Génesis 36

Esaujpa miraynin

(1 Cr 1.34-54)

1Kaykuna Esaúj miraynin kanku. Esaujta ujnin sutin Edom karqa. 2Esauqa Canaán llajtayoj warmikunawan casararqa: Jitita Elonpa ususin Adawan, chantá Anáj ususin Aholibamawan ima. Aholibamaqa heveo Sibonpa allchhin karqa. 3Casarakullarqataj Ismaelpa ususin Basematwan. Payqa Nebayotpata panan karqa. 4Esaú warmin Adapi rejsisqan churenqa Elifaz karqa, warmin Basematwan rejsisqan churintaj Reuel karqa. 5Warmin Aholibamapitaj karqanku Jeús, Jalán, Coré ima. Chaykuna Canaanpi tiyakushajtin Esaujpata churinkuna karqanku.

6Esauqa warminkunata, churinkunata, ususinkunata, pikunachus paywan tiyakorqanku, chaykunatawan pusariykukuspa, wawqen Jacobmanta karunchakunanpaj waj cheqaman riporqa. Jinallataj tukuy uywankunata, Canaanpi tiyakushaspa imatachus tarisqanta, tukuyninta apakaporqa. 7Chayta ruwarqa, imaraykuchus iskayninku ashkha uywayoj karqanku, manataj khuska tiyakuyta aterqankuchu. Tiyakusharqanku, chay jallp'aqa uywankuta michinankupaj ancha pisi karqa. 8Chayrayku Esauqa, pichus Edom nisqallataj karqa, pay Seir sutiyoj orqonejman tiyakoj riporqa.

9Esaujpata miraynin kaykuna kanku. Payqa edomitakunaj ñawpa tatanku karqa. Paykunataj Seir sutiyoj orqonejpi tiyakorqanku. 10Kaykuna kanku Esaujpata churinkunaj sutinku: Ada warminpi churin Elifaz karqa, Basemat warminpitaj churin Reuel karqa. 11Elifazpa churinkunataj karqanku Temán, Omar, Sefó, Gatán, Cenaz ima. 12Elifazpa ujnin warminpi karqa Timna. Payqa Elifazpaj uj qhari wawata rejserqa, sutintaj Amalec karqa. Paykuna Esaujpa warmin Adaj allchhinkuna karqanku. 13Reuelpa churinkunarí karqanku: Najat, Zeraj, Samá, Miza ima. Chaykuna Esaujpata ujnin kaj warmin Basematpa churinkuna karqanku. 14Esaujpata ujnin kaj warmin Aholibamaj wawankuna karqanku: Jeús, Jalán, Coré ima. Aholibamaqa Anáj ususin, Sibonpa allchhin karqa.

15Esaujpa mirayninmanta kurajkuna kaykuna karqanku. Esaujpa kuraj kaj churin Elifazpa mirayninmanta: Temán, Omar, Sefó, Cenaz, 16Coré, Gatán, Amalec ima karqanku. Chaykuna Edom jap'iypi Elifazpa mirayninmanta kurajkuna karqanku. Tukuy paykuna Adaj churinkuna karqanku. 17Esaujpa churin Reuelpa churinkunamanta kurajkuna karqanku: Najat, Zeraj, Samá, Miza ima. Kaykuna Edom jap'iypi, Reuelpa mirayninmanta kurajkuna karqanku. Paykunaqa Esaujpa warmin Basematpa churinkuna karqanku. 18Anáj ususin, Esaujpata ujnin kaj warmin Aholibamaj churinkunamanta kurajkuna karqanku: Jeús, Jalán, Coré ima. 19Chay tukuyninku Edom nisqa Esaumanta mirajkuna karqanku, sapa ayllunkupi kurajkuna.

Seirpa miraynin

20Chay cheqapi tiyakoj horeo Seirpa churinkuna kaykuna karqanku: Lotán, Sobal, Sibón, Aná, 21Disón, Eser, Disán ima. Paykuna Edom jap'iypi horeo Seirpa mirayninmanta kurajkuna karqanku. 22Lotanpa churinkunataj karqanku Joriwan, Hemanwan ima. Lotanpa panantaj Timna karqa. 23Sobalpa churinkuna karqanku: Alván, Manajat, Ebal, Sefo, Onam ima. 24Sibonpa churinkuna karqanku: Ayawan, chantá Anawan ima. Anaqa tatan Sibonpa burronkunata ch'innejpi michishaspa, yaku juturikunata tarerqa. 25Anajta uj qhari wawan Disón sutiyoj karqa, ususintaj Aholibama sutiyoj karqa. 26Disonpa churinkuna karqanku: Hemdán, Esbán, Itrán, Querán ima. 27Eserpa churinkunataj karqanku: Bilán, Zaván, Achán ima. 28Disanpa churinkuna karqanku Uzwan, Aranwan ima. 29Hor ayllukunapi kurajkuna karqanku: Lotán, Sobal, Sibón, Aná, 30Disón, Eser, chantá Disán ima. Paykuna Seir jap'iypi, horeokunamanta sapa ayllupi kurajkuna karqanku.

Edom suyupi kamachejkuna

31Edom suyupi kuraj kamachejkuna kaykuna karqanku. Paykunaqa manaraj israelitakuna kuraj kamachejniyoj kashajtinku kamacherqanku. 32Beorpa churin Belaqa Edompi kuraj kamachej karqa, llajtantaj Dinaba karqa. 33Bela wañupojtintaj, Zerajpa churin Jobab kamacherqa. Payqa Bosra llajtamanta karqa. 34Jobab wañupojtintaj, Temanmanta Jusán kamacherqa. 35Jusán wañupojtintaj, Avit llajtamanta Bedadpa churin Hadad kamacherqa. Bedadqa Moabpi Madián llajtayojkunata atiparqa. 36Hadad wañupojtintaj, Masreca llajtamanta Samla kamacherqa. 37Samla wañupojtintaj, Éufrates mayu kantupi Rejobot llajtamanta Saúl kamacherqa. 38Saúl wañupojtintaj, Acborpa churin Baal Janán kamacherqa. 39Acborpa churin Baal Janán wañupojtintaj, Pau llajtamanta Hadar kamacherqa. Hadarpa warmintaj Mehitabel karqa, Matredpa churin Mezabpa allchhin.

40Kaykuna Esaúj mirayninmanta kurajkuna karqanku, sapa ayllunkupi, sapa cheqapi: Timna, Alva, Jetet, 41Aholibama, Elá, Pinón, 42Cenaz, Temán, Mibsar, 43Magdiel, Iram ima. Paykuna tiyakunankupaj jap'ikusqanku jallp'api kuraj kamachejkuna karqanku. Esaujpata ujnin sutin Edom karqa. Paymin edomitakunaj tatanku karqa.

Currently Selected:

Génesis 36: DQDC

Highlight

Copy