Mathiơ 8

Yàng Jesu sơmbòi cau dun

(Mak 1:40-45; Luka 5:12-16)

1Tòm tŭ Yàng Jesu mù bơh mơnơm, gơs mpồl làng bol oă lòt jat Kơnràñ. 2Ne, gơs dô nă cau dun tus cùn khoai Kơnràñ mơ đơs lah: “Ơ Yàng, dilah Kơnràñ kòñ, gen rgơi lơh añ in gơs goh.”#8:2 lơh añ in gơs goh: Jat gùng duh khoai cau kòp jê do gơkòl sền la ƀơ̆ ƀơl. 3Yàng Jesu ai tê ƀư di khai mơ đơs lah: “Añ kòñ, goh tĕ.” Gen dun khai goh mo. 4#Leb 14:1-32.Yàng Jesu đơs tai mơ khai lah: “Bañ yal mơ cau lơi, mơya lòt tĕ sơnio să mê mơ cau gơnoar ơn phan duh khoai, mơ ơn phan be Môise neh sồr nàng lơh cơng bol khai in.”

Yàng Jesu sơmbòi cau dĭ cau at dô rhiang ling dê

(Luka 7:1-10)

5Dơ̆ Yàng Jesu mut tòm Kapenaum, gơs dô nă cau at dô rhiang ling tus rac dan mơ Kơnràñ lah: 6“Ơ Yàng, cau dĭ gơna añ kòp gơlte bic tòm hìu, jê bòl glar oă ngan.” 7Yàng Jesu đơs lah: “Añ rơp tus sơmbòi khai in.” 8Cau at dô rhiang ling ho lah: “Ơ Yàng, añ ò di pal nàng Kơnràñ in mut tòm hìu añ. Dan đơs mìng dô jơnau lơm gen cau dĭ gơna añ jê rơp geh bòi. 9Bơh añ ơm tòm tiah gơnoar cau dê mơ kung gơs ală cau ling ơm tòm tiah gơnoar añ jê. Añ sồr cau do: ‘Lòt tĕ,’ gen khai lòt; sồr cau ne; ‘Tus tĕ,’ gen khai tus; mơ sồr cau dĭ añ: ‘Lơh tĕ broă do,’ gen khai lơh.” 10Yàng Jesu kơno jơnau hơ̆ gen ai lơh krơi, đơs mơ ală cau lòt jat lah: “Di ngan Añ đơs mơ bol mê, Añ òhềt gŏ bơta dòn dờng be do tòm làng bol Israel. 11#Luk 13:29.Añ đơs mơ bol mê, gơs oă cau bơh đah mattơngai lik mơ đah mattơngai mut rơp tus nggui sa bal mơ Abraham, Isak mơ Jakôp tòm lơgar đang trồ. 12#Mat 22:13; 25:30; Luk 13:28.Mơya ală kòn lơgar hơ̆ dê rơp gơkòl sơrbì hơ bơdìh tòm tiah klam jơngo, tềng hơ̆ rơp gơs ñìm rac mơ rkiat sề.” 13Gen Yàng Jesu đơs mơ cau at dô rhiang ling lah: “Rê tĕ, jat be bơta mê neh dòn gen rơp gơs ngan behơ̆.” Cau dĭ gơna geh bòi di di jơ hơ̆.

Yàng Jesu sơmbòi oă cau kòp jê

(Mak 1:29-34; Luka 4:38-41)

14Gen Yàng Jesu mut tòm hìu Pier, gŏ po me khai bic kòp prơm. 15Chòp Kơnràñ ƀư dê tê mò, gen kòp prơm thit mo, mơ mò guh duh broă Kơnràñ.

16Tòm mho hơ̆, cau cèng Kơnràñ in oă cau cà lơh. Kơnràñ ngui jơnau đơs mơ bơtrơh ală cà hơ̆, mơ sơmbòi jơh ală cau kòp jê, 17#Esai 53:4.nàng gơlik di ngan be jơnau cau gơnoar hwơr Esai neh đơs lah:

“Să tòm Kơnràñ neh àñ ơnòng ală bơta lơbơn lơño bol he dê,

mơ mă àñ ală bơta kòp jê bol he dê.”

Mbe lơh nàng jat Yàng

(Luka 9:57-62)

18Mơ tai, tòm tŭ Yàng Jesu gŏ mpồl làng bol oă ơm gùt dar, gen Kơnràñ sồr tiă đah bơtĭ ne tơnau. 19Gơs dô nă cau bơto bơta boh lam tus đơs mơ Kơnràñ lah: “Ơ Cau Bơto, tiah lơi Ồng lòt, añ rơp lòt jat tềng hơ̆.” 20Yàng Jesu đơs lah: “Pì gơs trồm, sềm gơs rsòn, mơya Kòn mơnus ò gơs tiah gòl bồ.” 21Dô nă cau bơtê ndai đơs mơ Kơnràñ lah: “Ơ Yàng, dan ai añ in rê tơp bèp añ lài.” 22Mơya Yàng Jesu đơs lah: “Jat tĕ Añ, lòi cau chơt tơp cau chơt bol khai dê.”

Yàng Jesu lơh ring ngềt càl rbut

(Mak 4:35-41; Luka 8:22-25)

23Yàng Jesu mut tòm ơhò, ală cau bơtê jat Kơnràñ. 24Nisơna gơlik rbut dờng tòm gùl dàlềng, tian gơs ryà dà gơ glơm tòm ơhò, mơya Yàng Jesu bic lơhă. 25Ală cau bơtê tus pơrlai Kơnràñ mơ hòi lah: “Ơ Yàng, dan dong klàs bol hi. Bol he mòr chơt roh do!” 26Yàng Jesu đơs lah: “Ơ ală cau gơs dô êt bơta dòn, ñchi bơh tài bol mê rngòt taih?” Chòp Kơnràñ ntào, lah pơrhơng càl mơ dàlềng, gen gơs ring drik ngan. 27Ală cau hơ̆ ai lơh krơi ngan mơ đơs lah: “Cau do la ñcau gen tàng càl mơ dàlềng kung dòn bơr khai dê taih?”

Yàng Jesu sơmbòi bàr nă cau cà lơh

(Mak 5:1-20; Luka 8:26-39)

28Tòm tŭ Yàng Jesu neh tiă đah bơtĭ ne rau, tòm kơnhwàl Gadara, gơs bàr nă cau cà lơh lik bơh bơtô ƀồc nàng tìp Kơnràñ; bol khai jàñ bơsak ngan, tian gơs ò gơs cau lơi khin lòt tòm gùng hơ̆. 29Chòp bol khai hòi driau lah: “Ơ Kòn Yàng Tom Trồ, gơs ñchi jơnau digùl bol hi mơ Kơnràñ taih? Kơnràñ tus nàng lơh bòl glar bol hi lài mơ tŭ tus di tơngai lơh nền ơ?” 30Mơ tai, ngài bơh di tiah hơ̆ gơs dô mpồl sur oă ngan ơm sa. 31Ală cà rac dan lah: “Dilah Kơnràñ bơtrơh bol hi, dan ai bol hi in mut tòm mpồl sur ne.” 32Kơnràñ sồr lah: “Lòt tĕ.” Ală cà lik, mut tòm mpồl sur; mpồl sur bơh kơh ntruñ tòm dàlềng, gen dà bŭ chơt jơh. 33Ală cau ê sur ntoat dô, rê tòm ƀòn dờng, yal wơl jơh ală bơta, mơ jơnau bơh bàr nă cau cà lơh sơl. 34Gen jơh ală cau tòm ƀòn dờng lik nàng tìp Yàng Jesu. Dơ̆ gŏ Kơnràñ, gen rac dan mơ Kơnràñ lik bơh nhàr kơnhwàl lơgar bol khai dê.

Currently Selected:

Mathiơ 8: KPM2018

Highlight

Copy