Mak 13

Yàng Jesu yal lài bơh bơta tơrlah tơrlơm Jerusalem mơ bơta Yàng rê wơl

(Mathiơ 23:1-36; Luka 20:45-47)

1Tòm tŭ Yàng Jesu lik bơh hìu duh khoai, gơs dô nă cau bơtê đơs mơ Kơnràñ lah: “Ơ Cau Bơto, sền tĕ lŭ mơ ală hìu do hàng mơnĕ mbe lơi!” 2Yàng Jesu ho lah: “Mê gŏ ală hìu dờng do ơ? Rơp ò gơs pơnai lŭ lơi ơm hơđang pơnai lŭ ndai mơ ò gơtơrlơm.”

Bơta bòl glar mơ kup kơryan

(Mathiơ 24:3-14; Luka 21:7-19)

3Kơnràñ nggui hơđang mơnơm Ôlibe, tòm toh mơ hìu duh khoai, gen Pier, Jakơ, Jang mơ Andre lùp is Kơnràñ lah: 4“Dan yal bol hi in git tŭ lơi rơp gơlik gơs ală bơta hơ̆, mơ rơp gơs tềl sơnio lơi nàng git tŭ tơngai lồi dut jơh ală bơta hơ̆ taih?” 5Gen Yàng Jesu đơs lah: “Kơrhia tĕ, rngòt gơs cau pơrlồm bol mê tìs nrah mòn. 6Gơs oă cau rơp ai sơnđan Añ tus mơ đơs lah: ‘Añ la Bơtau Krist!’ Mơ rơp pơrlồm lơh oă cau in tìs nrah. 7Tòm tŭ bol mê kơno đơs bơh kơlìn mơ jơnau pơnro bơh kơlìn, gen bañ dơrcul. Ală bơta hơ̆ pal gơlik tus mơya hơ̆ òhềt la lồi dut ò. 8Bơh làng bol do rơp bơtào tòmsò mơ làng bol ne, lơgar do tòmlơh mơ lơgar ndai. Oă tiah rơp gơs lơnggơr ù mơ jơgloh rung. Ală bơta hơ̆ mìng la bồ dà bơta jê sồt#13:8 Js: sơntòm bơta jê deh cau ùr bun dê. bòl glar dê.

9 # Mat 10:17-20; Luk 12:11-12. Ai bol mê gen kơrhia tĕ să he, bơh bol khai rơp bơtào bol mê tòm Mpồl Kwang Tơrña,#13:9 Mpồl Kwang Tơrña: mpồl kwang cahrña. pù lơh bol mê tòm ală hìu jum; mơ tài bơh Añ tàng bol mê rơp ntào di đap ală cau kwang đơng lơgar mơ ală cau bơtau nàng lơh cơng bol khai in. 10Mơya lài ngan Jơnau Niam pal geh bơto yal làm jơh ală làng bol in. 11Tòm tŭ bol khai hwài cèng bol mê nàng bơtào, gen bañ kơlôi rcang lài jơnau lơi bol mê rơp đơs, mơya đơs tĕ jơnau rơp ai bol mê in tòm jơ hơ̆, bơh ò di bol mê đơs ò, mơya la Yàng Hwềng Goh gơ dê. 12Oh mơ mi rơp bơtào bal nàng tơnchơt bal mơ gơp, bèp rơp bơtào kòn, ală kòn rơp tòmdră mơ mè bèp mơ tơnchơt bol khai. 13#Mat 10:22.Bol mê rơp gơkòl jơh ală cau gơjrañ kơuềng tài bơh sơnđan Añ, mơya cau lơi kơ̆ nùs jơl tus di lồi dut gen rơp geh dong klàs.”

Bơta rngòt rngơt dờng

(Mathiơ 24:15-28; Luka 21:20-24)

14 # Dan 9:27; 11:31; 12:11. “Mơya tòm tŭ bol mê gŏ bơta rngòt rngơt dờng geh bơtào tòm tiah ò di pal bơtào (cau lơi sền wă tĕ) Gen cau lơi ơm tòm Jude, dô tĕ hơđang mơnơm, 15#Luk 17:31.cau lơi ơm hơđang rkàng hìu bañ mù, mơ bañ mut nàng pơrdô phan lơi bơh tòm hìu, 16ai cau lơi ơm tòm ƀlàng sre bañ rê ai ào khai dê. 17Tòm ală ngai hơ̆, bòl glar cau bun in mơ cau gơs kòn pô in! 18Hòi dan tĕ tồ bơta hơ̆ ò gơlik gơs tòm kơnhai mrềt. 19#Dan 12:1; Yalt 7:14.Bơh tòm ală ngai hơ̆ rơp gơs bơta rung rài, tian gơs bơh sơnròp Yàng Tom Trồ crơng gơs trồ tiah jơl tus di tŭ do òhềt gơs behơ̆, mơ kung rơp ò tŭ lơi gơs behơ̆ sơl. 20Dilah Yàng ò tơnhuc ală ngai hơ̆ gen ò gơs cau lơi geh dong klàs, mơya tài bơh ală cau geh sac rwah, gen tàng Kơnràñ tơnliah ală ngai hơ̆. 21Tòm tŭ hơ̆ dilah gơs cau lơi đơs mơ bol mê lah: ‘Do, Bơtau Krist ơm tềng do,’ hala ‘Tềng hơ̆, gen bañ dòn.’ 22Bơh rơp gơs ală krist ma blac mơ ală cau gơnoar hwơr ma blac gơtơngguh mơ lơh oă bơta krơi, tềl is tian gơs dilah rgơi gen kung pơrlồm ală cau geh sac rwah sơl. 23Kơrhia tĕ, do Añ neh yal lài jơh ală bơta bol mê in rau.”

Bơta rê wơl Kòn Mơnus dê

(Mathiơ 24:29-31; Luka 21:25-28)

24 # Jôel 2:10,31. “Tòm ală ngai hơ̆, tơnơ̆ mơ ală bơta rung rài, mattơngai rơp gơlik klam jơngo, kơnhai ò àng tai, 25#Esai 34:4.ală sơmañ dùh bơh đang trồ, mơ ală gơnoar tap trồ dê gơlơnggơr. 26#Dan 7:13.Tòm tŭ hơ̆ cau rơp gŏ Kòn Mơnus ai gơnap gơnoar dờng mơ bơta gơklŏ, ơm tòm mhwal mơ tus. 27Kơnràñ rơp sồr ală cau gơnrơh pơjum ală cau sac rwah Yàng Tom Trồ dê bơh tòm poan đah jơng trồ, bơh tiah lồi dut ù tus di tiah lồi dut trồ.”

Bơta bơtê bơh chi ƀal

(Mathiơ 24:32-35; Luka 21:29-33)

28“Bơtê tĕ bơh chi ƀal. Tòm tŭ ntê sơmbut nha gơcat, gen bol mê git kơnhai duh mòr tus. 29Kung behơ̆ sơl, tòm tŭ bol mê gŏ ală bơta hơ̆ gơlik gơs, git tĕ lah tŭ tơngai mòr tus, rơp sơntòm. 30Jơh ală bơta rơp gơlik tus lài mơ tŭ jơi kòn mơnus kis tòm rài do chơt jơh. 31Trồ tiah rơp roh mơya jơnau đơs Añ jê ò gơs tŭ lơi roh.”

Ò gơs cau lơi git ngai mơ jơ

(Mathiơ 24:36-44)

32 # Mat 24:36. “Bơh ngai mơ jơ hơ̆ gen ò gơs cau lơi git, bulah cau gơnrơh hơđang trồ hala Kòn kung ò git sơl, mìng Bèp git lơm. 33Kơrhia, mơ drơng kơp tĕ, bơh bol mê ò git tŭ tơngai hơ̆ la tŭ lơi. 34#Luk 12:36-38.Kung be dô nă cau ne lòt ngài, sang hìu, jào gơnoar ală cau dĭ in kòp nă at bồ dô nơm broă mơ kung sồr cau kơp mpồng ơm drơng kơp. 35Behơ̆ drơng kơp tĕ, bơh bol mê ò git cau tòm hìu rê tŭ lơi, mho hala gùl mơnang, tŭ iar nrau hala àng drim, 36rngòt khai rê nisơna mơ gŏ bol mê gam lơhă bic mòn. 37Ală bơta Añ đơs mơ bol mê Añ kung đơs mơ tơl nă cau sơl: Drơng kơp tĕ!”

Currently Selected:

Mak 13: KPM2018

Highlight

Copy