Popular Bible Verses from Mathiơ 6

Share

Mơya lài ngan, jòi jat tĕ lơgar Yàng Tom Trồ mơ bơta song ring Kơnràñ dê, gen Kơnràñ rơp ai bơtơl jơh ală bơta hơ̆ bol mê in.

Behơ̆ gen, bañ kơlôi rcang bơh ngai hìng, bơh ngai hìng rơp kơlôi rcang ngai hìng in. Bơta bòl glar ngai lơi la tơl ngai hơ̆ in.”

Behơ̆ tàng Añ đơs mơ bol mê: Bañ kơlôi rcang bơh bơta kis he dê, ñchi ai sa, ñchi ai ñô, hala bơh să jan he dê, ñchi ai soh. Bơta kis ò di la màng rlau mơ phan sa, mơ să jan ò di la màng rlau mơ phan soh ò ơ?

Mơya tòm tŭ mê hòi dan, mut tĕ tòm ơdŭ, til mpồng, gen hòi dan mơ Bèp mê la Bơtau ơm tòm tiah ndơp ndơr; mơ Bèp mê la Bơtau gŏ tòm tiah ndơp ndơr, rơp ai wơl mê in.

Behơ̆ bol mê hòi dan tĕ be do: ‘Khoai Bèp bol hi ơm hơđang trồ; sơnđan Bèp gơs sàng goh; Lơgar Bèp gơs tus; Nùs kòñ Bèp gơs di, tòm ù be trồ!

Dan ai bol hi in ngai do phan sa tơl ngai.

Dan toh glài bol hi in, be bol hi kung toh cau tìs glài mơ bol hi

Dan bañ tơmut bol hi tòm bơta ơniai, mơya dong bol hi klàs bơh bơta iơh. [Bơh lơgar, gơnap gơnoar, gơklŏ gơrê bal mơ Bèp sùm sùm. Amen.’]

Bơh dilah bol mê toh bơta tìs glài cau in, gen Bèp bol mê hơđang trồ kung rơp toh bol mê in sơl.

Sền tĕ ală sềm hơđang trồ; gơ ò sih, ò toès, kung ò prap tòm đam, mơ Bèp bol mê hơđang trồ kung ròng siam gơ. Bol mê ò di la màng rlau mơ gơ ò ơ?

“Bol mê bañ prap lòi phan màng tòm ù, la tiah gơs mŏ tu mơ è sa siar roh, mơ cau blơ̆ tò ƀlong mut kơñau. Mơya pal prap lòi phan màng he in hơđang trồ, la tiah ò gơs mŏ tu mơ ò gơs è sa siar roh, kung ò gơs cau blơ̆ tò ƀlong mut kơñau. Bơh phan màng mê dê ơm tiah lơi, gen nùs mê kung ơm tềng hơ̆ sơl.”

“Ò gơs cau lơi rgơi duh broă bàr nă cau tòm, bơh rơp gơjrañ kơuềng di cau do mơ kòñ gơboh di cau ne, hala sền dờng màng di cau do mơ sền òsơp di cau ne. Ală bol mê ò rgơi duh broă Yàng Tom Trồ ndang mơ duh broă jền priă ndang.

Behơ̆ dilah ñhơt tòm ƀlàng la jơi ngai do gam mơ ngai hìng sơrbì tòm bơnhă, mơ Yàng Tom Trồ tơnsoh gơ in behơ̆ sơl, tơ ài lah bol mê, ơ ală cau gơs dô êt bơta dòn ne!

Mơya tòm tŭ mê pà gòi, bañ lòi tê kiau mê git broă tê ma mê lơh, tồ bơta pà gòi mê dê geh ndơp ndơr, mơ Bèp mê la Bơtau gŏ tòm tiah ndơp ndơr, rơp ai wơl mê in.”

“Kơrhia tĕ, tòm tŭ lơh broă niam, bañ lơh di đap cau nàng bol khai in gŏ. Dilah ò behơ̆, gen bol mê ò geh phan ƀàn lơi bơh dê Bèp bol mê ơm hơđang trồ.

“Tòm tŭ bol mê ơt sa, bañ lơh bơthĭ moat jrùng be cau ma blac, bơh bol khai lơh ñòp muh ñòp mat nàng cau in git bol khai ơt sa. Di ngan Añ đơs mơ bol mê, bol khai neh geh phan ƀàn bol khai dê rau. Mơya tòm tŭ mê ơt sa, bong tĕ mơñà di bồ mơ tuh muh mat, nàng cau in ò git mê ơt sa, mơya mìng Bèp mê la Bơtau ơm tòm tiah ndơp ndơr git. Mơ Bèp mê la Bơtau gŏ tòm tiah ndơp ndơr, rơp ai wơl mê in.”