Mathiơ 6

Bơta lơh broă niam

1 # Mat 23:5. “Kơrhia tĕ, tòm tŭ lơh broă niam, bañ lơh di đap cau nàng bol khai in gŏ. Dilah ò behơ̆, gen bol mê ò geh phan ƀàn lơi bơh dê Bèp bol mê ơm hơđang trồ.

2Behơ̆ tòm tŭ mê pà gòi, bañ uh kơlwòk di đap he, be ală cau ma blac lơh tòm ală hìu jum mơ tòm ală gùng me, nàng geh cau jòng ro. Di ngan Añ đơs mơ bol mê, bol khai neh geh phan ƀàn bol khai dê rau. 3Mơya tòm tŭ mê pà gòi, bañ lòi tê kiau mê git broă tê ma mê lơh, 4tồ bơta pà gòi mê dê geh ndơp ndơr, mơ Bèp mê la Bơtau gŏ tòm tiah ndơp ndơr, rơp ai wơl mê in.”

Bơta hòi dan

(Luka 11:2-4)

5 # Luk 18:10-14. “Tòm tŭ bol mê hòi dan, bañ lơh be ală cau ma blac, bơh bol khai kòñ ntào hòi dan tòm ală hìu jum mơ di ală mum gùng, nàng cau in gŏ. Di ngan Añ đơs mơ bol mê, bol khai neh geh phan ƀàn bol khai dê rau. 6Mơya tòm tŭ mê hòi dan, mut tĕ tòm ơdŭ, til mpồng, gen hòi dan mơ Bèp mê la Bơtau ơm tòm tiah ndơp ndơr; mơ Bèp mê la Bơtau gŏ tòm tiah ndơp ndơr, rơp ai wơl mê in.

7Tòm tŭ bol mê hòi dan, bañ đơs ală jơnau rsĭ ò kwơ be làng bol bơdìh, bơh bol khai tồnlah jơnau đơs oă gen geh dòp. 8Bañ đòm bol khai, bơh Bèp bol mê git ală bơta bol mê pal càng lài mơ tŭ bol mê dan mơ Kơnràñ. 9Behơ̆ bol mê hòi dan tĕ be do:

‘Khoai Bèp bol hi ơm hơđang trồ;

sơnđan Bèp gơs sàng goh;

10Lơgar Bèp gơs tus;

Nùs kòñ Bèp gơs di, tòm ù be trồ!

11Dan ai bol hi in ngai do phan sa tơl ngai.

12Dan toh glài#6:12 Hala dồs. bol hi in,

be bol hi kung toh cau tìs glài mơ bol hi;

13Dan bañ tơmut bol hi tòm bơta ơniai,

mơya dong bol hi klàs bơh bơta iơh.#6:13 Hala cau iơh.

[Bơh lơgar, gơnap gơnoar, gơklŏ gơrê bal mơ Bèp sùm sùm. Amen.’]#6:13 Gơs Sră Goh yau ƀà ò gơs sèng do.

14 # Mak 11:25-26. Bơh dilah bol mê toh bơta tìs glài cau in, gen Bèp bol mê hơđang trồ kung rơp toh bol mê in sơl. 15Mơya dilah bol mê ò toh bơta tìs glài cau in, gen Bèp bol mê kung ò toh bơta tìs glài bol mê in sơl.”

Bơta ơt sa

16“Tòm tŭ bol mê ơt sa, bañ lơh bơthĭ moat jrùng be cau ma blac, bơh bol khai lơh ñòp muh ñòp mat#6:16 Cil: jòp muh jòp mat. nàng cau in git bol khai ơt sa. Di ngan Añ đơs mơ bol mê, bol khai neh geh phan ƀàn bol khai dê rau. 17Mơya tòm tŭ mê ơt sa, bong tĕ mơñà di bồ mơ tuh muh mat, 18nàng cau in ò git mê ơt sa, mơya mìng Bèp mê la Bơtau ơm tòm tiah ndơp ndơr git. Mơ Bèp mê la Bơtau gŏ tòm tiah ndơp ndơr, rơp ai wơl mê in.”

Phan màng ngan

(Luka 12:33, 34)

19 # Jakơ 5:2-3. “Bol mê bañ prap lòi phan màng tòm ù, la tiah gơs mŏ tu mơ è sa siar roh, mơ cau blơ̆ tò ƀlong mut kơñau. 20Mơya pal prap lòi phan màng he in hơđang trồ, la tiah ò gơs mŏ tu mơ ò gơs è sa siar roh, kung ò gơs cau blơ̆ tò ƀlong mut kơñau. 21Bơh phan màng mê dê ơm tiah lơi, gen nùs mê kung ơm tềng hơ̆ sơl.”

Đèng să jan dê

(Luka 11:34-36)

22“Đèng să jan dê la mat. Dilah mat mê niam, gen jơh să jan geh bềng bơta àng. 23Mơya dilah mat mê ò niam, gen jơh să jan mê gơs klam jơngo. Behơ̆ dilah bơta àng tòm mê la klam jơngo, gen bơta klam jơngo do la dờng ò git nđò.”

Bơta kơlôi rcang

(Luka 16:13; 12:22-32)

24“Ò gơs cau lơi rgơi duh broă bàr nă cau tòm, bơh rơp gơjrañ kơuềng di cau do mơ kòñ gơboh di cau ne, hala sền dờng màng di cau do mơ sền òsơp di cau ne. Ală bol mê ò rgơi duh broă Yàng Tom Trồ ndang mơ duh broă jền priă#6:24 Js: mamôn, jơnau Aram sơnio bơh jền priă hala phan mơna, hala bơta pas sơm. ndang.

25Behơ̆ tàng Añ đơs mơ bol mê: Bañ kơlôi rcang bơh bơta kis he dê, ñchi ai sa, ñchi ai ñô, hala bơh să jan he dê, ñchi ai soh. Bơta kis ò di la màng rlau mơ phan sa, mơ să jan ò di la màng rlau mơ phan soh ò ơ? 26Sền tĕ ală sềm hơđang trồ; gơ ò sih, ò toès, kung ò prap tòm đam, mơ Bèp bol mê hơđang trồ kung ròng siam gơ. Bol mê ò di la màng rlau mơ gơ ò ơ? 27Gơs cau lơi tòm bol mê bơh kơlôi rcang mơ rgơi bơtơl rài kis he dô êt phuk sơl ơ? 28Ñchi bơh tài bol mê kơlôi rcang bơh phan soh taih? Sền kơlôi tĕ di ală bơkào gun tòm ƀlàng hòn be lơi; gơ ò gơs bòl glar, ò rồi brài. 29#I Bơtau 10:4-7; II Yal 9:3-6.Mơya Añ đơs mơ bol mê, bulah Salômôn tòm jơh bơta gơklŏ khai dê, kung ò gơs soh be dô nơm tòm ală bơkào hơ̆. 30Behơ̆ dilah ñhơt tòm ƀlàng la jơi ngai do gam mơ ngai hìng sơrbì tòm bơnhă, mơ Yàng Tom Trồ tơnsoh gơ in behơ̆ sơl, tơ ài lah bol mê, ơ ală cau gơs dô êt bơta dòn ne! 31Behơ̆ gen, bañ kơlôi rcang lah: ‘Ñchi bol he ai sa taih?’ ‘Ñchi ai ñô taih?’ ‘Ñchi ai soh taih?’ 32Bơh jơh ală bơta hơ̆ ală làng bol Bơdìh òs jòi jat; mơya Bèp bol mê hơđang trồ git bol mê pal ngui sa ală bơta hơ̆ rau. 33Mơya lài ngan, jòi jat tĕ lơgar Yàng Tom Trồ mơ bơta song ring Kơnràñ dê, gen Kơnràñ rơp ai bơtơl jơh ală bơta hơ̆ bol mê in. 34Behơ̆ gen, bañ kơlôi rcang bơh ngai hìng, bơh ngai hìng rơp kơlôi rcang ngai hìng in. Bơta bòl glar ngai lơi la tơl ngai hơ̆ in.”

Currently Selected:

Mathiơ 6: KPM2018

Highlight

Copy