Mak 14

Bơta jê sồt, bòl glar, chơt mơ kis wơl Yàng Jesu Krist dê

(14:1 – 16:20)

Bơtào kai gơrmơ̆i tòmdră mơ Yàng Jesu

(Mathiơ 26:1-5; Luka 22:1-2; Jang 11:45-53)

1 # Lik 12:1-27. Bàr ngai lài mơ bơta pơjum sa Lòt gan mơ bơta pơjum sa piang lă ò gơs kañ, ală cau gơnoar lam bồ ơn phan duh khoai bal mơ ală cau bơto bơta boh lam jòi kai gơrmơ̆i nàng kup mơ tơnchơt Yàng Jesu. 2Bol khai đơs lah: “Ò di lơh bơta hơ̆ tòm bơta pơjum sa, rngòt gơlik bơta nggồr nggàc tòm làng bol.”

Yàng Jesu geh bong mơñà tòm Bethani

(Mathiơ 26:6-13; Jang 12:1-8)

3 # Luk 7:37-38. Yàng Jesu ơm tòm Bethani tòm hìu Simôn la cau dun. Tòm tŭ Kơnràñ nggui sa gen gơs dô nă cau ùr mut, at dô nơm gri mơ lŭ màng gơs mơñà ƀô bơlhu kas ngan, khai jan bơcah gri tuh mơñà hơđang bồ Yàng Jesu. 4Gơs bàr pe nă cau gơjrañ mơ đơs bal lah: “Ñchi bơh tài lơh pròng preh mơñà ƀô bơlhu behơ̆ taih? 5Bơh mơñà do rgơi tac geh rlau pe rhiang dơnie#14:5 hơ̆ la pe jền tơngai lơh broă tòm 1 nam. nàng pà cau rƀah lơòi in.” Mơ bol hơ̆ yoam lah khai. 6Mơya Yàng Jesu đơs lah: “Lòi tĕ dò khai dê. Ñchi bơh tài bol mê lơh kalke khai in taih? Khai neh lơh broă niam Añ in. 7#Yalw 15:11.Bơh bol mê gơs cau rƀah lơòi ơm sùm mơ bol mê, tŭ lơi kòñ dong pà gòi bol khai in kung di lơm; mơya bol mê ò gơs Añ ơm sùm mơ bol mê. 8Khai neh lơh bơta khai rgơi lơh, neh bong mơñà lài nàng rcang tơp să Añ. 9Di ngan Añ đơs mơ bol mê, làm jơh dunnia tòm tiah lơi Jơnau Niam geh bơto yal, gen kung yal wơl broă khai neh lơh hơ̆ nàng kah bơh khai.”

Cau pơrlơ̆ dră di Yàng Jesu

(Mathiơ 26:14-16; Luka 22:3-6)

10Tŭ hơ̆ Juda Iskariôt la dô nă tòm jơt bàr nă cau bơtê, tus hơ ală cau gơnoar lam bồ ơn phan duh khoai nàng bơtào Yàng Jesu bol khai in. 11Behơ̆ bol hơ̆ chò hòp tòm tŭ kơno, mơ ho ai khai in jền priă. Lồc behơ̆ Juda jòi tŭ lơmpah nàng jào Yàng Jesu bol khai in.

Yàng Jesu pơjum sa lòt gan bal mơ ală cau bơtê

(Mathiơ 26:17-25; Luka 22:7-14; Jang 13:21-30)

12Tòm ngai sơnròp bơta pơjum sa piang lă ò gơs kañ la ngai hàl belàt pơjum sa Lòt gan dê, ală cau bơtê đơs mơ Yàng Jesu lah: “Ntềng đah Kơnràñ kòñ bol hi lòt rcang yò Kơnràñ in sa bơta pơjum sa Lòt gan taih?” 13Gen Yàng Jesu sồr bàr nă cau bơtê lòt mơ nting lah: “Lòt tĕ tòm ƀòn dờng, rơp tìp dô nă cau klau đoa yang dà, gen jat tĕ khai. 14Tòm tŭ khai mut tòm hìu lơi, gen bol mi đơs tĕ mơ cau tòm hìu hơ̆ lah: ‘Cau Bơto đơs lah: Ntềng đah ơdŭ nac la tiah Añ rơp sa bơta pơjum sa Lòt gan bal mơ ală cau bơtê Añ jê taih?’ 15Mơ să tòm khai rơp sơnio bol mê in dô nơm ơdŭ dờng tap hơđang, neh rcang rơndap sir rau. Rcang yò sa tĕ tềng hơ̆ bol he in.” 16Behơ̆ bàr nă cau bơtê lik lòt mut tòm ƀòn dờng, tìp ală bơta be jơnau Yàng Jesu neh đơs, mơ bol khai rcang yò sa bơta pơjum sa Lòt gan.

17Tòm tŭ trồ mho rau Yàng Jesu tus bal mơ jơt bàr nă cau bơtê. 18#Đơs Crih 41:9.Tòm tŭ nggui sa, Yàng Jesu đơs lah: “Di ngan Añ đơs mơ bol mê, dô nă tòm bol mê nggui sa bal mơ Añ do rơp pơrlơ̆ dră di Añ.” 19Bol khai moat jrùng ngan, gen tòm pơnjat mơ gơp mơ lùp Kơnràñ lah: “Hơ̆ la añ ơ?” 20Yàng Jesu ho lah: “Hơ̆ la dô nă tòm jơt bàr nă bol mê la cau iurŭ tê di prềng bal mơ Añ. 21Mơya bòl glar cau do in la cau pơrlơ̆ dră dê Kòn Mơnus! Bơh Kòn Mơnus rơp chơt jat be jơnau neh cih bơh Khai, chan ò deh khai la niam rlau.”

Sa kah Yàng

(Mathiơ 26:26-30; Luka 22:14-20; I Kôrintô 11:23-25)

22Tòm tŭ sa, Yàng Jesu ai piang lă, hòi dan ưnngài, gen dơrkă mơ tong bol khai in mơ đơs lah: “Ai tĕ, do la să jan Añ jê.” 23Kơnràñ ai mơngàn, ưnngài Yàng Tom Trồ, mơ tong bol khai in, gen jơh tơl nă hùc. 24#Lik 24:8; Jer 31:31-34.Yàng Jesu đơs lah: “Do la mhàm Añ, hơ̆ la mhàm bơta ho bal dê, neh tuh oă cau in. 25Di ngan Añ đơs mơ bol mê, Añ ò hùc dà plai ño do tai, jơl tus di ngai Añ rơp hùc dà plai ño pa tòm lơgar Yàng Tom Trồ.”

26Tòm tŭ neh đơs chò rau, Yàng Jesu mơ ală cau bơtê lik lòt tus hơ mơnơm Ôlibe.

Jơnau yal lài Pier in

(Mathiơ 26:31-35; Luka 22:31-34; Jang 13:36-38)

27 # Sac 13:7. Yàng Jesu đơs mơ bol khai lah: “Jơh ală bol mê rơp dô mơ sang lòi Añ bơh gơs jơnau cih lah:

‘Yàng Tom Trồ rơp tơnchơt cau ê belàt,

Gen ală belàt rơp gơprah gơpring.’

28 # Mat 28:16. Mơya tơnơ̆ mơ tŭ Añ geh kis wơl rau, gen Añ rơp lòt tus hơ Galile lài mơ bol mê.” 29Pier đơs lah: “Bulah jơh tơl nă gơtup tìs, mơya Añ gen ò!” 30Yàng Jesu ho lah: “Di ngan Añ đơs mơ mê, ngai do, tòm mang do tơn, lài mơ tŭ iar òhềt nrau bàr dơ̆, gen mê rơp pơndang sang Añ pe dơ̆.” 31Mơya Pier đơs tai dô bă nền cê ngan lah: “Bulah añ pal chơt bal mơ Kơnràñ, añ kung ò pơndang sang Kơnràñ sơl.” Jơh tơl nă cau bơtê kung đơs behơ̆ sơl.

Yàng Jesu hòi dan tòm suơn Getsemane

(Mathiơ 26:36-46; Luka 22:39-46)

32Yàng Jesu mơ ală cau bơtê lòt tus hơ dô bă tiah sơnđan la Getsemane. Kơnràñ đơs mơ bol khai lah: “Nggui tĕ tềng do, tòm tŭ Añ hòi dan.” 33Kơnràñ lam Pier, Jakơ mơ Jang lòt bal, gen gơlik moat jrùng mơ dơrcul oă ngan. 34Kơnràñ đơs mơ bol khai lah: “Hwềng soàn Añ moat jrùng ngan jơl chơt. Ơm tĕ tềng do mơ drơng kơp.” 35Gen Kơnràñ lòt dô êt cơnđòa tai, tơmbic să tòm ù mơ hòi dan lah dilah rgơi gen dan lòi jơ do klàs bơh di Kơnràñ. 36Kơnràñ đơs lah: “Aba, ơ Bèp, jơh ală bơta Bèp rgơi lơh gơs lơm, dan Bèp tă mơngàn jê sồt do bơh di kòn; bulah behơ̆ ò di jat nùs kòñ kòn dê mơya jat nùs kòñ Bèp dê.” 37Gen Kơnràñ rê wơl, gŏ pe nă bol khai lơhă bic, gen đơs mơ Pier lah: “Ơ Simôn, mê bic ơ? Mê ò rgơi drơng kơp dô jơ ơ? 38Drơng kơp tĕ mơ hòi dan, nàng bol mê ò gơtơmut tòm bơta ơniai; hwềng nùs kòñ ngan mơya poac să lơbơn lơño.” 39Kơnràñ lòt tai mơ hòi dan be jơnau dan lài sơl. 40Kơnràñ rê wơl tai, gŏ bol khai gam lơhă bic, bơh mat bol khai yồp yồi#14:40 Cil: bic ñhơm ñhơm. ngan, mơ bol khai ò git ho wơl mbe lơi mơ Kơnràñ. 41Kơnràñ rê wơl dơ̆ pe, đơs mơ bol khai lah: “Tŭ do gam bic lơhă mơ rlô ơ? Tơl rau, jơ neh tus, do Kòn Mơnus rơp gơkòl bơtào tòm tê ală cau glài. 42Guh tĕ! Lòt ih! Ne cau pơrlơ̆ dră di Añ neh tus rau.”

Yàng Jesu kong cau kup

(Mathiơ 26:47-56; Luka 22:47-53; Jang 18:3-12)

43Tòm tŭ Yàng Jesu gam đơs, gen tŭ hơ̆ mo, Juda la dô nă tòm jơt bàr nă cau bơtê, tus bal mơ dô mpồl cau at đào mơ gai, tus bơh ală cau gơnoar lam bồ ơn phan duh khoai, mơ ală cau bơto bơta boh lam bal mơ ală cau kwang kra. 44Mơ tai, cau pơrlơ̆ dră di Kơnràñ neh ai bol hơ̆ in dô nơm tềl mơ đơs lah: “Cau lơi añ cum, la cau hơ̆. Kup tĕ khai mơ lam lòt kràñ cê.” 45Tòm tŭ neh tus rau, Juda tus mo hơ Yàng Jesu mơ đơs lah: “Ơ Cau Bơto!” gen cum Kơnràñ. 46Gen bol hơ̆ ai tê sơmbat kup Yàng Jesu. 47Gơs dô nă tòm ală cau ơm tềng hơ̆ tă đào, lơh cau dĭ cau gơnoar dờng lam bồ ơn phan duh khoai dê, sreh tac dô đah tồr khai dê. 48Gen Yàng Jesu ai jơnau đơs mơ bol khai lah: “Bol mê at đào mơ gai tus kup Añ be kup cau phà ơ? 49#Luk 19:47; 21:37.Kòp ngai Añ neh ơm digùl bol mê mơ bơto sồr tòm hìu duh khoai mơ bol mê ò kup Añ, mơya ală bơta do pal gơs nàng jơnau Sră Goh gơlik di ngan.” 50Jơh tơl nă sang lòi Kơnràñ mơ dô.

51Gơs dô nă cau pơnu ne lòt jat Kơnràñ, nggòc mìng dô pang ồi mơ bài che dơmài lơbơn di să. Ală cau hơ̆ kup khai, 52mơya khai sang lòi ồi hơ̆, ơm kuh mơ ntoat dô.

Yàng Jesu di đap kwang tơrña

(Mathiơ 26:57-68; Luka 22:54-55, 63-71; Jang 18:13-14, 19-24)

53Ală cau hơ̆ lam Yàng Jesu tus hơ hìu cau gơnoar dờng lam bồ ơn phan duh khoai. Gơs jơh ală cau gơnoar lam bồ ơn phan duh khoai, ală cau kwang kra bal mơ ală cau bơto bơta boh lam pơjum bal tềng hơ̆. 54Pier neh jat Kơnràñ ngài ngài tus di hìu dờng cau gơnoar dờng lam bồ ơn phan duh khoai dê, mut nggui bal mơ ală cau ling kơp gàr di ồs nàng ñjơr. 55Mơ tai, ală cau gơnoar lam bồ ơn phan duh khoai mơ jơh Mpồl Kwang Tơrña jòi cơng tàng yă Yàng Jesu nàng tơnchơt Kơnràñ, mơya jòi ò bàn. 56Bơh gơs oă cau lơh cơng blac tòmdră di Yàng Jesu, mơya jơnau lơh cơng bol khai dê ò tòm toh bal. 57Tŭ hơ̆ gơs bàr pe nă cau ntào lơh cơng blac bơh Yàng Jesu lah: 58#Jang 2:19.“Bol hi neh kơno khai đơs lah: ‘Añ rơp sòr tơrlah hìu duh khoai bơh tê cau bơt do; tòm pe ngai Añ rơp bơtào gơs wơl dô nơm hìu duh khoai ndai ò di bơh tê cau bơt.’” 59Mơya jơnau lơh cơng do bol khai dê kung ò tòm toh bal sơl.

60Cau gơnoar dờng lam bồ ơn phan duh khoai ntào digùl mpồl jơnum mơ lùp Yàng Jesu lah: “Mê ò ho jơnau lơi ơ? Bơta ală cau do lơh cơng yă mê la ñchi taih?” 61Mơya Yàng Jesu ơm mŏ mŏ, ò ho dô jơnau lơi. Cau gơnoar dờng lam bồ ơn phan duh khoai lùp tai lah: “Mê ngan la Bơtau Krist, Kòn Bơtau pal jòng ro sơl?” 62#Đơs Crih 110:1; Dan 7:13.Yàng Jesu ho lah: “Añ la cau hơ̆.

Ală ồng rơp gŏ Kòn Mơnus

nggui đah ma Bơtau Gơnap Gơnoar dê,

ơm tòm mhwal trồ mơ tus.”

63Cau gơnoar dờng lam bồ ơn phan duh khoai crè ào khai dê mơ đơs lah: “Ñchi bơh tài bol he gam jòi cơng tàng ndai tai taih? 64#Leb 24:16.Bol mê pa kơno jơnau tràl sơrbil hơ̆. Mbe bol mê kơlôi taih?” Jơh tơl nă lơh nền lah Kơnràñ pal chơt.

65Gơs cau choh di Kơnràñ, lềt mat Kơnràñ, tap di Kơnràñ mơ đơs mơ Kơnràñ lah: “Đơs hwơr tĕ ih!” Ală cau ling sơmbat di Kơnràñ mơ pah Kơnràñ.

Pier pơndang sang Yàng Jesu

(Mathiơ 26:69-75; Luka 22:56-62; Jang 18:15-18, 25-27)

66Pier ơm di tiah tòm ƀlàng jơng hìu dờng. Gơs dô nă cau dĭ ùr cau gơnoar dờng lam bồ ơn phan duh khoai dê tus, 67gŏ Pier ơm ñjơr ồs, gen sền di mat khai mơ đơs lah: “Mê kung ơm bal mơ Jesu Cau Nasaret!” 68Mơya Pier pơndang lah: “Añ ò git, kung ò wă ñchi ai đơs.” Chòp Pier lòt tus hơ ƀlàng di gah mpồng hìu dờng, gen iar nrau.#14:68 Dô êt sră cih tê ò gơs jơnau: gen iar nrau. 69Cau ùr dĭ hơ̆ gŏ khai gen đơs tai mơ ală cau ơm tềng hơ̆ lah: “Khai do kung bal mơ mpồl hơ̆.” 70Mơya khai pơndang dô dơ̆ tai. Dô ơthoa tai, ală cau ơm ntào tềng hơ̆ đơs mơ Pier lah: “Ngan mê kung bal mơ mpồl hơ̆, bơh mê la cau Galile.” 71Mơya khai srat rma mơ srat să lah: “Añ ò git cau mơ bol mê đơs hơ̆.” 72Tŭ hơ̆ mo iar nrau dơ̆ bàr. Gen Pier kah wơl jơnau Yàng Jesu neh đơs mơ khai lah: “Lài mơ tŭ iar òhềt nrau bàr dơ̆, mê rơp pơndang sang Añ pe dơ̆.” Dơ̆ khai kơlôi sơnơng bơh bơta hơ̆ gen khai ñìm rac.

Currently Selected:

Mak 14: KPM2018

Highlight

Copy