Génesis 37

Joséj kawsaynin

1Jacobqa Canaán jap'iypi tiyakorqa, maypichus tatan waj llajtayoj jina tiyakusqa, chaypi. 2Jacobpa ayllun kay jinata kawsarqanku. Chaypacha Joseqa chunka qanchisniyoj watayoj karqa. Paytaj Jacob tatanpa ujnin warmin Biláj churinkunawan chantá Jacobpa ujnin warmin Zilpaj churinkunawan ima ovejata michej karqa. Josetajrí wawqenkunaj mana allin ruwasqankuta tatanman willaj.

3Israel tukuy wawankunamanta nisqaqa Joseta astawan munakoj, machuyayninpi rejsisqanrayku. Chayrayku manchay sumaj p'achata ruwaporqa. 4Josejpa wawqenkunarí tatanku Joseta paykunamanta nisqa astawan munakusqanta rikuspa, Joseta chejnikuyta qallarerqanku, nitaj allinta parlapayajchu kanku.

5Uj kuti José mosqokuspa imatachus rikusqanta wawqenkunaman willarqa, chayraykutaj paykuna astawan payta chejnikorqanku. 6Josetaj paykunata nerqa: Uyariwaychej, imatachus mosqokusqayta willasqaykichej. 7Tukuyninchej chajrapi kashasqanchej, trigota marq'a marq'ata wataraspa. Ujllata noqaj marq'ay sayarispa, cheqanta sayasqa. Qankunaj marq'aykichejtaj noqaypaman muyuykuspa, k'umuykusqanku, nispa.

8Chantá wawqenkuna, nerqanku: Ajá, kaywanqa niytachu munashawayku qan kamachejniyku kanaykita? Qanchu noqaykuta kamachiwasqayku? nispa. Chayrayku mosqokusqanmanta chantá imaynatachus willasqanmanta astawan payta chejnikorqanku.

9Chaymanta qhepanejman José ujtawan mosqokullarqataj, chaytataj wawqenkunaman willallarqataj: Ujtawan kay jinata mosqokullanitaj: Intiwan, killawan, chunka ujniyoj ch'askakunapiwan noqaman k'umuykamushawasqanku, nispa.

10Chantá José imatachus mosqokusqanta tatanman, wawqenkunamanwan ima willajtin, tatan k'amerqa: Ajinata mosqokuspa, imatataj niyta munashankiri? Noqawan, mamaykiwan, wawqeykikunawan imachu, qanman k'umuykusqayku? nispa.

11Wawqenkunaqa Josemanta anchatataj envidiakorqanku. Tatantajrí Josejpa mosqokusqan ima niytachus munasqanta yachayta munaspa, unanchasharqa.

Joseta vendenku

12Uj kuti Joséj wawqenkuna tatankoj uywanta Sichemman qhaterqanku, chaypi michinankupaj. 13Chantá Israelqa Joseta nerqa: Wawqeykikuna Sichempi ovejata michishanku, noqataj munani paykunata waturikoj rinaykita, nispa. Josetaj nerqa: Ya risaj, nispa. 14Israeltaj nerqa: Rispa, wawqeykikuna, jinataj ovejakuna imaynachus kashasqankuta qhawamuy. Chantá kutimuspa, willawanki, nispa. Ajinata Israelqa churin Joseta Hebrón vallemantapacha kacharqa.

Chantá José Sichemman rerqa. 15Chaywanpis Sichemman chayaspa, Joseqa ñanta chinkacherqa. Jinata purishajtintaj, uj runa paywan tinkukuspa, taporqa: Imata mask'aspataj purishankiri? nispa.

16Josetaj nerqa: Wawqeykunata mask'aspa purishani. Manachu rikuwaj maypichus michishasqankuta? nispa.

17Chantá chay runa nerqa: Kaymanta ripunkuña. Paykunata ninakojta uyarerqani: Dotanman qhatina, nispa nejta. Chayrayku Joseqa wawqenkunata mask'aspa, rillarqapuni, jinaspataj, Dotanpi paykunata taripamorqa.

18José karullapiraj kashajtin, wawqenkuna payta rikorqanku. Manaraj paykunaman qayllaykushajtintaj, wañuchinankupaj yachachinakorqanku. 19Chantá, ujkuna ujkuna ninakorqanku: Qhawaychej má, mosqokuyta yachaj jamushan. 20Jamuychej, payta wañuchisunchej, chaymantataj uj ch'aki pujyuman ayanta wijch'uykusunchej. Chantá nisunchej: Ima phiña animalchá mikhuykun, nispa. Chantá mosqokusqan imapichus parasqanta qhawasunchej, nispa.

21Rubentajrí chayta uyarispa, sullk'anta mana wañuchinankuta munaspa, nerqa: Ama wañuchinachu. 22Imapajtaj wañuchisunri? Astawanqa kay ch'inpi ch'aki pujyuman wijch'uykuna, amataj paytaqa imananachu, nispa. Rubén ajinata nerqa, imaraykuchus pay yuyarqa Joseta kacharichispa, tatanman kachapuyta.

23Chantá José, maypichus wawqenkuna kasharqanku, chayman chayajtinkamataj, paykuna payta jap'ispa, tatanpa ruwapusqan p'achanta lluch'orqanku. 24Jinaspataj, Joseta ch'aki pujyuman wijch'uykorqanku, maypichus mana yaku karqachu, chayman.

25Chantá Joséj wawqenkuna mikhunankupaj tiyarikorqanku. Mikhushaspataj, qhatuwan purej ismaelitakunata Galaadmanta jamushajta rikorqanku. Paykuna camellonkunapi sumaj q'apashaj jawinata, balsamota, mirrata ima Egiptoman apasharqanku. 26Jinapi Judaqa wawqenkunata nerqa: Sullk'anchejta wañuchispa, chantá wañuchisqanchejta pakayta munaspa, imatataj tarisunri? 27Wañuchinanchejtaqa, ismaelitakunaman vendeykuna, imaraykuchus Joseqa wawqenchej, yawarninchejtaj, nispa.

Wawqenkunataj nisqan allin kasqanta nerqanku. 28Chayrayku Madián llajtayoj qhatojkuna chaynejta pasashajtinku, Joseta pujyumanta orqhospa, iskay chunka qolqepi ismaelitakunaman venderparerqanku. Ajinamanta ismaelitakunaqa Joseta Egiptoman aparqanku.

29Chaymanta mana unayninmanchu Rubenqa pujyuman kutispa, Joseta manaña rikorqachu. Chayrayku llakikuspa, p'achanta llik'ikorqa. 30Chantá maypichus wawqenkuna kasharqanku, chayman kutispa, paykunata nerqa: Joseqa mana pujyupi kanchu. Kunan imanasajtajri? nispa.

31Josejpa wawqenkunarí paypa p'achanta uj chivota ñak'asqankoj yawarninwan yawarchaykorqanku. 32Chantataj tatankuman apachispa, nerqanku: Kayta tariyku. Wawaykej p'achanchus manachus, chayta allinta reparay, nispa. 33Jacobtaj wawanpa p'achanta rejsikapuspa, nerqa: Arí, wawaypata kayqa. Ima millay animalchari waway Josetaqa mithaspa, mikhuykun, nispa.

34Jinapi Jacob p'achanta llik'irakuspa, qhashqa p'achata churaykukorqa. Jinaspataj, unayta churinmanta llakikuspa, waqarqa. 35Tukuy churinkuna, ususinkuna ima payta sonqochayta munarqanku. Paytajrí mana munarqachu. Mayta waqaspataj, nerqa: Wawaymantaqa wañupunaykama waqasaj. Wañupuspallaña, paywan tinkukapusaj, nispa.

36Chaykamatajrí Madián llajtayoj qhatojkuna Egiptoman chayaspa, Joseta Potifar sutiyojman vendeykorqanku. Potifarqa Egipto suyuta kuraj kamachej faraonpa yanapajnin karqa, faraonta qhawaj soldadokunaj capitannin.

Currently Selected:

Génesis 37: DQDC

Highlight

Copy