Génesis 44

Joséj ujyanan vaso

1Chay qhepata Joseqa mayordomonta kamacherqa: Kay runakunaj costalninkuman trigota junt'aykuchiy, atisqankuta apakunankupaj. Jinataj qolqe pagasqankuta sapa ujninkoj costalninkuman churaykapullankitaj. 2Chantá qolqe metalmanta vasoyta sullk'a kajpa costalninman churaykunki, trigomanta pagasqan qolqetawan khuskata, nispa. Mayordomotaj Joséj nisqanman jina kikinta ruwarqa.

3Chantá tutamanta inti phawarqamuyta jina, Josejpa wawqenkuna burronkuta qhatiriykukuspa, riporqanku. 4Jinapis llajtamanta manaraj karuta rishajtinku, José mayordomonta yachaykucherqa: Chay runakunata qhatiykuy, taripaspataj ninki: Imaraykutaj patronniyman allin kajmanta sajra kajwan kutichinkichejri? Ima nispataj patronniypa ujyanan 5chantá qhawaspa imachus kananta yachanan vasota suwankichejri? Kaytaqa mana allintachu ruwankichej, nispa.

6Mayordomotaj Joséj wawqenkunata taripaytawan, Joséj nisqanman jina kikinta nerqa. 7Paykunataj kuticherqanku: Wiraqochi, imaraykutaj qan kay jinata nishawaykuri? Noqaykoqa mana jayk'aj chayta ruwaykumanchu. 8Yachanki jina, noqaykoqa pagasqayku qolqeta costalniykupi tarisqaykuta Canaanmantapacha kutichimpuyku. Ima nispataj patronniykej wasinmanta qorinta, qolqentapis suwaykumanri? 9Sichus mayqenniykojpa makinpi vason rikhurenqa chayqa, chay wañuchisqa kachun. Noqaykutaj wiraqochiykoj wata runan kasqayku, nispa.

10Mayordomotajrí nerqa: Qankunaj nisqaykichejman jina kachun. Chaywanpis pejpapichá chay vaso rikhurenqa, chaylla wata runamanta qhepakonqa. Wakinkunataj ripuyta atillankichej, nispa.

11Chantá sapa ujninku usqhayllata burronkuta chajnaraytawan, costalninkuta phaskaraspa, qhawaykorqanku. 12Mayordomotaj kuraj kajmanta qallarispa, sullk'api tukuspa, costalninkuta mask'arqa. Jinaspataj, vasotaqa Benjaminpa costalninpi tarerqa. 13Tarisqanta rikuspa, Benjaminpa wawqekuna llakikuspa, p'achankuta llik'irakorqanku. Chantá sapa ujninku burronkuman costalninkuta chajnaykuytawan, llajtaman kutirerqanku. 14José wasillanpiraj kashajtin, Judawan, chantá wawqenkunawan ima chayaspa, pampakama k'umuykorqanku. 15Josetaj paykunata nerqa: Imatataj kayta ruwawankichejri? Manachu yachankichej noqa watuyta yachaj kasqayta? nispa.

16Chantá Judá kuticherqa: Wiraqochíy, imatataj niykumanri? Mana suwachu kasqaykuta rikuchinaykupaj, imatataj ruwayta atiykumanri? Diosqa unay mana allinta ruwasqaykuta kutichipushawayku. Makiykipi kashayku. Pejpa costalninpichus vasoyki rikhurerqa, chaywan khuska wata runayki kasqayku, nispa.

17Chantá José nerqa: Mana ni imarayku chaytaqa ruwaymanchu. Pichus vasota apashajlla wata runay kanqa. Qankunarí ama imamantapis llakikuspa, tataykichejpa wasinman kutipullaychej. Manataj pipis ima nisonqachejchu, nispa.

18Jinapi Judá Joseman qayllaykuspa, nillarqataj: Wiraqochíy, ama jina kaspa, mana pejpa uyarinanta nisusqayta uyaririway. Ama ari noqapaj phiñakuychu. Qanqa kikin faraonpis kawaj jina kanki. 19Qan tapuwarqayku: Tataykichej, wawqeykichejpis tiyanrajchu? nispa. 20Noqaykutaj willarqayku tatayku allin machituña kasqanta, jinallataj wawqeykupis waynallaraj kasqanta. Paytaqa tatayku machuyayninpi rejserqa. Chantá nillarqaykutaj tataykoqa sullk'aykuta maytapuni munakusqanta, imaraykuchus warmin Raquelpi rejsisqan wawankuna iskaylla karqanku. Kuraj kaj wañunña, sullk'a kajllaña kawsashan, nispa.

21Jinallataj qan niwarqayku sullk'aykuta pusamunaykuta, qan rejsiyta munasqaykirayku. 22Noqaykutaj qanta nerqayku waynaqa tataykuta mana saqerpayayta atisqanta. Sapantachus saqenman chayqa, tatayku wañupunman, nispa. 23Chantá qan niwarqayku: Sullk'aykichejta manachus pusamunkichej chayqa, ama jamuwankichejchu, nispa. 24Noqaykutaj kaymanta kutiytawan, qan imatachus niwasqaykuta, tataykuman willarqayku.

25Jinapi aswan qhepaman tatayku niwarqayku: Trigota rantej ujtawan kutiychej, nispa. 26Noqaykutajrí nerqayku: Noqayku manapuni risqaykuchu, manachus sullk'aykuta pusasqayku chayqa. Sichus Benjamín mana noqaykuwan renqachu chayqa, Egiptota kamachej mana jap'iwasqaykuchu, nispa. 27Chantá tatayku kutichiwarqayku: Qankuna yachankichej Raquel warmiypi iskay wawallata rejsisqayta. 28Ujnenqa ripuspa chinkan, chaymantapachataj manaña payta rikunichu. Yuyani uj millay animal mithaspa, wañuchisqanta. 29Sullk'a wawaytawan pusajtiykichej, sichus imanakonqa chayqa, machu kayniypi llakiywan wañunaypaj qankuna juchayoj kankichej, nispa.

30Ajinaqa, sichus tataypaman kutipusaj, waynataj mana noqawan kutenqachu chayqa, wawanta mana rikuspa tatay wañonqa. Tatayku wawanta manchaytapuni q'ayachakusqanrayku manapuni paymanta kacharikuyta munanchu. 31Mana payta rikuspa, llakiymanta wañonqa. Noqaykutaj juchayoj kasqayku, tatayku machuyayninpi llakiywan wañunanpaj. 32Noqaqa tatayta nerqani kay waynamanta cuentayoj kanayta, chantá nillarqanitaj: Sichus noqa mana Benjaminta kutichimpusqayki chayqa, noqa wiñaypaj juchayoj kasaj, nispa. 33Chayrayku wiraqochíy, kay waynaj cuentanmanta noqa wata runaykimanta qhepakusaj. Paytaj wawqenkunawan llajtaykuman kutipuchun. 34Imaynatataj noqa mana sullk'ayta pusakapuspa tatayman kutiymanri? Mana atiymanchu. Mana tatayta llakiywan ñak'arejta rikuyta munanichu, nispa. Ajinata Judá Joseta nerqa.

Currently Selected:

Génesis 44: DQPC

Highlight

Copy