Yohanes 10

Porapa topoevu bimba

1“Pariaramo tesaKu hitu. Ane tona aga nompene vala nesua riara gimpu bo ledo nesua ri bobaa, tona haitu topangangga bo topeago. 2Tapi topoevu bimba-bimba haitu, nesua ri bobaa nu gimpu. 3Topojaga gimpu mombabuka bobaa ka ia, bo bimba-bimba haitu mombatalingai suarana ane rapokiona sangara sangu-sangu. Bo rakenina ira hau ri savalikuna. 4Ane nesuvu ri savalikuna puramo bimba, topoevu molipa mokolu ka bimbana haitu. Bo bimba-bimba haitu mangoseaka purina, sabana nisanira suara ntopoevu. 5Bimba-bimba haitu ledo mangoseaka tona ntanina, tapi aga rapalaikara tona haitu, sabana ledo nisanira suarana.”

6I Yesus notesa porapa haitu ka toFarisi, tapi ledo nisanira batuana. 7Sabana haitu, nanguli vaimo i Yesus ka ira, “Pariaramo tesaKu hitu! Yakumo hii bobaa rapesua nu bimba hau riara gimpu. 8Pura-pura tona nakava nokolu ka Yaku, aga topangangga bo topeago. Tapi bimba-bimba ledo nombatalingai suarara. 9Yakumo hii bobaa. Isema-sema mesua modala nte Yaku rapakasalama. Ia mamala mesua bo mesuvu manggava kandea. 10Ane topangangga, ia aga tumai mangangga, mepatesi, bo mompakagero. Tapi Yaku hii nakava ala manusia manggava katuvua mabelo bo katuvua haitu ledo ria kakurana.”#10:1-10 Bimba nirapaka topomparasaya, bo topeago bo topangangga nirapaka guru mpodava.

I Yesus Topoevu nabelo

11“Yakumo hii topoevu nabelo. Yaku nasadia mamate ala bimbaKu matuvu. 12Tona nigaji anu ledo topoevu bimba bo ledo muni tupu nu bimba, ane rakitana asulaku makava mombaraga bimba-bimba, aga rapalaikana bimba-bimba haitu apa ledo bimbana mboto. Jadi bimba haitu raraga bo rasaka nu asulaku sampe masimpotare. 13Tona nigaji haitu mangova malai sabana ia aga nigaji. Ledo rapotovena bimba-bimba haitu.

14-15Yakumo hii topoevu nabelo. TuamaKu nisaniNa Yaku bo Yaku nisaniKu muni Ia. Ivesia muni nisaniKu pura-pura bimbaKu bo bimba-bimbaKu nisanira Yaku. Bo Yaku mamate ala bimba-bimbaKu mamala matuvu.

16Da nariapa bimba-bimbaKu ntanina anu dopa nesua riara gimpu hitu. Ira muni kana Kukeni tumai. Ira mombatalingai suaraKu bo pura-pura bimbaKu majadi salunu rapoevu ntona saito.

17TuamaKu nompotove Yaku sabana Yaku nasadia nombadekei karoKu rapatesi ala Yaku matuvu mpanjili. 18Ledo ria saitoa tona mamala mompatesi Yaku ane ledo Kudekei. Tapi Yakumo anu mombadekei karoKu rapatesi nangoseaka dotaKu mboto. Yaku nakuasa mombadekei karoKu rapatesi bo Yaku nakuasa muni matuvu mpanjili, sabana haitumo niparenta nTuamaKu ka Yaku.”

19Nangepe tesa i Yesus haitu, nosinjanai vai toYahudi. 20Nadea ira nanguli, “Ia haitu nipesua nu seta! Nagila ntotomo Ia! Rapokuya raepeta tesaNa?”

21Tapi naria muni sanu tona nanguli, “Ledo! Ane tona nipesua nu seta, ledo ivesia tesana! Natantumo seta ledo mamala mompakabelo tona naburo!”

ToYahudi ledo nadota nomparasaya i Yesus Ana nu Alatala

22Naliu haitu, nakavamo gantana Posusa Mombatora Pobaruki Banua nu Alatala ri ngata Yerusalem. Posusa haitu nambela tempo naranindi. 23I Yesus nolipa ri tambale ri doyata Banua nu Alatala anu nosanga Tambale Magau Salomo. 24Bo nakavamo pakeni ntoYahudi nantagui Ia hamai. Nekutanamo ira, “Sampe maipia Iko mompakaingu kami? Ane Iko mpuu-mpuu Magau Topepakasalama anu nijanji nu Alatala, uli pakalanto ka kami!”

25Nesana i Yesus, “NiuliKumo ka komiu, tapi ledo niparasayamiu. Kabaraka-kabaraka nipoviaKu ante kuasa lako nte TuamaKu nompopaisani ka komiu isema Yaku hii. 26Tapi ledo ntoto niparasayamiu sabana komiu ledo bimba-bimbaKu. 27Bimba-bimbaKu nantalingai tesaKu bo nisaniKu ira bo nioseakara Yaku. 28Yaku nombadekei ka ira katuvu mabelo sampe ri kasae-saena bo ira ledo ntoto rapopogaa lako nte Alatala. Ledo ntoto maria saitoa tona mamala mangago bimbaKu lako nte Yaku.#10:28 mangago bimbaKu lako nte Yaku: batuana, manggeni tona moura pomparasayara. 29TuamaKu niparasayakaNa ka Yaku bimba-bimba haitu bo Iamo naogepa pade pura-pura anu naria. Ledo ntoto ria saitoa tona mamala mangago ira lako nte Ia. 30Yaku bo TuamaKu ledo ria posisalana, aga saito.”

31Nangepe tesaNa haitu, niala ntoYahudimo vatu raporempera i Yesus. 32Tapi nanguli i Yesus ka ira, “Nadeamo povia nabelo lako nte TuamaKu nipopakitaKu ka komiu. Povia umbana sampe rarempemiu vatu Yaku?”

33Nesana toYahudi, “Ledo poviaMu nabelo sampe Iko rarempe kami vatu. Tapi sabana Iko nompandaente Alatala. Iko aga manusia biasa, tapi Iko nompakasimbayu karoMu ante Alatala!”

34Nesana i Yesus, “Riara Atura-atura agamamiu, naria tesa nu Alatala ka pakeni ntoYahudi nggaulu nitulisi ivei: ‘Komiu pura-pura ana-ana nu Alatala.’#10:34 Mazmur 82:6 35Anu nitulisi riara Buku Gasa haitu ledo nabali-bali tapi bate-batena nakana sampe ri kasae-saena. Ira anu nantarima tesa nu Alatala nggaulu haitu niuliNa ‘ana-ana nu Alatala’, 36nemopa Yaku! Apa Yakumo hii nipelisi nu Alatala bo nituduNa tumai ri dunia! Jadi nakuya niulikamiu Yaku nompandaente Alatala sabana niuliKu Yakumo hii Ana nu Alatala? 37Ane rapana ledo Kupovia pokarajaa niparasaya nTuamaKu ka Yaku, nee raparasayamiu Yaku. 38Tapi nipoviaKu pokarajaa haitu jadi kana raparasayamiumo Yaku. Nau ledo madota komiu momparasaya tesaKu, kana raparasayamiu sabana anu nipoviaKu. Ivesiamo rasanimiu mpuu-mpuu Yaku nosangu rara nte TuamaKu bo TuamaKu muni nosangu rara nte Yaku.”

39Nangepe haitu, pakeni ntoYahudi nompasimbuku vaimo mombasaka i Yesus, tapi nalaimo Ia.

40Naupu haitu, haumo i Yesus nanjili ri sambote Binangga Yordan. Bo Ia naroo hamai ri ponturo i Yohanes Topediu nombadiu tona bara ipia. 41Nadea tona hau nosinggava nte Ia. Bo simbo notesamo ira, “I Yohanes ledo ntoto novia kabaraka. Tapi ia nantesa i Yesus bo tesana haitu nakana mpuu!” 42Bo nadea tona hamai nomparasaya i Yesus.

Currently Selected:

Yohanes 10: TLEDOV

Highlight

Copy