Mak 12

Pơnyơu bơh ală cau tòm suơn ño

(Mathiơ 21:33-46; Luka 20:9-19)

1 # Esai 5:1-2. Yàng Jesu sơntòm ngui jơnau pơnyơu mơ đơs mơ bol khai lah: “Gơs dô nă cau ne tam dô nơm suơn ño, lơh pơnggàr gùt dar, tò dô nơm trồm nàng pat ño, bơt dô nơm theng kơp gàr, mơ ai ală cau lơh suơn in ơpah gơ, gen khai lòt hơ lơgar ndai. 2Tus di kơnhai pic plai, gen cau tòm sồr dô nă cau dĭ lòt tus hơ ală cau lơh suơn nàng ai dô pơnah cồng nha suơn ño bơh di bol khai. 3Mơya bol khai kup cau dĭ hơ̆ pù lơh, lồc behơ̆ bơtrơh rê tê gòi. 4Cau tòm sồr tai dô nă cau dĭ ndai lòt tus, gen bol hơ̆ pòng sồt bồ khai mơ bơtat bơtròh#12:4 Cil: bơtat tơmbe. tai sơl. 5Cau tòm sồr dô nă cau ndai tai lòt tus, gen bol hơ̆ tơnchơt tơn. Lồc behơ̆ cau tòm sồr oă cau dĭ ndai lòt tus, gen cau ƀà kong bol khai pù lơh, cau ƀà tai bol khai tơnchơt. 6Cau tòm suơn gam gơs mìng dô nă, hơ̆ la kòn klau kòñ gơboh. Lồi dut, khai sồr kòn hơ̆ lòt tus hơ bol khai, mơ đơs lah: ‘Ngan bol khai rơp ki ngàm di kòn klau añ!’ 7Mơya bol lơh suơn đơs bal lah: ‘Do la cau pơrdòn. Heh, tơnchơt tĕ khai gen sre brê khai rơp gơrê mơ bol he.’ 8Gen bol khai kup kòn klau hơ̆ tơnchơt tơn, sơrbì hơ bơdìh suơn ño. 9Yàng Jesu lùp lah: Behơ̆ cau tòm suơn ño hơ̆ rơp lơh mbe lơi taih? Khai rơp tus tơnroh ală cau lơh suơn hơ̆, gen jào suơn ño hơ̆ ală cau ndai in. 10Bol mê òhềt sền jơnau Sră Goh do:

‘Pơnai lŭ gơkòl ală cau bơt hìu sang tơlik.

Neh gơlik gơs lŭ mum hìu dờng màng rlau jơh.

11 # Đơs Crih 118:22,23. Do la broă neh gơlik gơs bơh Yàng,

Mơ la dô bơta crih crài di mat bol he,’ ò ơ?”

12Ală cau hơ̆#12:12 Ală cau hơ̆: ală cau at bồ gùng duh khoai cau Juda dê. jòi bơta nàng kup Yàng Jesu bơh git Kơnràñ đơs pơnyơu hơ̆ la sơnio bơh bol khai; mơya bol khai rngòt di mpồl làng bol, gen lòi Kơnràñ mơ lik lòt.

Jơnau lùp bơh bơta boh dia

(Mathiơ 22:15-22; Luka 20:20-26)

13Bol khai sồr bàr pe nă cau Pharisi mơ cau bal mơ bơnòr Herôt dê lòt tus lơh gơtup tìs tòm jơnau đơs Yàng Jesu nàng jòi kai kup Kơnràñ. 14Behơ̆ ală cau hơ̆ lòt tus, đơs mơ Kơnràñ lah: “Ơ Cau Bơto, bol hi git ồng la cau đơs jơnau song, ò ơn nùs gơwèt hơ bơta kơlôi cau ndai dê. Bơh ồng ò sền đah bơdìh cau dê mơya bơto gùng Yàng Tom Trồ dê dô bă song ngan; behơ̆ boh dia bơtau#12:14 Cau Rôma hòi di bơtau sơnđan la Sesa. in la tòm toh mơ bơta boh lam sơl? Bol hi pal boh dia hala ò taih?” 15Mơya Yàng Jesu git bơta ma blac bol khai dê, gen đơs lah: “Ñchi bơh tài bol mê lòng Añ taih? Cèng tĕ dô dơnie Añ in sền.” 16Bol khai cèng gơ Kơnràñ in, gen Kơnràñ lùp lah: “Rùp mơ sơnđan do la ñcau dê taih?” Bol khai ho lah: “Bơtau#12:16 Sesa dê. dê.” 17Yàng Jesu đơs lah: “Tơm wơl tĕ bơtau in phan lơi bơtau dê, mơ tơm wơl tĕ Yàng Tom Trồ in phan lơi Yàng Tom Trồ dê.” Bol khai ai lơh krơi ngan bơh Yàng Jesu.

Jơnau lùp bơh bơta kis wơl

(Mathiơ 22:23-33; Luka 20:27-40)

18 # Broă 23:8. Ală cau Saduse,#12:18 Sền jơnau cih kah tòm Mat 3:7. la cau đơs ò dòn gơs bơta kis wơl, lòt tus lùp Yàng Jesu lah: 19#Yalw 25:5.“Ơ Cau Bơto, Môise neh cih bol hi in bơta boh lam do lah: ‘Dilah dô nă cau gơs bi khai dê chơt, lòi wơl bau mơ ò gơs kòn, gen oh khai pal bau mơ cau ùr bơnrau hơ̆ nàng tơrbŏ jơi bi khai in.’ 20Mơ tai, gơs poh nă oh mi. Cau bi tơnhoa bau, mơ khai chơt ò gơs kòn. 21Cau bàr bau mơ cau ùr hơ̆, mơ khai kung chơt ò gơs kòn; cau pe kung behơ̆ sơl. 22Jơh poh nă cau hơ̆ ò gơs kòn lòi wơl. Lồi tơnơ̆, cau ùr hơ̆ kung chơt sơl. 23Tòm tŭ gơs bơta kis wơl,#12:23 Sră yau cih bơtơl: tòm tŭ bol khai kis wơl. cau ùr hơ̆ rơp la bau ñcau dê tòm bol hơ̆ taih? Bơh poh nă cau hơ̆ neh bau mơ khai.” 24Yàng Jesu ho lah: “Mbe lơi bol mê neh tìs! Mơ ñchi bơh tài ò git taih? Hơ̆ la tài bơh bol mê ò git Sră Goh mơ kung ò git gơnap gơnoar Yàng Tom Trồ dê taih? 25Bơh tòm tŭ cau kis wơl bơh bơta chơt, gen ò lap klau tòmbau ùr, mơya rơp be ală cau gơnrơh ơm hơđang trồ. 26#Lik 3:6.Ai bơh ală cau chơt geh kis wơl, gen bol mê òhềt sền tòm sră Môise tòm tiah neh cih bơh jơnau Yàng Tom Trồ đơs mơ khai tòm rlau lò lah: ‘Añ la Yàng Tom Trồ Abraham dê, Yàng Tom Trồ Isak dê, Yàng Tom Trồ Jakôp dê,’ ò ơ? 27Kơnràñ ò di la Yàng Tom Trồ cau chơt dê ò, mơya la Yàng cau kis dê! Ngan bol mê tìs lơm.”

Bơta Sồr Lam Dờng Rlau Jơh

(Mathiơ 22:34-40; Luka 10:25-28)

28 # Luk 10:25-28. Gơs dô nă cau bơto bơta boh lam iat Yàng Jesu mơ cau Saduse tòm pơndang bal, git Kơnràñ ho wơl chài rgơi, gen lùp Kơnràñ lah: “Tòm ală bơta sồr lam, bơta lơi la dờng màng rlau jơh?” 29#Yalw 6:4-5.Yàng Jesu ho lah: “Do la bơta dờng màng rlau jơh: ‘Ơ Israel, iat tĕ, Yàng la Yàng Tom Trồ bol he dê la Yàng mìng gơs dùl lơm. 30Mê jơh tĕ nùs, jơh hwềng soàn, jơh dơngoh jak, jơh pràn mơ kòñ gơboh di Yàng Tom Trồ mê dê’#12:30 Ală sră cih yau bơtơl: Hơ̆ la boh lam dơ̆ sơnròp ngan, ai bơta sồr lam dơ̆ bàr kung behơ̆ sơl. 31#Leb 19:18.Bơta sồr lam bàr: ‘Mê kòñ gơboh tĕ di cau gơp ƀòn he be să tòm he.’ Ò gơs bơta sồr lam lơi dờng rlau mơ bàr bơta sồr lam hơ̆.” 32#Yalw 4:35; 6:4; Esai 45:21.Cau bơto bơta boh lam ho lah: “Ơ Cau Bơto, ngan behơ̆, ồng đơs di ngan Yàng Tom Trồ mìng gơs dùl lơm. Rlau mơ Kơnràñ ò gơs Yàng lơi ndai tai. 33#Ôse 6:6.Mơ kòñ gơboh di Yàng jơh nùs, jơh dơngoh jak, jơh pràn, mơ kòñ gơboh di cau gơp ƀòn he be să tòm he, hơ̆ la bơta dờng màng rlau mơ jơh ală phan ơn mơ ală phan ơn duh khoai ndai tai sơl.” 34Yàng Jesu gŏ khai ho dô bă jak chài, gen đơs lah: “Mê ò ngài bơh lơgar Yàng Tom Trồ ò. Lồc behơ̆ ò gơs cau lơi khin lùp Kơnràñ tai.”

Jơnau lùp bơh Bơtau Mesia

(Mathiơ 22:41-46; Luka 20:41-44)

35Yàng Jesu ơm bơto sồr tòm hìu duh khoai, Kơnràñ lùp lah: “Mbe ală cau bơto bơta boh lam rgơi đơs lah Bơtau Krist la Kòn Dabit taih? 36#Đơs Crih 110:1.Să tòm Dabit neh geh rngoh rngac bơh Yàng Hwềng Goh mơ đơs lah:

‘Yàng neh đơs mơ Yàng añ lah:

Nggui tĕ đah ma Añ

Jơl tus di tŭ Añ ơn ală cau sò tơm di mê hơđơm mpàng jơng mê dê.’

37Bơh să tòm Dabit neh sơnđan Kơnràñ la Yàng gen mbe rgơi Kơnràñ la kòn khai dê taih?” Làng bol chò nùs kòñ iat Kơnràñ.

Jơnau lah pơrhơng ală cau bơto bơta boh lam

(Mathiơ 23:1-36; Luka 20:45-47)

38Tòm tŭ bơto sồr, Kơnràñ đơs lah: “Kơrhia tĕ di ală cau bơto bơta boh lam la cau kòñ soh ào jrùh mơ lòt yơng, kòñ gơs cau lùp còp să tòm gùl drà, 39kòñ nggui cơnòng hơđap tòm hìu jum cau Juda mơ nggui tiah màng ryŭ tòm bơta ñô sa, 40pìt mơ sa loan hìu ală cau ùr bơnrau dê, mơ lơh bơthĭ hòi dan jòng jơnau. Bol khai rơp gơkòl lơh nền glài kơnjơ̆ rlau tai.”

Cau ùr bơnrau ơn jền

(Luka 21:1-4)

41Yàng Jesu nggui tòm toh mơ tiah prap jền hìu duh khoai nàng sền mpồl làng bol ơn jền. Gơs gal ngan cau pas ơn oă jền. 42Kung gơs dô nă cau ùr bơnrau rƀah lòt tus ơn bàr pet priă kòng, hơ̆ la pơgap dô su. 43Chòp Kơnràñ hòi ală cau bơtê tus mơ đơs lah: “Di ngan Añ đơs mơ bol mê, cau ùr bơnrau rƀah do neh ơn tòm hồp ơn priă oă rlau mơ jơh ală cau ndai. 44Bơh jơh ală cau ne ai jền tơngkah bol khai dê mơ ơn, ai cau ùr bơnrau rƀah do siơ̆u siar ngan, mơya neh ơn jơh phan khai gơs, la jơh phan ròng siam să khai dê.”

Currently Selected:

Mak 12: KPM2018

Highlight

Copy