanku, maypichus tatanku Jacob tiyakusharqa, chayman. 26Chantá Jacobman willarqanku: Joseqa kawsashasqaraj, paytaj Egiptopi kamachej kasqa, nispa. Jacobtajrí mancharispa, ch'inlla karqa, imaraykuchus llullakushasqankuta yuyarqa. 27Chaywanpis paykuna Josejpa tukuy nisqanta allinta willajtinku, chantá apachisqan carretakunata rikuspa, Jacob manchayta kusikorqa. 28Chantá Israel nerqa: Niwasqaykichejqa jinapunichá, chayllata yachayta munarqani. Waway Joseqa kawsakushanraj. Chayrayku manaraj wañupushaspa, paypa uyanta rikumusaj, nispa.

Currently Selected:

Génesis 45: DQPC

Highlight

Copy