Mathiơ 9

Yàng Jesu sơmbòi cau gơlte

(Mak 2:1-12; Luka 5:17-26)

1Yàng Jesu mut tòm ơhò, tiă dàlềng rê hơ ƀòn Kơnràñ òs ơm.#9:1 Hơ̆ la ƀòn Kapenaum (sền 4:13). 2Gơs cau tùng tus hơ Kơnràñ dô nă cau gơlte bic hơđang cơnòng. Yàng Jesu gŏ bơta dòn bol khai dê, gen đơs mơ cau gơlte lah: “Ơ kòn, kơ̆ tĕ nùs, tồi glài mê neh geh toh.” 3Tŭ hơ̆ gơs bàr pe nă cau bơto bơta boh lam kơlôi òm lah: “Cau do đơs tràl sơrbil.” 4Yàng Jesu git bơta kơlôi bol khai dê gen đơs lah: “Ñchi bơh tài bol mê kơlôi sơnơng iơh tòm nùs behơ̆ taih? 5Tòm bàr jơnau đơs: ‘Tồi glài mê neh geh toh,’ hala ‘Ñă ntào tĕ mơ lòt,’ jơnau lơi la ƀuơn rlau taih? 6Mơya tồ bol mê in git lah Kòn mơnus gơs gơnoar toh glài hơđang ù,” gen Kơnràñ đơs mơ cau gơlte lah: “Ñă ntào tĕ, at cơnòng mơ rê hìu mê.” 7Cau gơlte ñă ntào mơ rê hìu khai. 8Mpồl làng bol gŏ bơta hơ̆, gen rngòt rngơt ngan mơ jòng ro Yàng Tom Trồ la Bơtau neh ai cau in gơnoar behơ̆.

Yàng Jesu hòi Mathiơ

(Mak 2:13-17; Luka 5:27-32)

9Yàng Jesu lòt bơh tềng hơ̆, gŏ dô nă cau sơnđan la Mathiơ nggui tòm tiah boh dia, gen sồr khai lah: “Jat tĕ Añ.” Khai ñă ntào mơ jat Kơnràñ.

10 # Luk 15:1-2. Tòm tŭ Yàng Jesu nggui sào tòm hìu, gơs oă cau dar dia mơ cau glài tus nggui bal mơ Kơnràñ mơ ală cau bơtê Kơnràñ dê. 11Cau Pharisi gŏ behơ̆ gen đơs mơ cau bơtê Kơnràñ dê lah: “Ñchi bơh tài Cau Bơto bol mê dê sào bal mơ cau dar dia mơ cau glài taih?” 12Yàng Jesu kơno jơnau hơ̆ gen đơs mơ bol khai lah: “Cau pràn kơldang ò càng cau gơnoar sơnơm ò, mơya la cau kòp jê. 13#Ôse 6:6.Lòt tĕ bơtê git jơnau gơtha sèng do: ‘Añ kòñ bơta kòñ nđàc, ò kòñ phan ơn duh khoai ò.’ Bơh Añ tus ò di nàng hòi cau song ring ò, mơya nàng hòi cau glài.”

Jơnau lùp bơh bơta ơt sa

(Mak 2:18-22; Luka 5:33-39)

14Tŭ hơ̆ ală cau bơtê Jang dê tus hơ Yàng Jesu mơ đơs lah: “Ñchi bơh tài bol hi mơ ală cau Pharisi òs ơt sa, ai cau bơtê Ồng dê ò ơt sa taih?” 15Yàng Jesu ho lah: “Tòm tŭ cau bơrtơu gam ơm mơ oh mi bơyô he, gen bol khai rgơi moat jrùng sơl? Mơya tus di tŭ cau bơrtơu geh cèng lik bơh bol khai, gen sồng bol khai ơt sa. 16Ò gơs cau lơi ai bài tơrme mơ tơmbồl di ào klar, bơh bài tơrme rơp lơh gơprơt sèt ào klar, mơ tiah sèt gơlik iơh rlau tai. 17Kung ò gơs cau tròc tơrnòm pa tòm nhồng gơltau yau, dilah lơh behơ̆ gen bơcah nhồng, tơrnòm hòr lik, mơ nhồng kung roh sơl. Mơya cau tròc tơrnòm pa tòm nhồng gơltau pa, gen jơh bàr bơta hơ̆ gam niam lơm.”

Kòn ùr Jeru dê mơ cau ùr pìng mhàm

(Mak 5:21-43; Luka 8:40-56)

18Tòm tŭ Yàng Jesu đơs ală jơnau hơ̆, gơs dô nă cau at bồ hìu jum tus, cùn khoai Kơnràñ mơ đơs lah: “Kòn ùr añ pa chơt; dan Kơnràñ tus ơn tê hơđang khai nàng khai in kis.” 19Gen Yàng Jesu ñă ntào lòt jat khai, ală cau bơtê Kơnràñ kung lòt sơl.

20Tŭ hơ̆, gơs dô nă cau ùr kòp pìng mhàm neh jơt bàr nam rau, tus bơh ngkòi Kơnràñ mơ ƀư di tiang ào Kơnràñ dê. 21Bơh khai kơlôi is lah: “Dilah añ mìng ƀư di ào Kơnràñ, gen añ rơp geh bòi.” 22Yàng Jesu wơlke, gŏ khai gen đơs lah: “Ơ kòn ùr, kơ̆ tĕ nùs, bơta dòn ai dê neh sơmbòi ai.” Gen cau ùr hơ̆ geh bòi mo bơh di jơ hơ̆.

23Tòm tŭ Yàng Jesu tus hơ hìu cau at bồ hìu jum, gŏ mpồl cau uh kơwào mơ mpồl làng bol lơh nggồr nggàc, 24gen đơs lah: “Lik tĕ, bơh kòn ùr do ò di chơt ò, mơya khai bic lơhă gơ dê.” Bol khai dơñŏ tơnhial di Kơnràñ. 25Dơ̆ neh bơtrơh mpồl làng bol rau, gen Kơnràñ mut, at di tê kòn ùr, gen khai guh mo. 26Jơnau do pơnro làm kơnhwàl hơ̆.

Yàng Jesu sơmbòi bàr nă cau jơngo

27Yàng Jesu lòt bơh tềng hơ̆, gơs bàr nă cau jơngo jat Kơnràñ mơ hòi lah: “Ơ Kòn Dabit, dan nđàc sơngit di bol hi.” 28Dơ̆ Kơnràñ mut tòm hìu rau, bàr nă cau jơngo hơ̆ tus hơ Kơnràñ. Yàng Jesu đơs mơ bol khai lah: “Bol mê dòn Añ rgơi lơh bơta bol mê dan sơl?” Bol khai ho lah: “Ơ Yàng, bol hi dòn.” 29Gen Kơnràñ ƀư dê mat bol khai mơ đơs lah: “Bơta dòn bol mê dê be lơi gen gơs ngan behơ̆.” 30Mat bol khai gơ pò mo. Yàng Jesu ai jơnau kràñ cê đơs lah: “Bañ ai cau lơi in git.” 31Mơya bol khai lik lòt mơ yal pơnro sơnđan Kơnràñ làm lơgar hơ̆.

Yàng Jesu sơmbòi cau kloat

32Tòm tŭ bol khai lik lòt, gơs cau cèng tus di Kơnràñ dô nă cau kloat cà lơh. 33Dơ̆ neh bơtrơh tơlik cà rau gen cau kloat tus đơs, mơ mpồl làng bol ai lơh krơi mơ đơs lah: “Ò tŭ lơi gŏ bơta be do tòm Israel.” 34#Mat 10:25; 12:24; Mak 3:22; Luk 11:15.Mơya cau Pharisi đơs lah: “Khai kơnòm di bơtau cà mơ bơtrơh cà gơ dê.”

Yàng nđàc sơngit làng bol

35 # Mat 4:23; Mak 1:39; Luk 4:44. Yàng Jesu lòt làm ală ƀòn dờng ƀòn dềt, bơto sồr tòm ală hìu jum, bơto yal Jơnau Niam lơgar đang trồ dê, mơ sơmbòi ală bơta kòp jê lơbơn lơño. 36#Khà 27:17; I Bơtau 22:17; II Yal 18:16; Ejek 34:5; Mak 6:34.Dơ̆ Kơnràñ gŏ mpồl làng bol gen gơs nùs nđàc sơngit, bơh bol khai bòl glar, mơ nrah nring be belàt ò gơs cau ê. 37#Luk 10:2.Gen Kơnràñ đơs mơ ală cau bơtê lah: “Kơnhai toès la dờng ngan, mơya cau toès la dô êt lơm. 38Behơ̆ hòi dan tĕ mơ Yàng kơnhai toès sồr cau toès lòt tus tòm tiah toès Kơnràñ dê.”

Currently Selected:

Mathiơ 9: KPM2018

Highlight

Copy